మీ కళ్ళు అలా అవుతున్నాయా? అయితే మీ లివర్ డేంజర్‌ లో ఉన్నట్టే!

నేటి ఉరుకుల పరుగుల జీవితంలో మనకు తెలియకుండానే మన ఆరోగ్యాన్ని పణంగా పెడుతున్నాం. ముఖ్యంగా అనారోగ్యకరమైన ఆహారపు అలవాట్లు, శారీరక శ్రమ లేకపోవడం, పెరిగిన మానసిక ఒత్తిడి కారణంగా లివర్ వ్యాధులు చాపకింద నీరులా విస్తరిస్తున్నాయి. ఒకప్పుడు ఈ సమస్యలు కేవలం వయసు పైబడిన వారిలోనే కనిపించేవి. కానీ నేడు, ఆశ్చర్యకరంగా యువకులు, చిన్నపిల్లలు సైతం ఈ మహమ్మారి బారిన పడుతున్నారు. మన శరీరంలోని విషపదార్థాలను బయటకు పంపి, ఆహారాన్ని శక్తిగా మార్చే అత్యంత కీలకమైన అవయవం కాలేయం.

లక్షణాలు బయటపడని సైలెంట్ డిసీజ్

లివర్ వ్యాధుల విషయంలో ఉన్న అతిపెద్ద ప్రమాదం ఏమిటంటే... ముప్పు ముంచుకొచ్చే వరకు ఇది ఎలాంటి స్పష్టమైన లక్షణాలను బయటపెట్టదు. వ్యాధి తీవ్రమైన తర్వాతే అసలు సమస్య తెలుస్తుంది. అందుకే క్రమం తప్పకుండా హెల్త్ చెకప్‌ లు, ముఖ్యంగా లివర్ ఫంక్షన్ టెస్ట్ (LFT)చేయించుకోవడం చాలా ముఖ్యమని డాక్టర్లు పదే పదే చెబుతుంటారు. ప్రాథమిక దశలోనే సమస్యను గుర్తిస్తే ట్రీట్మెంట్ సులువు అవుతుంది, ప్రాణాపాయాన్ని నివారించవచ్చు.

కళ్ళు చెప్పే చేదు నిజాలు
కాలేయం దెబ్బతింటుందనడానికి మన శరీరం కొన్ని ముందస్తు సంకేతాలను ఇస్తుంది. అందులో అత్యంత ప్రధానమైనది మన కళ్ళు. మీ కనుగుడ్లలోని తెల్లటి భాగం పసుపు రంగులోకి మారుతుంటే, దానిని సాధారణ అలుపుగా భావించి నిర్లక్ష్యం చేయకండి. ఇది మీ శరీరంలో బిలిరుబిన్ అనే వ్యర్థ పదార్థం పెరిగిపోవడానికి స్పష్టమైన సూచిక.

సాధారణంగా పాత ఎర్ర రక్తకణాలు విచ్ఛిన్నమైనప్పుడు బిలిరుబిన్ ఏర్పడుతుంది. ఆరోగ్యవంతమైన లివర్ ఈ వ్యర్థాన్ని వడకట్టి బయటకు పంపుతుంది. కానీ లివర్ పనితీరు మందగించినప్పుడు, ఈ బిలిరుబిన్ శరీరంలో పేరుకుపోయి, ముందుగా కళ్ల ద్వారా పసుపు రంగులో బయటపడుతుంది. ఇది కామెర్లు, హెపటైటిస్, ఫ్యాటీ లివర్ లేదా కాలేయ ఇన్ఫెక్షన్లకు తొలి హెచ్చరిక కావచ్చు. కళ్ళతో పాటు చర్మం పసుపు రంగులోకి మారడం, మూత్రం ముదురు పసుపు రంగులో రావడం, విపరీతమైన నీరసం ఆవహించడం వంటి లక్షణాలు కనిపిస్తే వెంటనే డాక్టర్లను సంప్రదించాలి.

మన చేతుల్లోనే పరిష్కారం

ఆహారం
ఆకుకూరలు, తాజా పండ్లు, తృణధాన్యాలు, ప్రోటీన్లు ఎక్కువగా ఉండే ఆహారాన్ని తీసుకోండి. డీప్ ఫ్రై చేసిన పదార్థాలు, మితిమీరిన స్వీట్లు, ప్యాక్ చేసిన జంక్ ఫుడ్స్, ఆల్కహాల్‌ కు ఎంత దూరంగా ఉంటే లివర్‌ కు అంత మంచిది.

బరువు నియంత్రణ
ఊబకాయం నాన్ ఆల్కహాలిక్ ఫ్యాటీ లివర్ డిసీజ్ కు ప్రధాన కారణం. కాబట్టి బరువును అదుపులో ఉంచుకోవాలి. రోజూ వ్యాయామం చేస్తూ శారీరకంగా చురుకుగా ఉండాలి.

నీరు, వ్యాక్సిన్లు
శరీరంలోని మలినాలు బయటకు పోవాలంటే రోజుకు సరిపడా (కనీసం 3-4 లీటర్ల) నీరు తాగాలి. వీటికి తోడు, హెపటైటిస్ A, B ఇన్ఫెక్షన్ల బారిన పడకుండా ముందుజాగ్రత్తగా వ్యాక్సిన్లు వేయించుకోవాలని నిపుణులు సూచిస్తున్నారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.