ఎండలో బండి పార్క్ చేస్తున్నారా? మీ మగతనానికి ముప్పే..పిల్లలు పుట్టరంట!

మండు వేసవి వచ్చేసింది. భానుడి భగభగలకు రోడ్లపై వెళ్లడమే కష్టంగా మారిన ఈ రోజుల్లో, బైక్ ప్రయాణం చేసే పురుషులకు ఒక పెద్ద ఆరోగ్య సమస్య పొంచి ఉంది. ఆఫీసుకు వెళ్లడానికో, బజారులో పని చూసుకోవడానికో బైక్‌ ను ఎండలో పార్క్ చేయడం మనందరికీ అలవాటే. గంటల తరబడి ఎండలో ఉన్న బైక్ దగ్గరకు వచ్చి, నిప్పుల కొలిమిలా వేడెక్కిన బైక్ సీటుపై అలాగే కూర్చునేస్తుంటాం.

అబ్బా.. ఎంత వేడి అని క్షణకాలం అనుకుని బండి స్టార్ట్ చేస్తాం. కానీ ఈ చిన్న నిర్లక్ష్యం పురుషుల సంతానోత్పత్తి సామర్థ్యంపై తీవ్రమైన ప్రభావాన్ని చూపుతుందని మీకు తెలుసా? అవును, వేడెక్కిన బైక్ సీటు కేవలం తాత్కాలిక అసౌకర్యాన్ని మాత్రమే కాదు, మీ ఆరోగ్య భవిష్యత్తును కూడా ప్రమాదంలో పడేస్తుంది.

వీర్య కణాల పాలిట శాపం
పురుషులలో వీర్య కణాలు (స్పెర్మ్) ఉత్పత్తి కావడానికి, ఆరోగ్యంగా ఉండటానికి సరైన ఉష్ణోగ్రత చాలా అవసరం. శరీరంలోని మిగతా భాగాల కంటే వీర్య కణాలు ఉష్ణోగ్రత పట్ల చాలా సున్నితంగా ఉంటాయి. అందుకే ప్రకృతి సిద్ధంగా వృషణాలు (Testicles) శరీరానికి వెలుపల అమరి ఉంటాయి. దీని వల్ల వృషణాల ఉష్ణోగ్రత, సాధారణ శరీర ఉష్ణోగ్రత కంటే 2 నుండి 4 డిగ్రీలు తక్కువగా ఉంటుంది. ఈ చల్లని వాతావరణం వీర్య కణాల సరైన అభివృద్ధికి ప్రాణాధారం. కానీ, ఎండలో పెట్టి ఉడికిపోతున్న బైక్ సీటుపై కూర్చున్నప్పుడు, గజ్జల ప్రాంతంలో ఒక్కసారిగా ఉష్ణోగ్రత పెరిగిపోతుంది. ఈ ఆకస్మిక వేడి వీర్య కణాలకు తీవ్ర నష్టం కలిగిస్తుంది.

నాణ్యత, కదలికలపై తీవ్ర ప్రభావం
ఆరోగ్య నిపుణుల అభిప్రాయం ప్రకారం.. తరచుగా ఎక్కువసేపు ఇలా అధిక వేడికి గురికావడం వల్ల వీర్య కణాల నాణ్యత, కౌంట్ దారుణంగా పడిపోతాయి. అధిక ఉష్ణోగ్రతల కారణంగా వీర్య కణాల కదలికల వేగం నెమ్మదిస్తుంది. తద్వారా అవి అండం వైపు ప్రయాణించే సామర్థ్యాన్ని కోల్పోతాయి. మరింత ఆందోళనకరమైన విషయం ఏమిటంటే, ఈ తీవ్రమైన వేడి కారణంగా వీర్య కణాల కణనిర్మాణం కూడా దెబ్బతింటుంది. ఇది భవిష్యత్తులో సంతానలేమి సమస్యలకు దారితీస్తుంది.

హార్మోన్ల అపశ్రుతి
సమస్య కేవలం వీర్య కణాలకే పరిమితం కాలేదు. గజ్జల ప్రాంతంలో నిరంతరం ఉష్ణోగ్రతలు పెరగడం వల్ల పురుషులలో కీలకమైన టెస్టోస్టెరాన్ హార్మోన్ ఉత్పత్తిపై ప్రతికూల ప్రభావం పడుతుంది. హార్మోన్ల సమతుల్యత దెబ్బతింటే లైంగిక సామర్థ్యం తగ్గుతుంది. అలాగే, అధిక వేడి వల్ల శరీరంలో ఆక్సిడేటివ్ స్ట్రెస్ పెరుగుతుంది. ఇది నేరుగా వృషణాల కణాలను దెబ్బతీసి, వాటి పనితీరును మందగించేలా చేస్తుంది.

డీహైడ్రేషన్ ముప్పు
వేసవిలో చెమట రూపంలో శరీరంలోని నీరంతా బయటకు పోయి డీహైడ్రేషన్ బారిన పడతాం. శరీరంలో తగినంత నీరు లేకపోతే రక్త ప్రసరణ మందగిస్తుంది. ఇది వీర్య కణాల ఉత్పత్తిని మరింత క్షీణింపజేస్తుంది. ఒక ముఖ్యమైన విషయం ఏమిటంటే.. వీర్యంలో అత్యధిక శాతం నీరే ఉంటుంది. కాబట్టి, వేసవిలో శరీరంలో నీటి స్థాయిలు తగ్గకుండా చూసుకోవడం పురుషుల లైంగిక ఆరోగ్యానికి అత్యంత కీలకం.

పరిష్కారం ఏమిటి?
ఎండలో బైక్ పార్క్ చేసినప్పుడు, సీటుపై ఏదైనా మందపాటి క్లాత్ వేయడం లేదా బండిని చెట్టు నీడలో ఉంచడం అలవాటు చేసుకోండి. బైక్ ఎక్కే ముందు సీటుపై కాస్త నీళ్లు చల్లి లేదా తడి గుడ్డతో తుడిచి, వేడి తగ్గాక మాత్రమే కూర్చోండి. అలాగే రోజుకు కనీసం 3-4 లీటర్ల నీరు త్రాగండి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.