ఆరోగ్యం, పొదుపు ధ్యేయంగా పెంచండి పచ్చని మొక్కలు!

Gardening

oi-Nageswara

By B N Sharma

Published: Thursday, October 13, 2011, 12:22 [IST]

తేలికగా ఇంటి పెరటిలోనే పెంచగల కొన్ని కూరగాయల మొక్కలను పెంచుకుంటే ఎరువులు, క్రిమిసంహారక మందులు వేయని ఆరోగ్యకరమైన కూరగాయలు మార్కెట్ కు వెళ్ళి తెచ్చుకోనవసరం లేకుండానే పొదుపుగా లభిస్తాయి. మనకు ఎంత బిజీగా వున్నప్పటికి పెంపుడు జంతువులను సాకుతూనే వుంటాం. అదే విధంగా మన ఆహార అవసరమైన కూరగాయల తోటను కూడా ఇంట్లో పెంచుకుంటే మంచి లాభసాటి కాగలదు. మార్కెట్ కు వెళ్ళి రావటానికి ఎంతో సమయం వెచ్చిస్తాము. ఆ సమయాన్ని కూరల మొక్కల పెంపకానికి పెడితే చాలా బాగుంటుంది. అందుకవసరమైన కొన్ని మొక్కలను ఎలా పెంచవచ్చో చూడండి....

1. గోంగూర - పచ్చగా వుండే ఈ ఆకు కూరకు పెద్దగా చేయవలసిన పని లేదు. విత్తనాలు వేస్తే చాలు వేగంగా పెరుగుతుంది. కొద్దిపాటి వెడంగా విత్తనాలు నాటండి. రెండు లేదా మూడు వారాలలో మొక్కలు వచ్చేస్తాయి. మొక్కల ఆకులను ఎప్పటికపుడు తుంచి కూడా వాడవచ్చు. ఆకులను వేడి నీటిలో శుభ్రంగా కడిగి ఉపయోగించాలి. గోంగూరలో అనేక విటమిన్లు, ఐరన్ వుంటాయి.
2. తోటకూర - ఇది కూడా పచ్చగా వుండే ఆకు కూర. ఇది బాగా పెరగాలంటే తక్కువ ఉష్ణోగ్రత వుండాలి. తేమ అధికంగా వుండాలి. వీటిని మట్టి కుండీలలో కూడా పెంచవచ్చు. ఎండ వేడి అధికంగా వుంటే కూరకు రుచి తగ్గుతుంది. అధికంగా సూర్య రశ్మి పడని చోట ఈ మొక్కలను పెంచండి. వీటిని కొద్దిపాటి లేతదనం వుండగానే కోసి కూరగాను, లేదా సలాడ్లలోను లేదా పప్పులతో ఉడికించి వాడుకోవచ్చు.
3. వంకాయ - వంకాయ వంటి రుచి మరే ఇతర కూరకూ రాదంటారు. వంకాయ మొక్కలకు మధ్యస్ధమైన వేడి కావాలి. మరీ చలిగా వుంటే మొక్క ఎదుగుదల వుండదు. విత్తనాలను మట్టి కుండీలలో కూడా పెట్టి మొక్కలను పెంచవచ్చు. ఎక్కువ ఎత్తు ఎదగవు. ఈ మొక్కలకు సూర్యరశ్మి బాగా కావాలి. గాలి తక్కువగా వుంటే కాయలు రాలకుండా వుంటాయి.
4. చిక్కుడు తీగలు - చిక్కుడు తీగలను పెంచటం చాలా తేలిక. నాటే ముందు గింజలను నానపెట్టకండి. మొక్క బాగా ఎదగాలంటే, గింజలను ఎండలో పెట్టండి. ఆపై నాటండి. ఈ మొక్క వేళ్ళు బలహీనంగా వుంటాయి. వర్షాలనుండి కొద్దిపాటి రక్షణ కావాలి. వీటిని కూడా పెద్ద డబ్బాలలో లేదా పెద్ద కుండీలలో పెంచవచ్చు.

ఈ నాలుగు మొక్కలు మీ ఇంటి పెరటిలో వేసుకుంటే, నాలుగు రకాల కూరలు చాలా రోజులు ఉపయోగించి ఆరోగ్యకరమైన, పొదుపైన రీతిలో వాడుకోవచ్చు.