మటన్ గిల్లీ బిర్యానీ..వాసనకి పక్కింటోళ్లు కూడా ప్లేట్ పట్టుకుని పరుగెట్టుకొస్తారు!

సాధారణంగా మనం తినే పొడిపొడిగా ఉండే బిర్యానీల కంటే భిన్నంగా, నోట్లో కరిగిపోయేంత మృదువుగా, మసాలా ఘుమఘుమలతో అద్భుతంగా ఉండే స్పెషల్ వంటకం మటన్ గిల్లీ బిర్యానీ. ఈ బిర్యానీ ప్రత్యేకత ఏమిటంటే..దీనిలోని ప్రతి మెతుకు మసాలాతో నిండిపోయి, కాస్త తడితడిగా, అత్యంత రుచికరంగా ఉంటుంది. తినే ప్రతి ముద్దలోనూ మసాలా రుచి, మటన్ జ్యూసీనెస్ అద్భుతంగా తెలుస్తాయి.

ఈ బిర్యానీ ఉడుకుతున్నప్పుడు ఇల్లంతా వ్యాపించే సువాసనలకే ఎవరికైనా నోరూరిపోవాల్సిందే. సౌత్ ఇండియన్ స్టైల్ మసాలా బిర్యానీలు ఇష్టపడేవారికి, సాఫ్ట్ అండ్ జ్యూసీగా ఉండే ఈ గిల్లీ బిర్యానీ కచ్చితంగా ట్రై చేయాల్సిన వంటకం. మటన్ గిల్లీ బిర్యానీ ఎలా తయారుచేసుకోవాలో ఇక్కడ చూడండి.

-నూనె
-నెయ్యి
-హోల్ గరం మసాలా దినుసులు
-సన్నగా తరిగిన ఉల్లిపాయలు
-రుచికి సరిపడా ఉప్పు
-అల్లం వెల్లుల్లి పేస్ట్
-పచ్చిమిర్చి
-టమాటోలు
-కొత్తిమీర
-పుదీనా
-కారం
-గరం మసాలా పొడి
-పెరుగు
-మటన్
-బియ్యం
-నీళ్లు

కారంగా, కమ్మగా ఉండే కరివేపాకు చికెన్ రోస్ట్.. ఈ సీక్రెట్ మసాలాతో రుచి డబుల్!

తయారీ విధానం

-ముందుగా స్టవ్ మీద ఒక ప్రెజర్ కుక్కర్ పెట్టి, అందులో తగినంత నూనె, నెయ్యి వేసి వేడి చేయండి. నెయ్యి కరిగాక హోల్ గరం మసాలా దినుసులు, సన్నగా తరిగిన ఉల్లిపాయ ముక్కలు వేసి అవి బంగారు గోధుమ రంగులోకి మారేవరకు బాగా వేయించాలి.

-ఉల్లిపాయలు వేగిన తర్వాత, అందులో అల్లం వెల్లుల్లి పేస్ట్, పచ్చిమిర్చి, టమాటో ముక్కలు, కొత్తిమీర, పుదీనా, రుచికి సరిపడా ఉప్పు వేయండి. టమాటోలు పూర్తిగా మెత్తబడి, పచ్చి వాసన పోయేంత వరకు బాగా వేయించుకోవాలి. తర్వాత అందులో కారం పొడి, గరం మసాలా పొడి, చిక్కటి పెరుగు వేసి, మసాలా దినుసులన్నీ చక్కగా కలిసేలా బాగా మిక్స్ చేయాలి. మసాలా అడుగంటకుండా సన్నని మంటపై కలుపుతూ ఉండాలి.

-ఇప్పుడు అందులో కడిగి పెట్టుకున్న లేత మటన్ ముక్కలను వేసి, ఆ మసాలా గ్రేవీ అంతా ముక్కలకు పట్టేలా కాసేపు బాగా ఉడికించండి. మటన్ మునిగేలా తగినన్ని నీళ్లు పోసి, కుక్కర్ మూత పెట్టి 7 నుండి 8 విజిల్స్ వచ్చేవరకు ఉడికించాలి. దీనివల్ల మటన్ ముక్కలు మెత్తగా, జ్యూసీగా తయారవుతాయి.

-ఆ తర్వాత ప్రెజర్ పోయాక మూత తీసి, ముందుగా నానబెట్టుకున్న బియ్యాన్ని నీళ్లతో సహా వేయండి (ఒక కప్పు బియ్యానికి సుమారు 1¾ కప్పుల నీళ్లు పోయాలి). నీళ్లు,ఉప్పు సరిపోయాయో లేదో ఒకసారి రుచి చూసుకోండి.

-ఇప్పుడు మళ్లీ కుక్కర్ మూత పెట్టి కేవలం 2 విజిల్స్ వచ్చేవరకు ఉడికించి స్టవ్ ఆఫ్ చేయండి. కుక్కర్ ఆవిరి సహజంగా పూర్తిగా పోయేవరకు అలాగే ఉంచాలి. ఆ తర్వాతే మూత తీసి మెల్లగా కలుపుకోవాలి.

-అంతే నోరూరించే సువాసనలతో, కాస్త తడితడిగా, ఎంతో రుచికరంగా ఉండే మటన్ గిల్లీ బిర్యానీ రెడీ.