మొక్కల కుండీలు పగలకుండా...!

By B N Sharma

Published: Tuesday, November 22, 2011, 17:24 [IST]

సాధారణంగా ఇంటి లోపల లేదా అపార్టు మెంటుల్లో గార్డెన్ నిర్వహించే వారు కుండీలలో మొక్కలను పెంచుతారు. ఈ కుండీలు మట్టివి అయితే చలికాలం గాలి తీవ్రతకు ప్రతిదినం మొక్కలకు పోసే నీటి తేమకు అధికమై పగుళ్ళు చూపుతాయి.

కుండీలు పగుళ్ళు చూపకుండా వుండాలంటే వాటికి లోపలి భాగంలోను, అడుగు భాగంలోను పెయింట్ వేయాలి. నైలాన్ బ్రిజిల్స్ కల ఒక చక్కటి పెయింట్ బ్రష్ తీసుకుని తక్కువరకం పెయింట్ కొని బ్రష్ తో కుండీల లోపలి భాగం, బయటి భాగం, అడుగునా పూర్తిగా రెండు కోట్లు పెయింట్ వేయండి.

పెయింట్ వేసిన కుండీలను బాగా ఎండబెట్టండి. బాగా ఎండిన కుండీలలో మట్టి, మొక్కలు పెట్టండి. ఇక మీ కుండీలు పగలవు సరికదా...వాటి మన్నిక కూడా అధికంగా వుంటుంది. సాధారణంగా మొక్కలకు నీరు పోసినపుడు, కుండీ బయటి భాగం ఉప్పు నీటితో తెల్లగా మారుతుంది. కాని ఈ రకంగా కుండీలకు పెయింట్ వేస్తే, ఇక అటువంటి సమస్య కూడా వుండకుండా మీ మొక్కల కుండీలు ఆకర్షణీయంగా ఇంటికి అలంకరణ కలిగిస్తాయి.