ఇంట్లో పచ్చదనం...సువాసనల గుబాళింపు..!

Published: Wednesday, March 7, 2012, 16:06 [IST]

మార్చి, ఏప్రిల్ నెల మొదలైందంటే చాలు పిల్లలకు పరీక్షలు, ఇల్లల్లో పెళ్లిళ్ల హడావిడి, ఫంక్షన్లు మొదలౌతాయి. అలాగే సెలవులు..ఊళ్లు...ఈ సీజన్ మొత్తం అబ్బో ఎక్కడ చూసినా హడావిడిగా ఉంటుంది. అయితే సెలవుల్లో ఇంటిపట్టున ఉండాలనుకొనే వారు టైం పాస్ కాక ఏదో ఒక పని చేస్తుంటారు. ఇంటిని చక్కబెట్టుట, ఇంటి అలంకరణ, సామాన్లను సర్ధుకోవడం, తోటపని ఇలా రకరకాలు పనులను ముగిస్తారు. కాబట్టి స్వచ్చమైన ఆహారంపై ఆసక్తి ఉన్న వారు ఇక ‘ఇంటి పంటల’ సాగుపై ష్టి పెట్టవచ్చు. పెరట్లోనో, మేడపైన కొన్ని మడులు, మరికొన్ని కుండీలు పెట్టుకొని ఆకుకూరల విత్తనాలు, కూరగాయల మొక్కలు నాటుకుంటే.. ఇంటిల్లిపాదికీ పురుగుమందుల అవశేషాలు లేని తాజా కూరగాయలు, ఆకుకూరలు అందుబాటులో ఉంటాయి.

ఇంట్లో పెంచుకునే మొక్కలు ఆకర్షణీయంగానే కాకుండా గది అందాన్ని పెంచేటివిగాకూడా ఉంటాయి. వీటిని వంట గదిలోని కిటికీల వద్ద ఉంచితే వీటికి గాలి, వెలుతురు తగిలి కాస్త ఏపుగా పెరుగుతాయి. ఇలాంటి కుండీలలో వంటకు ఉపయోగపడే మొక్కలు నాటుకుంటే మరీ మంచిది. ఇలాంటి కుండీలలో కొత్తిమిర, మెంతికూర, పుదీనలాంటివాటిని పెంచుకోవచ్చు. ఇంట్లో ఎక్కువ కుండీలు పెట్టుకుంటే వీటిలో దశలవారిగా పెంచుకుంటుంటే నిత్యం తాజా ఆకులు వాడుకోవచ్చు.

ఉదాహరణకు కొత్తిమిరికి సంబంధించిన కుండీలు నాలుగు పెట్టుకుంటే...ఒక్కొక్క కుండీలో పది రోజుల నిడివిలో ధనియాలను చల్లుకుంటే మీకు కొత్తిమిరికి కొదవే ఉండదు. అలాగే పుదీనా, మెంతి, తోటకూర, ఆకునుకూడా పెంచుకోవచ్చు. దీంతో ఇంట్లో పచ్చదనం ఉంటుంది. మంచి సువాసనలు వెదజల్లుతుంటాయి.