పూల మొక్కలు ఇంట్లో ఉంటే ఆ ఇల్లంతా తాజాదనం..

Published: Thursday, March 1, 2012, 15:45 [IST]

పట్టణాలు, నగరాలల్లో తమకున్న కొంత స్థలంలోనే వారికున్న ఆసక్తితో నచ్చిన మొక్కలు కొనడం, నాటడం చేస్తా రు. అయితే ఎలా పెంచాలో, ఎటువంటి జాగ్రత్తలు తీసుకోవాలో తెలియక పోవడంతో ఆ మొక్కలు సరిగ్గా పెరగవు. కొన్ని జాగ్రత్తలు తీసుకొంటే మనకు నచ్చిన వాటిని కాపాడుకోవచ్చు. ఏ మొక్కని ఎక్కడ నాటాలి. పూల మొక్కలు...ఫలాల మొక్కలకు ఎంతదూరం పాటించాలి అనే అంశాలను తెలుసుకొని మొక్కలను నాటేటప్పుడు పాటించాలి. మొక్కలకు కావలసిన నీరు సరిపోయే విధంగానే పెట్టాలి.

ఎరువుల మోతాదును చూసుకోవాలి. తోటలోని కాలిబాటలు, పూలమడుగులు గ్రీన్‌ హౌస్‌ లను శుభ్రం చేయడం, ఎండిన పువ్వుల్ని, ఆకుల్ని, కొమ్మల్ని, కలుపు మొక్కల్ని ఏరివేయాలి. కంచెలు, బార్డర్లు చక్కగా కత్తిరించాలి. తోటలోని ప్రతిమూలను రోజూ పరిశీలించాలి. మొక్కలు ఆరోగ్యంగా ఉన్నాయా లేవా అని గమనించాలి. ఆకులపై చీడపీడలు ఉన్నప్పుడు వాటిని కత్తిరించడం, ఆ మొక్కలపై వాటిపై తగిన మోతాదుల్లో మందుల్ని చల్లి కాపాడాలి.మొక్కలకు ఎక్కువ ఎండ, నీడ తగలకుండా సరైన మోతాదుల్లో ఎండ ఉండేవిధంగా ప్రత్యేకంగా శ్రద్ధ తీసుకోవాలి. అవసరమైతే చుట్టూ కంచెను ఏర్పాటుచేసుకోవాలి. ఇలా చిన్న చిన్న జాగ్రత్తలు తీసుకుంటే ఇష్టమైన మొక్కలను పెంచుకోవచ్చు.

పూలమొక్కలను పెంచుకోవడం వల్ల తాజాపూలతో ఇంటిని అలంకరించుకోవాలని, పూజకు ఉపయోగపడుతాయని చాలా మందికి ఉంటుంది. కాకపోతే పూవులు అలంకరించిన కొద్ది గంటలకే వాడిపోయినట్లు కనిపిస్తాయి. అలా కాకుండా తాజాగా ఎక్కువ సేపు ఉండాలంటే కొన్ని చిట్కాలు పాటిస్తే సరిపోతుంది. పువ్వులు సాయంత్రం పూటే కోసి అలంకరించుకొంటే తాజాగా ఉంటాయి. పువ్వులు కోయగానే నీటిలో ఉంచాలి. కాడలను మంచి నీటిలో ఉంచిన తర్వాతనే కత్తిరించాలి. అలా చేస్తే పువ్వులు ఎక్కువసేపు తాజాగా ఉంటాయి. ఇలాంటి చిన్న చిన్న జాగ్రత్తలు తీసుకుంటే పూలమొక్కలతో ఇంటిఆవరణంలో అందంతోపాటు, ఇంటిలోపల పువ్వుల అలంకరణ చక్కని శోభనిస్తుంది.