క్రిస్టమస్ పండుగ ఏర్పాట్లు ఎలా?

ఇంటిలో అప్పటివరకు దుమ్ములు పట్టి పేరుకుపోయిన అనవసర వస్తువులను తొలగించండి. కావలసినంత స్ధలం వస్తుంది. ఇక క్రిస్టమస్ చెట్టు, ఊయల, పూలదండలు వంటివి ఏర్పాటు చేసుకోవచ్చు. అలంకరణలో ప్రధానంగా క్రిస్టమస్ ట్రీ ఎక్కడ పెట్టాలి ఇతర పరికరాలు ఎక్కడ పెట్టాలనేది ముందుగా ఒక స్కెచ్ వేసి నిర్ణయించుకోండి. పుష్ప గుచ్ఛాలను పెట్టటానికి గాను రెండు లేదా మూడు మీటర్ల తెల్లటి శాటిన్ గుడ్డను కొనండి. గుడ్డ నీలం రంగు లేదా ఆకుపచ్చ పెట్టినా బాగుంటుంది.

ఇక ఇంటికి వచ్చే అతిధులకు ఏ రకమైన ఆహారాలు తయారు చేయాలో నిర్ణయించుకోండి. కేకులు, కుకీలు పానీయాలు మొదలైనవి ఒకటి లేదా రెండు రోజుల ముందే తయారు చేసుకోండి. మాంసాహారం అదే రోజు వండుకోవాలి. మీరు ఏర్పాటు చేయాలనుకున్న అలంకరణ వస్తువులు ఊయలలో ముందుగానే వుంచుకోండి. క్రిస్టమస్ ట్రీ కి లైట్లు, మీ చేతి వ్రాతతో గల కొటేషన్లను పెడితే బాగుంటుంది. లేదా మీ కుటుంబ సభ్యుల ఫొటోలు చెట్టుకు వేలాడదీసినా చూచేవారికి వినూత్నంగా కనపడుతుంది. క్రిస్టమస్ పండుగ ఏర్పాట్లు అంటే, ఇంటి అలంకరణే కాక, ఇతర విందు వినోద ఖర్చులు కూడా వుంటాయి. కనుక ముందుగా మీరు ఏ వస్తువులు కొనాలనుకుంటున్నారు అనే ప్రాతిపదికపై ప్రాధాన్యతలతో కూడిన వ్యయ పట్టికను సిద్ధం చేయండి.