Makar Sankranti 2023 : సంక్రాంతిని తెలంగాణలో ఎలా జరుపుకుంటారో తెలుసా? అప్పాలు, పతంగులు ఇంకా ఎన్నో..

నాన్ వెజ్ ఉండాల్సిందే:

ఆంధ్రప్రదేశ్‌లోని చాలా ప్రాంతాల్లో మకర సంక్రాంతి అతి పెద్ద పండగ. ఎంతో ఆడంబరంగా జరుపుకుంటారు. ఏపీలో సంక్రాంతి సంబరాలు అంబరాన్నంటుతాయి. తెలంగాణలో కూడా సంక్రాంతి పెద్ద పండగే అయినప్పటికీ సంక్రాంతి కంటే దసరా, బతుకమ్మ పండగలను ఇక్కడ పెద్ద ఎత్తున జరుపుకుంటారు.

సంక్రాంతి అనే కాకుండా ఇతర పండగల వేళ కూడా ఆంధ్రాలో నాన్ వెజ్ వంటకాలు వండుకోరు. అయితే తెలంగాణలో మాత్రం పూర్తిగా భిన్నంగా ఉంటుంది. బతుకమ్మ లాంటి కొన్ని పండగలు మినహా ప్రతి పండగా నాన్ వెజ్‌తోనే జరుపుకుంటారు.

పందేలు కాదు పతంగులు:

తెలంగాణలోని చాలా ప్రాంతాల్లో సంక్రాంతికి పతంగులు ఎగురవేస్తుంటారు. హైదరాబాద్‌లో పతంగులు పెద్ద సంఖ్యలో ఎగురవేయడం కనిపిస్తుంది. హైదరాబాద్‌తో పాటు కరీంనగర్, వరంగల్, నిజామాబాద్, ఆదిలాబాద్ లాంటి ఉత్తర తెలంగాణ జిల్లాలతో పాటు దక్షిణ తెలంగాణలోని కొన్ని జిల్లాల్లో పతంగులు ఎగురవేయడం కనిపిస్తుంది. ఆంధ్రతో సరిహద్దు పంచుకునే కొన్ని ప్రాంతాల్లో మాత్రం రెండూ కలగలిపిన ఆచారాలు, సంప్రదాయాలు కనిపిస్తాయి.

తెలంగాణలో సంక్రాంతి పిండి వంటలు:

* చకినాలు/సకినాలు

* గారెప్పలు/ అప్పాలు/చెక్కలు

* చెగోడీలు

* అరిసెలు

* గర్జెలు

* మురుకులు

ముగ్గులు, గొబ్బెమ్మలు:

సంక్రాంతి రోజు ప్రతి ఇంటి ముందు రంగురంగుల ముగ్గులు వేస్తారు. రంగవల్లుల మధ్యలో ఆవు పేడతో చేసిన గొబ్బెమ్మలను ముగ్గుల మధ్యలో ఉంచుతారు. గొబ్బెమ్మలపై గడ్డి, శెనగప్పు, నువ్వులు చల్లుతారు, కొన్ని నేరేడుపండ్లు గొబ్బెమ్మల పక్కన పెడతారు.

తెలంగాణలో భోగి ఎలా చేసుకుంటారు:

భోగి రోజు తెల్లవారుజామున నిద్ర లేచి స్నానాది కార్యక్రమాలు పూర్తి చేసుకుంటారు. తర్వాత ఇంట్లో ఉన్న పాతవస్తువులతో అందరూ కలిసి మంట వేస్తారు. దాని చుట్టూ తిరుగుతారు.

భోగి రోజు జంతువులకు ఆహారం పెడుతుంటారు. మూడు సంవత్సరాల కంటే తక్కువ వయస్సు ఉన్న పిల్లలకు దిష్టి తగలకుండా రేగి పండ్లతో స్నానం చేయిస్తారు.