యుఎస్ వైస్ ప్రెసిడెంట్ కమలా హ్యారిస్ గురించి మనం నమ్మలేని నిజాలు...

కమలా జననం..

కమలా హ్యారిస్ 1964, అక్టోబర్ 20వ తేదీన ఆక్లాండ్ లో జన్మించారు. ఈమె తల్లి తమిళనాడులోని ఓ సంప్రదాయ కుటుంబానికి చెందిన వారు. తండ్రి జమైకా దేశానికి చెందిన వారు. ఈమె తల్లి పేరు శ్యామల గోపాలన్ హారిస్, తండ్రి పేరు డొనాల్డ్ హారిస్. ఆయన స్టాన్ఫోర్డ్ యూనివర్సిటీలో ఆర్థిక శాస్త్ర ఆచార్యులు. ఆమె తల్లి ఒక క్యాన్సర్ సైంటిస్ట్.

కమలా విద్యాభ్యాసం..

కమలా హ్యారిస్ వాషింగ్టన్ డీసీలోని హోవార్డ్ యూనివర్సిటీలో చదువుకున్నారు. యూసీ,హోస్టింగ్స్, కాలేజీలో న్యాయ విద్యను పూర్తి చేశారు.అలమెండా కౌంటీ డిస్ట్రిక్ట్ అటార్నీ కార్యాలయంలో ఎనిమిదేళ్ల పాటు పని చేశారు. ప్రధానంగా చిన్నపిల్లలపై జరిగే హింసకు సంబంధించిన కేసులను ఎక్కువగా విచారించారు.

ఒబామా హయాంలో..

అదే సమయంలో బరక్ ఒబామా అధ్యక్ష ఎన్నికల సమయంలో ఆయన కంట పడ్డారు. అనంతరం ఆమె డెమొక్రటిక్ పార్టీలో చేరారు. ఆ తర్వాత ఆమె కాలిఫోర్నియా సెనెటర్ గా ఎన్నికయ్యారు.

తమిళనాడులో ప్రత్యేక పూజలు..

కమలా హారిస్ అమెరికాలో విజయం సాధించడం కోసం తమిళనాడులోని తులశాంతిరాపురంలో ప్రత్యేక పూజలు కూడా చేశారట. హారిస్ తాత పివి గోపాలన్ చెన్నై నుండి 350 కిలోమీటర్ల దూరంలో ఉన్న ఈ గ్రామంలో నివసించారు.

దాదాపు 90 నిమిషాల చర్చ..

కమలా హారిస్ ఎన్నికల్లో విజయం సాధించడానికి జరిగిన చర్చలో, ప్రస్తుత ఉపాధ్యక్షుడు మైక్ పెన్స్ మరియు కమలా హారిస్ మధ్య దాదాపు 90 నిమిషాల పాటు చర్చ జరిగింది. ఇందులో కమలాహారిస్ ప్రధానంగా దేశంలో కరోనా వైరస్ పై పోరాడటంలో ప్రభుత్వ సడలింపుల వైఖరిని లక్ష్యంగా చేసుకున్నారు.

రాజకీయ ప్రస్థానం..

కమలా హారిస్ అమెరికా వైస్ ప్రెసిడెంట్ వరకు రాజకీయ ప్రస్థానం చాలా ఆసక్తికరంగా సాగింది. ఆమె మొట్టమొదటిసారిగా 2003లో శాన్ ఫ్రాన్సిస్కో కౌంటీ జిల్లా అటార్నీగా ఎన్నికయ్యారు. ఆ తర్వాత ఆమె కాలిఫోర్నియా అటార్నీ జనరల్ గా చేశారు. అనంతరం 2017లో కాలిఫోర్నియా నుండి యునైటెడ్ స్టేట్స్ సెనేటర్ గా ప్రమాణ స్వీకారం చేశారు. ఇలా చేసిన రెండో నల్ల జాతి మహిళగా రికార్డు నెలకొల్పారు.

అధ్యక్ష ఎన్నికలకు..

ఆమెకు క్రమంగా ప్రజల్లో ఆదరణ పెరగడంతో హారిస్ 2019 జనవరి 21న అధ్యక్ష ఎన్నికలకు తన అభ్యర్థిత్వాన్ని ప్రకటించారు. అయితే అక్కడ జరిగిన అనూహ్య పరిణామాల వల్ల అదే ఏడాది డిసెంబర్ 3న ఎన్నికల రేసు నుండి తన పేరును ఉపసంహరించుకున్నారు. అప్పటినుండి ఆమె జో బైడెన్ కు మద్దతు ఇవ్వడానికి ముందుకొచ్చారు.