Gobbemma : సంక్రాంతి రంగవల్లుల మధ్యలో గొబ్బెమ్మలను ఎందుకు ఉంచుతారో తెలుసా?

గొబ్బెమ్మల సాంప్రదాయం:

ముగ్గు మధ్యలో గొబ్బెమ్మలు పెట్టి అలంకరించడం హిందూ సాంప్రదాయం. ఆవు పేడతో గొబ్బెమ్మలు తయారు చేసి పసుపు, కుంకుమ పెట్టి, పూలతో అలంకరిస్తారు. నవ ధాన్యాలు పోస్తారు. ముగ్గులపై గడ్డి పెడతారు. ఆ తర్వాత అమ్మాయిలంతూ గొబ్బెమ్మల చుట్టూ తిరుగుతూ ఆడిపాడతారు. సంక్రాంతి వేళ ఈ సాంప్రదాయాన్ని పాటిస్తారు.

ఆవు పేడతోనే..:

ఆవుల పేడతోనే గొబ్బెమ్మలు తయారు చేస్తారు. ఆవును గౌరీమాతాగా కొలుస్తారు హిందువులు. అందుకే ఆవు పేడను ఎంతో పవిత్రంగా భావిస్తారు. ఆవు పేడలో క్రిమి కీటకాలను నాశనం చేసి, ప్రకృతికి మేలు చేసే గుణాలు ఎన్నో ఉన్నాయి. అందుకే గొబ్బెమ్మలను గౌరీదేవిగా భావించి ముగ్గులపై అలంకరిస్తారు.

గోదాదేవి:

గొబ్బెమ్మలు గోపికలను, పూలరేకులు, పసుపు, కుంకుమలు సౌభాగ్యాన్ని సూచిస్తాయి. మధ్యలో పెట్టే పెద్ద గొబ్బెమ్మను గోదాదేవిగా భావిస్తారు. సాధారణంగా గొబ్బెమ్మలను పెళ్లి కాని అమ్మాయిలు తయారు చేసి అలంకరిస్తారు. అలా చేస్తే త్వరగా పెళ్లి అవుతుందని నమ్మకం. అలాగే మంచి భర్త వస్తాడని విశ్వసిస్తారు.

గొబ్బెమ్మలను పొయ్యిలో వేసి..:

నెలరోజులూ రంగురంగుల ముగ్గులు వేసి గొబ్బెమ్మలు పెట్టి తర్వాత వాటిని ఎండబెడతారు. చివరి రోజైన కనుమ రోజు గొబ్బెమ్మలను పొయ్యిలో వేసి.. ఆ మంటపై ప్రసాదం తయారు చేస్తారు. ఆ ప్రసాదాన్ని సూర్యుడికి నైవేద్యంగా సమర్పిస్తారు.