ఉగాది పచ్చడి ఎందుకు తినాలి? ఎన్ని రోజులు తినాలి? ఈ రహస్యం మీకు తెలుసా?

ఆమని రాకతో ప్రకృతి పచ్చని తివాచీ పరుచుకుంటుంది. మామిడి చిగుర్లు, కోకిలల కుహూ కుహూ రాగాలు, వేప పూత పరిమళాల మధ్య తెలుగువారి లోగిళ్లలో కొత్త సంవత్సరం కోలాహలం మొదలుకానుంది. చైత్ర శుద్ధ పాడ్యమి రోజున జరుపుకునే ఉగాది పండుగతో తెలుగువారి నూతన సంవత్సరం అట్టహాసంగా ఆరంభమవుతుంది. ఈ ఏడాది ఉగాది పండుగ మార్చి 19న (గురువారం నాడు) రేవతి నక్షత్ర ప్రవేశంతో వస్తోంది.

గతించిన కాలం మనకు ఎన్నో అనుభవాలను, పాఠాలను నేర్పింది. కష్టసుఖాలు, ప్రమాదాలు, ప్రమోదాల కలబోతగా గడిచిన విశ్వావసు నామ సంవత్సరానికి ఆత్మీయంగా వీడ్కోలు పలుకుతూ.. కోటి ఆశలతో, నవ్య కాంతులతో శ్రీ పరాభవ నామ సంవత్సరానికి మనం స్వాగతం పలుకుతున్నాం. రైతన్నలు కొత్తగా సాగు పనులు మొదలుపెట్టే అత్యంత శుభ తరుణం ఇది.

ఉగాది పచ్చడి.. ఒక మహా ఔషధం!
ఉగాది రోజు ప్రతి ఒక్కరూ కచ్చితంగా ఈ షడ్రుచుల పచ్చడిని రుచి చూడాలని పండితులు చెబుతుంటారు. అయితే ఇది కేవలం ఆచారమో, సంప్రదాయమో కాదు, అంతకు మించిన ఒక మహా ఔషధం. చాలామంది ఉగాది పచ్చడిని కేవలం పండుగ రోజు మాత్రమే తిని వదిలేస్తారు. కానీ ఆయుర్వేద నిపుణులు, పెద్దలు చెప్పేదాని ప్రకారం.. ఈ ఉగాది పచ్చడిని శ్రీరామ నవమి వరకు (తొమ్మిది రోజులు) లేదా చైత్ర పౌర్ణమి వరకు (పదిహేను రోజులు) రోజూ తీసుకోవాలి.

వాతావరణం వేడెక్కుతున్న ఈ సమయంలో ఇలా 9 లేదా 15 రోజుల పాటు ఉగాది పచ్చడిని తినడం వల్ల శరీరంలో రోగనిరోధక శక్తి అమాంతం పెరుగుతుంది. ఇందులో వాడే ప్రధానమైన వేప పువ్వు.. మన కడుపులో పేరుకుపోయిన నులిపురుగులను నాశనం చేస్తుంది.

అంతేకాకుండా ఎండాకాలంలో వచ్చే ఆటలమ్మ, అమ్మోరు వంటి భయంకరమైన వ్యాధులను వేప గాలి, వేప పూత దరిచేరనివ్వవు. ఇక పచ్చడిలో వాడే లేత మామిడి ముక్కలు యాంటీ వైరల్ లక్షణాలను పుష్కలంగా కలిగి ఉంటాయి. మనిషి అనారోగ్యానికి మూలకారణమైన కఫం, వాతం, పైత్యం అనే మూడు దోషాలను ఈ మామిడి అదుపులో ఉంచుతుంది.

శ్లోక పఠనం.. సకల శుభకరం!
ఉగాది పచ్చడిని స్వీకరించేటప్పుడు కేవలం రుచి చూడటమే కాకుండా.."శతాయుర్వజ్ర దేహాయ సర్వసంపత్కలాయచ..సర్వారిష్ట వినాశాయ నింబకం దళ భక్షణం" అనే శ్లోకాన్ని పఠిస్తూ ఈ ప్రసాదాన్ని తీసుకోవాలని పండితులు సూచిస్తున్నారు.

వజ్రం లాంటి దృఢమైన శరీరం, నూరేళ్ల ఆయుష్షు, సకల సంపదలు కలగాలని, సర్వ రోగాలు నశించిపోవాలని కోరుకుంటూ ఈ పచ్చడిని తింటున్నానని ఈ శ్లోకానికి అర్థం.