బంగారం ధరల పెరుగుదలపై గ్లోబల్ బ్యాంకింగ్ దిగ్గజాలు షాకింగ్ నివేదిక.. పసిడి ర్యాలీ ఎంత వరకు సాగుతుందంటే..

బంగారం ధరలు ఈ నెల ఆరంభం నుంచి పసిడి ప్రియులకు చుక్కలు చూపిస్తున్నాయి. కొనుగోలు చేయాలంటేనే భయపడే పరిస్థితి కనిపిస్తోంది. ప్రతి రోజూ భారీగా పెరుగుతూ పెట్టుబడిదారులకు లాభాల పంట పండిస్తుంటే సామాన్యులు మాత్రం లబోదిబోమనే పరిస్థితి కనిపిస్తోంది. ఇప్పటికే Gold ధరలు 5 వేల డాలర్ల స్థాయిని దాటి కొత్త దశలోకి ఎంటర్ అయ్యాయి. అంతర్జాతీయంగా డాలర్ విలువ కుప్పకూలడంతో బంగారానికి కలిసి వచ్చింది. ఇన్వెస్టర్లు తమ పెట్టుబడులను బంగారం మీదకు మళ్లించారు. దీంతో పసిడి ధరలకు రెక్కలు వచ్చాయి. స్తుతం స్పాట్ గోల్డ్ ఔన్సుకు సుమారు 5,100 డాలర్ల వద్వ ట్రేడ్ అవుతోంది.

ఈ బ్రేక్‌అవుట్‌ను విశ్లేషకులు కేవలం తాత్కాలిక ర్యాలీగానే కాకుండా.. బంగారం పాత్రలో జరుగుతున్న నిర్మాణాత్మక మార్పుగా చూస్తున్నారు. ప్రపంచవ్యాప్తంగా పెరుగుతున్న స్థూల ఆర్థిక అనిశ్చితులు, భౌగోళిక రాజకీయ ఉద్రిక్తతలు, ఫియట్ కరెన్సీలపై విశ్వాసం బలహీనపడటం ఈ పెరుగుదలకు ప్రధాన కారణాలుగా నిలుస్తున్నాయి.బంగారం ధరలను ముందుకు నడిపిస్తున్న ప్రధాన శక్తి కేంద్ర బ్యాంకుల కొనుగోళ్లు అని చెప్పవచ్చు.

ప్రపంచ బంగారు మండలి డేటా ప్రకారం.. 2025 అంతటా కేంద్ర బ్యాంకులు రికార్డు స్థాయిలో బంగారం కొనుగోలు చేశాయి. ముఖ్యంగా అభివృద్ధి చెందుతున్న దేశాలు తమ విదేశీ మారక నిల్వలను డాలర్ ఆధారిత ఆస్తుల నుంచి బంగారం వైపు మళ్లిస్తున్నాయి. ఇది బంగారాన్ని కేవలం పెట్టుబడి సాధనంగా కాకుండా.. వ్యూహాత్మక రిజర్వ్ ఆస్తిగా మరింత బలపరుస్తోంది.

ఈ నేపథ్యంలో ప్రధాన అంతర్జాతీయ బ్యాంకులు తమ బంగారం ధర అంచనాలను గణనీయంగా పెంచుతున్నాయి. గోల్డ్‌మన్ సాచ్స్ 2026 కోసం తన బంగారం ధర అంచనాను ఔన్సుకు 5,400 డాలర్లకి పెంచింది. ధరల పట్ల తక్కువ సున్నితత్వం కలిగిన కేంద్ర బ్యాంక్ కొనుగోలుదారులు మార్కెట్‌లో అధిక ధర స్థాయిలను నిలబెట్టే శక్తిగా మారుతున్నారని బ్యాంక్ విశ్లేషకులు చెబుతున్నారు. భవిష్యత్తులో వడ్డీ రేట్ల కోతలు జరిగితే నిజమైన దిగుబడులు తగ్గుతాయి. ఇది చారిత్రాత్మకంగా బంగారానికి అనుకూల వాతావరణంగా పనిచేస్తుందని కూడా వారు అభిప్రాయపడుతున్నారు.

భౌగోళిక రాజకీయ పరిస్థితులు కూడా బంగారం ర్యాలీకి బలమైన మద్దతు ఇస్తున్నాయి. తూర్పు ఐరోపా, మధ్యప్రాచ్యంలో కొనసాగుతున్న ఘర్షణలు, వాణిజ్య యుద్ధాల ముప్పు, ప్రధాన ఆర్థిక వ్యవస్థలలో పెరుగుతున్న రుణ భారాలు.. ఇవన్నీ బంగారాన్ని తటస్థమైన, సురక్షిత రిజర్వ్ ఆస్తిగా మరింత ఆకర్షణీయంగా మారుస్తున్నాయి. ఈ పరిస్థితుల్లో పెట్టుబడిదారులు బంగారాన్ని ఊహాజనిత ట్రేడ్‌గా కాకుండా, దీర్ఘకాలిక రిస్క్ బీమాగా చూస్తున్నారు.

బంగారం ధరల పెరుగుదలపై మరో బాంబు పేల్చిన కియోసాకి.. రూ.10 గ్రాములు ధర రూ.8.68 లక్షలకు..

అనుభవజ్ఞుడైన మార్కెట్ విశ్లేషకుడు డేవిడ్ రోచె ప్రకారం.. కేంద్ర బ్యాంకులు ఫియట్ కరెన్సీల నుంచి దూరమవుతున్న ధోరణి కొనసాగితే బంగారం ఔన్సుకు 6 వేల డాలర్ల వరకు చేరవచ్చు. ఇదే దారిలో UBS కూడా 5,400 డాలర్ల లక్ష్యాన్ని ప్రతిధ్వనించగా.. యార్దేని రీసెర్చ్, జెఫరీస్ వంటి సంస్థలు దీర్ఘకాలంలో 6 వేల డాలర్ల నుంచి 6,600 డాలర్ల వరకు బంగారం చేరే అవకాశాన్ని ప్రస్తావించాయి.

రిటైల్ పెట్టుబడిదారుల వైపు చూస్తే.. రచయిత, పెట్టుబడిదారుడు రాబర్ట్ కియోసాకి బంగారంపై అత్యంత బుల్లిష్ దృక్పథాన్ని కొనసాగిస్తున్నారు. కరెన్సీల విలువ క్రమంగా క్షీణిస్తుందని ఆయన వాదిస్తున్నారు. బంగారాన్ని వ్యవస్థాగత ఆర్థిక ప్రమాదానికి రక్షణగా సూచిస్తున్నారు. ఆయన అంచనాలు సంప్రదాయ విశ్లేషణలకు అతీతమైనవైనా, బంగారం పట్ల ఉన్న దీర్ఘకాలిక విశ్వాసాన్ని ప్రతిబింబిస్తాయి.

డేటా మోడళ్ల పరంగా చూస్తే, CoinCodex అంచనాల ప్రకారం 2026 తొలి త్రైమాసికంలో బంగారం సగటు ధర 5,200 డాలర్ల నుంచి 6,700 డాలర్ల మధ్య కదలవచ్చు. ఇదే ఊపు కొనసాగితే ఏడాది మధ్య నాటికి ధరలు 8,500 డాలర్ల నుంచి 9,500 డాలర్ల మధ్యకు చేరే దృశ్యాలను కూడా వారు సూచిస్తున్నారు. అయితే, ఇటువంటి అధిక అంచనాలు కొనసాగాలంటే కేంద్ర బ్యాంకుల కొనుగోళ్లు, భౌగోళిక ఒత్తిళ్లు స్థిరంగా కొనసాగాల్సి ఉంటుంది.

క్లుప్తంగా చెప్పాలంటే.. బంగారం దృక్పథం బలంగా ఉన్నప్పటికీ అస్థిరత ప్రమాదాలను విస్మరించలేం. 5 వేల డాలర్ల పైన ధరలు స్థిరపడిన నేపథ్యంలో మధ్యంతర పుల్‌బ్యాక్‌లు రావచ్చని విశ్లేషకులు హెచ్చరిస్తున్నారు. అయినప్పటికీ బంగారం ధరలు భవిష్యత్తులో పెరిగే అవకాశాన్ని సూచిస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.

Credit: Goodreturns