మీ బిడ్డకు వినికిడి ఎప్పటినుండి...?

By B N Sharma

Published: Thursday, June 21, 2012, 15:04 [IST]

తల్లి కాబోయే మహిళ తన కడుపులో వున్న బిడ్డ కొరకు గాను కొన్ని పాటలను సాధన చేస్తుంది. ఇది సాధారణమే. తల్లి స్వరధ్వరి బిడ్డకు ఊరట కలిగిస్తుందనేది ఎంతోకాలంగా వస్తున్న నమ్మకం. బేబీ తల్లి పాడే జోలపాటల ఆధారంగానే పెరిగి పెద్దదవుతుంది. డాక్టర్లు, గర్భిణీ స్త్రీలకు ప్రతిరోజూ కొంత మ్యూజిక్ విని రిలాక్స్ అవమని కూడా సూచిస్తారు. కొంతమంది జంటలైతే, తమ బిడ్డ కడుపులో వుండగానే కూడా ఏదో ఒక తాత్కాలిక పేరు పెట్టి పిలుస్తూ ఆనందిస్తారు. మరి అటువంటపుడు, కడుపులోని బేబీ మీ మాటలు వింటుందా? మీ నవ్వు వింటుందా? మీరు పాడే జోలపాటలు ఆనందిస్తుందా?

అసలు బేబీ ఎప్పటినుండి వినగలదు?
పిండం అభివృధ్ధి చెందటమనేది ఒక ఆసక్తికర విషయం. దీనిని వ్యతిరేకించేవారు ఉండరు. కొంతమంది నిపుణుల మేరకు కడుపులో వున్న బిడ్డ తన 16వ వారంనుండే వినటం మొదలుపెడుతుంది. మరికొంతమంది 18 వ వారం లేదా 20వ వారం నుండి కూడా అని చెపుతారు. ఏది ఏమైనప్పటికి బేబీ రెండవ త్రైమాసిక గర్భిణీ స్ధితినుండి బయటి శబ్దాలు వింటుందనేది ఒక వాస్తవం.

బేబీ ఏం వినగలదు?
వాస్తవం చెప్పాలంటే, బేబీ మీ చుట్టుపట్ల ఏ శబ్దాలు వచ్చినా వినగలదు. అయితే చాలా పొరలతో కప్పబడి మీ కడుపులో వుండటం చేత, చుట్టూ వున్న ఉమ్మనీరు కారణంగా ఆ శబ్దాలు ఎక్కడో దూరంనుండి వినపడుతున్నట్లు అనిపిస్తాయి. కనుక కడుపుతున్న మీ మహిళ వద్ద తగవులు, కొట్లాటలు, హేళనలు వంటివి చేయకండి. కడుపులో వుండే బేబీ తాను వినే శబ్దాలు, పరిచయమా? కాదా? మంచివా? కఠినమైనవా? లేదా చికాకు శబ్దాలా అనేది కూడా గ్రహిస్తుంది. మీ మాటలను అర్ధం చేసుకోలేదు కాని వాటి భావనలు పట్టుకోగలదు.బిడ్డ నేర్చుకొనే భాష తల్లి కడుపునుండి దానికి మొదలవుతుంది. అందుకనే దానిని మాతృభాష అని అంటాము. ఆ భాషను కడుపులో పెరుగుతున్నప్పటినుండి నేర్చుకుంటుంది.

బేబీ ఏం వినేందుకు ఇష్టపడుతుంది?
హాయిగా వుండే ధ్వనులు...అంటే జోలపాటలవంటివి ఇష్టపడుతుంది. తరచుగా విని నిద్రించేందుకు ప్రయత్నిస్తుంది. రాక్ మ్యూజిక్ వంటివి పెద్ద ధ్వనులను వినిపించకండి. తట్టుకోలేదు. చిన్ని ధ్వని వచ్చే వాటిని బేబీకి వినిపించండి. అకస్మాత్ పెద్ద ధ్వనులు, ట్రాఫిక్ శబ్దాలు, హారన్ లు, మొదలైనవి బేబీని కలవరపరుస్తాయి. కనుక అరవటం, లేదా హింసాత్మక సినిమాలు చూడటం గర్భిణీ స్త్రీచేయరాదు. అల్ట్రా సౌండ్ స్కానింగ్ లో మీరు వాస్తవంగా మీ బేబీ ధ్వనులకు ఎలా స్పందిస్తుందనేది తెలుసుకోవచ్చు.

బేబీ తన తల్లి గొంతు వినటానికి ఇష్టపడుతుంది. తల్లి, తండ్రి, కుటుంబంలోని ఇతర సభ్యుల గొంతులను రెండవ త్రైమాసికంలోనే తేలికగా గుర్తుపడుతుంది. కనుక మీ బేబీ మంచి విషయాలు విని ఆనందించేందుకు సహకరించండి.

Comments

Story first published: Thursday, June 21, 2012, 15:03 [IST]

Other articles published on Jun 21, 2012

Latest Updates

Can Your Baby Hear You? | అమ్మపాట....జోలపాట!