తల్లితండ్రుల సమావేశాలకు హాజరవుతున్నారా?

Kids

oi-Nageswara

By B N Sharma

Published: Monday, February 27, 2012, 10:37 [IST]

చాలామంది తల్లితండ్రులు స్కూలులో జరిగే తల్లి తండ్రుల సమావేశాలతో ప్రయోజనం లేదనుకుంటారు. కాని అది పొరపాటు. మన పిల్లవాడు బాగానే చదువుకుంటున్నాడనుకుంటాం. కానీ అతని సమగ్ర ప్రవర్తన, అభివృద్ధి పట్ల తల్లితండ్రులు ఆలోచించాలి. స్కూళ్ళలో జరిగే పేరెంట్ టీచర్ మీటింగులకు తల్లితండ్రులు ఎందుకు వెళ్ళాలనే అంశాన్ని పరిశీలిద్దాం. పిల్లలకు మార్కులు బాగా వస్తున్నప్పటికి, స్కూలులో వారి ప్రవర్తనలోపాలుండవచ్చు. పిల్లవాడు బాగానే చదువుతున్నప్పటికి దానిని ఎలా కొనసాగించాలనే అంశంపై మీరు టీచర్లను సంప్రదించాలి. పిల్లవాడు బాగా చదవకపోయినా కొన్ని మార్లు భయం చేత తల్లితండ్రులు ఈ సమావేశాలకు హాజరుకారు. అది కూడా తప్పే. సమావేశాలకు హాజరై తమ పిల్లవాడు సరిగా చదవకపోవటానికి కారణాలను వారు పరిశీలించాలి. టీచర్లతో చర్చించాలి.

పిల్లలగురించిన చర్యలన్నీ మీకు తెలియాలి. పిల్లలు ఎంతపనికైనా సరే సాహసిస్తారు. చివరకు ప్రోగ్రెస్ రిపోర్టులపై సంతకాలు సైతం ఫోర్జరీ చేస్తారు. వీరి సంగతి పూర్తిగా తెలుసుకోకుండా ప్రోగ్రెస్ రిపోర్టుతో సంతోషపడిపోవడం సరి కాదు. మీరు సమావేశాలకు హాజరైతే తప్ప మీ పిల్లవాడి స్కూలు ప్రవర్తన మీకు తెలియదు. పిల్లాడు సిగ్గుపడుతున్నాడా, భయపడే రకమా? లేక టీచర్లను, తోటి విద్యార్ధులను టీజ్ చేస్తున్నాడా? మున్న్నగు అంశాలకై మీరు తప్పక మీటింగులకు హాజరు కావాలి.

పిల్లలు స్కూలులో చేర్పించేటపుడు మెత్తగా వున్నా తర్వాతి రోజులలో వారి ప్రవర్తనలో మార్పులు వస్తాయని గమనించండి. ఒక్కొకపుడు, స్కూలు బోధనలు పిల్లవాడికి సరికాకపోవచ్చు కూడాను అటువంటపుడు మీ అభిప్రాయాలను తెలియజేయటానికి ఈ మీటింగులు సరైనవి. ఈ సమావేశాలలో మీరు ఇతర విద్యార్ధుల తల్లితండ్రులను కూడా కలిసి పిల్లల సమగ్ర బాగోగులు చర్చించవచ్చు. సమయంలేనందువలన సమావేశాలకు హాజరు కవటంలేదనేది ఒక కుంటిసాకు మాత్రమే. పిల్లవాడి భవిష్యత్తు దృష్ట్యా తల్లి తండ్రులలో ఎవరో ఒకరు వీటికి తప్పక హాజరై బిడ్డ భవిష్యత్తు మెరుగుపడేలా చూడాలి.