కొత్త తల్లులకు చర్మ సంరక్షణ అవసరం!

స్ట్రెచ్ మార్కులు: హార్మోన్ల మార్పు, గణనీయంగా బరువు తగ్గటం వలన ఇవి ఏర్పడతాయి. అయితే మంచి పోషక విలువలు కల ఆహారం తీసుకుంటూ శరీరంపై జాగ్రత్త వహిస్తే వీటిని నివారించవచ్చు. ఆలివ్, జోజోబా, రోస్ మేరీ లేదా ఆల్మండ్ నూనెలతో ప్రతిదినం మర్దన చేసి కూడా ఈ స్ట్రెచ్ మార్కులను సహజంగా తొలగించవచ్చు.

మొటిమలు: కాన్పు తర్వాత మహిళ తన సౌందర్యంపై శ్రధ్ధ చూపదు. అందుకని చర్మంపై మొటిమలు మొదలైనవి వస్తాయి. నివారణకై చర్మం ఆయిల్ లేకుండా పొడిగా వుండేలా చూసుకుంటూ నీరు పుష్కలంగా తాగండి. పచ్చని ఆకు కూరల ఆహారం చర్మ సంరక్షణలో బాగా సహకరిస్తుంది. ఆరోగ్యకర ఆహారం ఈ సమయంలో వచ్చే మనోవ్యధను కూడా దూరం చేస్తుంది.

చర్మంపై మచ్చలు: ముక్కు చుట్టూ బుగ్గల ఎముకల చర్మం, పై పెదవులు, నుదురు, మెడ, పొట్ట భాగాలలో నల్లని మచ్చలు ఏర్పడతాయి. సాధారణంగా కొద్ది నెలలలో ఈ మచ్చలు వాటంతటవే పోతాయి. అయినప్పటికి ఇవి త్వరగా పోవాలంటే లేదా పెరగకుండా వుండాలంటే ఎండ వేడి పడకుండా చూసుకోవాలి. ఫోలిక్ యాసిడ్ అధికంగా గల ఆహార పదార్ధాలు తినాలి.

చర్మం దద్దుర్లు: ఈస్ట్రోజన్ స్ధాయి తగ్గటం వలన చర్మంపై దద్దుర్లు వస్తాయి. చర్మాన్ని క్రీములు రాయటం ద్వారా తేమగా వుంచండి. రోజుకు రెండు సార్లు ఈ క్రీములు రాస్తే దద్దుర్లు తగ్గుతాయి. చర్మంలో తేమ నిలువచేయటానికిగాను సరళమైన హెర్బల్ సోప్ వాడండి.

డెలివరీ అయిన తర్వాత మహిళలలో ఈ చర్మ సంబంధిత సమస్యలు వస్తాయి. విటమిన్లు, మినరల్స్, ఇతర పోషకాలు కల సంపూర్ణ ఆహారం తీసుకుంటూ, వైద్యుని సలహా మేరకు చిన్నపాటి వ్యాయామాలు చేస్తూ వుంటే మహిళలకు పూర్వపు సౌందర్యం మరోమారు చేకూరుతుందనటంలో సందేహం లేదు.