పాలు పట్టడం తల్లికి ప్రయోజనకరమే!

By B N Sharma

Published: Saturday, May 5, 2012, 12:09 [IST]

Advantages of Breastfeeding for A Mother!

అమెరికాలో తల్లులు చాలామంది తమ పాలను బిడ్డకు ఇస్తున్నప్పటికి అతి త్వరగా వాటిని బిడ్డకు నిలిపేస్తున్నారని ఒక తాజా పరిశోధన వెల్లడించింది. తల్లిపాలు బిడ్డకు శ్రేష్టమైనవి. బిడ్డకు తేలికగా జీర్ణం అయ్యే అన్ని పోషకాలు వాటిలో వుంటాయి. బిడ్డకు రోగ నిరోధక శక్తిని ఇవ్వటమే కాక, తల్లి కూడా ఆరోగ్యాన్ని పొందేలా చేస్తాయి. తల్లియొక్క స్తనాలు పాలు పడుతూంటే త్వరగా తమ పూర్వపు రూపాన్ని సంతరించుకుంటాయి. ఆమెలో అధికంగా గతంలో బిడ్డ కొరకు చేరుకున్న పోషకాలు, ఆహారాలు వంటివి పాలద్వారా శరీరం వెలుపలకు వచ్చి ఆమె కాన్పు తర్వాత తన పూర్వపు శారీరక రూపాన్ని త్వరగా పొందే అవకాశం కూడా వుంటుంది.

సాధారణంగా తల్లులు తమ పిల్లలకు కనీసం ఆరు నెలలు వచ్చేటంతవరకు తల్లిపాలు పట్టాలి. అంతకు మించి, బిడ్డకు ఒక సంవత్సరం వరకు కూడా పట్టినప్పటికి ఆమె ఆరోగ్యానికి ఎటువంటి హాని కలుగదు. తల్లిపాలలో లభించే పోషక విలువలు బిడ్డకు మరే ఇతర పాలలోను లేదా పోషకాహారాలలోను లభించదు. తల్లిపాలు బిడ్డ ఎదుగుదలకు బాగా సహకరిస్తాయి. వేరుగా గేదె పాలు లేదా ఆవు పాలు లేదా బాటిల్ పాలు ఏవి పట్టినప్పటికి బిడ్డకు అవసరమైన కొవ్వు, ఇతర పోషకాలు సమపాళ్ళలో లభించవు.

అమెరికా ప్రభుత్వ లక్ష్యం మేరకు ప్రసవించే వారిలో 50 శాతం మంది తల్లిపాలు బిడ్డలకివ్వాలని వుండగా, 77 శాతం మంది తల్లిపాలు ఇవ్వటమైతే మొదలుపెడుతున్నారు కానీ బిడ్డకు ఆరు నెలల వయసు లోపే 36 శాతం మంది వాటిని నిలుపుతున్నారని పరిశోధన చెపుతోంది. అయితే, అమెరికన్ అసోసియేషన్ ఆఫ్ పేడియాట్రిషియన్స్ సంస్ధ బిడ్డలకు పూర్తిగా ఒక సంవత్సరం వయసు వచ్చే వరకు తల్లిపాలు ఇవ్వాలనిసిఫార్సు చేస్తోంది. ప్రభుత్వ చేసే ప్రచారం తల్లులు మొదలు పెట్టే వరకే పనిచేస్తోందని తర్వాత దానిని కొనసాగించే విధంగా ప్రభుత్వం చర్యలు చేపట్టటంలేదని వారు తెలిపారు.

బిడ్డలు అనారోగ్యానికి గురై మరణించిన వారిలో చాలామంది తల్లిపాలు త్వరగా నిలిపివేసిన కారణంగానే మరణాలు సంభవించినట్లుగా కూడా ఈ సర్వే వెల్లడించింది. కనుక తల్లులు, కనీసం బిడ్డకు ఒక సంవత్సరం వయసు వచ్చే వరకు తమ పాలను పడుతూ పోషణ చేయాలి. తల్లులు ఉద్యోగస్తులైనప్పటికి వారు తమ ఉద్యోగాలకు వెళ్ళే ముందే తగిన ఏర్పాట్లు బిడ్డకు చేయాలి. నేటి రోజులలో తల్లుల స్తనాలనుండి పాలు త్వరగా తీయటానికి మెషీన్లు కూడా వస్తున్నాయి. వాటిని ఉపయోగించి తల్లి ముందస్తుగా బిడ్డకవసరమైన పాలను రిఫ్రిజిరేటర్ వంటి సాధనాలలో నిలువవుంచి తాను ఇంటినుండి దూరంగా వున్నప్పటికి బిడ్డకు పట్టే ఏర్పాట్లు చేయవచ్చు.