గర్భిణీ స్త్రీకి మేలు చేసే స్తనాల మర్దన!

Pre Natal

oi-Nageswara

By B N Sharma

Published: Thursday, September 22, 2011, 15:53 [IST]

ప్రెగ్నెన్సీ సమయంలో స్త్రీల రొమ్ములలో గణనీయమైన మార్పులు వస్తాయి. హార్మోన్ల స్ధాయి పెరగటంతో స్తనాలు ఉబ్బుతాయి. స్తనాలు మెత్తబడటం, చను మొనలు నల్లబడటం, పెద్దవి కావటం గట్టిగా పసుపుగా వున్న ద్రవం బయటకు రావటం మొదలైన సమస్యలు గర్భవతి స్త్రీకి అసౌకర్యాన్ని కలిగిస్తూంటాయి. ఆమెకు సమస్యలనుండి కొంత ఊరట కలగాలంటే స్తనాల మర్దన కొంత మేలు చేస్తుంది. కణ జాలం కొంతమేర గట్టిపడుతుంది. స్తనాలు సహజత్వాన్ని సంతరించుకుంటాయి. విషపూరిత పదార్ధాలు బయటకు పోయి అక్కడి కణాలకు పోషణ లభిస్తుంది. ఈ సమయంలో సరి అయిన సైజు గల బ్రా ఒకటి వేసుకుంటే స్తనాల నొప్పులు కొంతవరకు తగ్గే అవకాశం వుంది.

స్త్రీ స్తనాల కు మర్దన ఎలా చేయాలనేది పరిశీలిస్తే.....
ప్రధానంగా చాలా నెమ్మదిగా మునివేళ్ళతో వీటికి ఒత్తిడి కలిగించాలి. వేళ్ళ కొనలకంటే కూడా కొనలతో పట్టుకొన్న ప్యాడ్స్ తో అతి మెల్లగా ఒత్తిడి కలిగించాలి. స్తనాలలోని ద్రవాలను బయటకు పంపేటందుకు కిందనుండి చనుమొనలకు అతి మెల్లగా ఒత్తిడి కలిగించాలి. బ్రెస్ట్ మధ్యనుండి మొదలుపెట్టి మొనవైపుకు కొన్ని ఒత్తిడులు కలిగిస్తే అందులోని ద్రవం మెల్లగా బయటకు వస్తుంది. నొప్పులున్న స్తనాలను వేళ్ళతో గుండ్రంగా మర్దన చేయండి. కింది భాగం నుండి పైకి మర్దన చేయాలి. నొప్పులున్న భాగాలకు అతి మెల్లగా మరింత మర్దన చేయాలి. స్తన భాగాలు పూర్తయ్యేంతవరకు మాసేజ్ చేస్తూనే వుండాలి. మర్దన తర్వాత కూడా నొప్పులనిపిస్తే, కంప్రెసర్ తో ఒత్తిడి కలిగించవచ్చు.

స్తనాలపై అరచేతులను దిగువదిశలో వుంచండి. అరచేతులను క్రింది దిశగా కదపండి. ఇపుడు వేళ్ళు స్తనాల పక్కలకు ఒత్తిడి కలిగిస్తాయి. చనుమొనలను ముట్టుకోకండి. వాటికి ఒత్తిడి కలిగిస్తే స్తనాల ఆకారం మారే అవకాశం వుంది. మర్దన చేస్తూ వుంటే, క్రమేణా వేడిపుడుతుంది. ఈ వేడి మర్దన చేసిన భాగాలలో రక్త సరఫరా బాగా సాగుతోందని తెలియజేస్తుంది. మాసేజ్ క్రమం తప్పకుండా ప్రతిదినం చేయించుకుంటే చక్కటి ఫలితాలుంటాయి. మాసేజ్ స్నానం తర్వాత చేయించుకుంటే స్తనాలు కొంత మెత్తపడి తక్కువ ఒత్తిడికే మంచి ఫలితం రాగలదు. అవసరపడితే రోజుకు రెండు సార్లు చేసుకుంటే గర్భిణీ స్త్రీ ఎంతో తేలికగా భావిస్తుంది.