ప్రసవం నాటికి పురుషుడి అవసరం?

By B N Sharma

Published: Thursday, July 19, 2012, 9:14 [IST]

ఒక్కసారి గర్భం ధరిస్తే చాలు అప్పటి వరకు గల జంటల ఆనందోత్సాహాలు మరో మలుపు తీసుకుంటాయి. కుటుంబంలో మార్పులకు రంగం సిద్ధం అవుతుంది. ఆరోగ్య మార్పులతో సహా ఖర్చు పరంగా తాము ఉండే నివాసం లేదా ఇల్లు నుండి పురుషుడి ఆదాయ వ్యయాల వరకు గణనీయ మార్పులు, చోటు చేసుకుంటాయి. గర్భవతి అవ్వాలని కుటుంబాన్ని పెంచుకోవాలనీ నిర్ణయించుకుంటే ముందుగా మీరు మానసికంగా సిద్ధపడాలి. అదే రకంగా మీ పురుషుడు కూడా అందుకు సిద్ధ పడాలి. భార్య గర్భవతి అవుతోందంటే పురుషులు సైతం కొంత ఆందోళన చెందుతారు.
దీనికిగాను పురుషుడిని కూడా మహిళ అన్ని రకాలుగా కొంతవరకు సిద్ధం చేయాలి. భాధ్యతలు పెరుగుతున్నాయని భావించే అతనిలో విశ్వాసం పెంచాలి. బిడ్డ పుట్టే సమయానికి కొంత సొమ్ము కూడబెట్టమని తెలుపాలి. వీటికి అతను సిద్ధంగా వుంటే మీ ప్రెగ్నెన్సీ అతను ఆమోదించినట్లే. ఇకపై మీ అనుబంధం మరింత గట్టిపడుతుందని తెలుపాలి. బిడ్డ కలగటమనేది భవిష్యత్తుకు మంచిదని బిడ్డలు ముసలి వయసులో సహకారంగా వుంటారని తెలుపాలి.

బిడ్డ పుట్టేముందు మీరు మానసికంగా, శారీరకంగా ఎలా సిద్ధం అవుతారో, అతనిని కూడా అదే విధంగా తయారు చేయాలి. బేబీపై అతను కూడా శ్రధ్ధ వహించేలా చేయాలి. అందుకు తగిన అవసరాలను సమకూర్చేలా చేయాలి. గర్భం ధరించాలంటే మీరు కూడా అధిక శ్రమ లేకుండా బిడ్డను కనదగిన వయసేనా అనేది నిర్ణయించుకోవాలి. కొద్ది రోజులు మీరు మీ పురుషుడు కలసి ఇంట్లో ఒక పిల్లాడు వున్నట్లుగానే ఊహించుకోండి. అదే రకంగా ప్రవర్తించి ఆనందించండి. దానితో కొంతవరకు భయాలు తీరిపోతాయి.

మీరు సిద్ధపడి, మీ పురుషుడిని ఈ విధంగా సిద్ధం చేసిన తర్వాత బిడ్డ పుట్టే ముందుగానే మీరిరువురూ తగిన పరీక్షలో చేయించుకోవాలి. ఈ పరీక్షలు పుట్టబోయే బిడ్డకు ఏ రకమైన ఇన్ఫెక్షన్ లేదా వ్యాధులు కలుగకుండా చర్యలు తీసుకోవడంలో తోడ్పడతాయి. కనుక డాక్టర్ ను సంప్రదించి అవసరమైన పరీక్షలు చేయించుకోండి. ఈ రకమైన జాగ్రత్తలు పురుషుడికి కూడా అవసరమైనప్పటికి, అతనిని అధికంగా బలవంతపెట్టకండి. ఇరువురికి ఈ విషయంలో ఒకే రకమైన అవగాహన, అంగీకారం వుండాలి.