ఎండల తీవ్రతతో మహిళల ఆరోగ్యంపై ప్రభావం… గర్భిణులు ఈ జాగ్రత్తలు అస్సలు మిస్ అవ్వకండి!

తెలుగు రాష్ట్రాల్లో ఎండలు మండిపోతున్నాయి. అటు తెలంగాణ, ఇటు ఆంధ్రప్రదేశ్‌లో భానుడి భగభగలతో పాటు ఉక్కపోత జనాన్ని ఉక్కిరిబిక్కిరి చేస్తోంది. ఈ వాతావరణ మార్పులు ముఖ్యంగా మహిళల ఆరోగ్యంపై తీవ్ర ప్రభావం చూపుతాయని భారత వాతావరణ శాఖ (IMD) హెచ్చరిస్తోంది. పీరియడ్స్ సమయంలో ఉన్నవారు, గర్భిణులు ఈ టైమ్‌లో చాలా జాగ్రత్తగా ఉండాలని వైద్యులు సూచిస్తున్నారు.

ఎండలు పెరగడం వల్ల పీరియడ్స్ సమయంలో వచ్చే కడుపునొప్పి (Cramps) మరింత ఎక్కువయ్యే అవకాశం ఉంది. కొందరికి తీవ్రమైన నీరసం వల్ల కళ్లు తిరిగి పడిపోయే ప్రమాదం కూడా ఉంటుంది. ఇక గర్భిణుల విషయానికొస్తే.. విపరీతమైన వేడి వల్ల బ్లీడింగ్ (Spotting) లేదా నెలలు నిండకుండానే ప్రసవం అయ్యే రిస్క్ ఉంటుంది. అందుకే శరీరాన్ని చల్లబరుచుకోవడం చాలా ముఖ్యం. ముఖ్యంగా మధ్యాహ్నం పూట ఎండలోకి వెళ్లకపోవడమే మంచిదని నిపుణులు చెబుతున్నారు.

తెలంగాణ, ఆంధ్రప్రదేశ్‌లో ఎండల పరిస్థితి ఇలా ఉంది

ఈ ఎండల నుంచి తట్టుకోవాలంటే హైడ్రేటెడ్‌గా ఉండటం అన్నిటికంటే ముఖ్యం. మహిళలు తరచుగా ఓఆర్ఎస్ (ORS), ఉప్పు కలిపిన నిమ్మరసం తాగుతూ ఉండాలి. ఒకేసారి భారీగా తినకుండా.. కొద్దికొద్దిగా తేలికపాటి ఆహారం తీసుకోవాలి. తాజా పండ్లు, నీటి శాతం ఎక్కువగా ఉండే కూరగాయలు తింటే శరీరానికి కావాల్సిన పోషకాలు అందడమే కాకుండా శక్తి కూడా లభిస్తుంది.

ఉక్కపోత వల్ల మహిళల్లో యూరినరీ ట్రాక్ట్ ఇన్ఫెక్షన్ (UTI) వచ్చే ఛాన్స్ ఎక్కువగా ఉంటుంది. కాబట్టి వ్యక్తిగత పరిశుభ్రత పాటించడంతో పాటు, గాలి ఆడే కాటన్ దుస్తులనే ధరించాలి. గర్భిణులు తమ ఆరోగ్యాన్ని ఎప్పటికప్పుడు గమనించుకోవాలి. ఏమాత్రం నీరసంగా అనిపించినా లేదా బ్లీడింగ్ కనిపిస్తున్నా వెంటనే డాక్టర్‌ను సంప్రదించడం క్షేమకరం.

ఆహారం విషయంలో కూడా కొన్ని మార్పులు చేసుకోవాలి. షుగర్ ఎక్కువగా ఉండే కూల్ డ్రింక్స్‌కు దూరంగా ఉండాలి. ఎలక్ట్రోలైట్స్ బ్యాలెన్స్ కోసం నిమ్మరసం బెస్ట్ ఆప్షన్. పుచ్చకాయ, సిట్రస్ పండ్లు తీసుకోవడం వల్ల విటమిన్లు అందడమే కాకుండా శరీరం చల్లగా ఉంటుంది. వాతావరణం మారుతున్న సమయంలో ఇవి ఎంతో మేలు చేస్తాయి.

గర్భిణులు, మహిళల కోసం అత్యవసర సూచనలు

ఒకవేళ విపరీతమైన బ్లీడింగ్ అయినా, కడుపునొప్పి ఆగకపోయినా, కడుపులో బిడ్డ కదలికలు తగ్గినట్లు అనిపించినా అస్సలు ఆలస్యం చేయకుండా ఆసుపత్రికి వెళ్లాలి. అత్యవసర పరిస్థితుల్లో వెంటనే 108 అంబులెన్స్‌కు కాల్ చేయాలి. అలాగే వైద్య సలహాల కోసం ప్రభుత్వం అందిస్తున్న 104 హెల్ప్‌లైన్ నంబర్‌ను కూడా సంప్రదించవచ్చు.

ఎండల నుంచి రక్షణ పొందడానికి నీడ పట్టున ఉండటం, తేలికపాటి ఆహారం తీసుకోవడం వంటి చిన్న చిన్న జాగ్రత్తలు పెద్ద ప్రమాదాల నుంచి కాపాడతాయి. వాతావరణం ఎప్పుడు ఎలా మారుతుందో తెలియని పరిస్థితి ఉంది కాబట్టి, మహిళలు తమ ఆరోగ్యం పట్ల అప్రమత్తంగా ఉండటం చాలా అవసరం. అప్పుడే ఈ ఎండలను తట్టుకుని ఆరోగ్యంగా ఉండగలరు.