పకోడీలు, బజ్జీలు బోర్ కొట్టాయా? అయితే ఈ కరకరలాడే మునగకాయ స్నాక్ ట్రై చేయండి!

సాయంత్రం అవ్వగానే వేడి వేడి టీతో పాటు కరకరలాడే స్నాక్ ఏదైనా తినాలనిపించడం సహజం. ఇంట్లో ఉన్న పదార్థాలతోనే రోజూ చేసుకునే పకోడీలు, బజ్జీలు, శాండ్‌ విచ్‌ లకు బదులుగా ఈసారి కాస్త కొత్తగా ట్రై చేయాలనుకుంటే..క్రిస్పీ మునగకాయ స్నాక్ మీకు బెస్ట్ ఛాయిస్.

సాధారణంగా మునగకాయ అనగానే మనకు సాంబార్ లేదా కూర మాత్రమే గుర్తొస్తాయి. కానీ, సరైన మసాలాలు దట్టించి ఇలా స్నాక్‌ లా చేస్తే దాని రుచి అమోఘంగా ఉంటుంది.

మునగకాయ స్నాక్ తయారీకి కావలసిన పదార్థాలు

మునగకాయలు - 2
శనగపప్పు - 50 గ్రాములు
పచ్చి బియ్యం - అర కప్పు
పచ్చిమిర్చి - 2
జీలకర్ర పొడి - 1 టీస్పూన్
ధనియాల పొడి - 1 టీస్పూన్
ఆమ్చూర్ పొడి - 1/2 టీస్పూన్
ఉప్పు - రుచికి సరిపడా
నూనె - వేయించడానికి (సుమారు 4 టేబుల్ స్పూన్లు)
కొత్తిమీర - కొద్దిగా

టేస్టీ అండ్ క్రంచీ స్నాక్ ..కరకరలాడే శనగపిండి మసాలా పల్లీలు ఇలా చేసుకోండి

మునగకాయ స్నాక్ తయారీ విధానం

-ముందుగా మునగకాయలను శుభ్రంగా కడిగి, సుమారు 2 అంగుళాల పొడవుండేలా ముక్కలుగా కట్ చేసుకోవాలి. ఒక గిన్నెలో కొద్దిగా నీళ్లు తీసుకుని ఈ ముక్కలను వేసి ఉడికించాలి. ముక్కలు మరీ మెత్తబడిపోయి ఆకారం కోల్పోకుండా, సగం ఉడికేలా చూసుకోవాలి. ఆ తర్వాత నీటిని వడకట్టి ముక్కలను పక్కన పెట్టుకోండి.

-ఈ స్నాక్‌ కు అసలైన రుచినిచ్చేది పైన వేసే కోటింగే. దీనికోసం శనగపప్పు, బియ్యాన్ని ఒక 10 నిమిషాల పాటు నీటిలో నానబెట్టండి. ఆ తర్వాత నీటిని వంపేసి, మిక్సీ జార్‌ లో నానబెట్టిన పప్పు, బియ్యంతో పాటు పచ్చిమిర్చి, జీలకర్ర పొడి, ధనియాల పొడి, ఆమ్చూర్ పొడి, తగినంత ఉప్పు వేసి మెత్తని పేస్ట్‌లా రుబ్బుకోవాలి. ఈ పిండి మరీ నీళ్లలా పల్చగా లేదా మరీ గట్టిగా ఉండకూడదు.

-ఇప్పుడు స్టవ్ మీద పాన్ పెట్టి నూనె వేడి చేయండి. ఉడకబెట్టిన మునగకాయ ముక్కలను తీసుకుని, రుబ్బి పెట్టుకున్న మసాలా పిండిలో బాగా ముంచండి. పిండి ముక్కకు అన్ని వైపులా దట్టంగా పట్టేలా చూసుకుని కాగుతున్న నూనెలో వేయండి.

-మంటను మీడియంలో ఉంచి, ముక్కలు లేత బంగారు రంగులోకి మారి కరకరలాడే వరకు అటూ ఇటూ తిప్పుతూ వేయించుకొని ప్లేట్ లోకి తీసుకోండి. అంతే మునగకాయ స్నాక్ రెడీ.

-పైన కొద్దిగా కొత్తిమీర చల్లుకుని, గ్రీన్ చట్నీ లేదా టొమాటో కెచప్‌ తో వేడివేడి టీతో కలిపి ఆస్వాదించండి.