దొండకాయ ఉల్లికారం ఇలా చేశారంటే..వద్దన్న వాళ్లే మళ్లీ మళ్లీ అడిగి తినడం గ్యారెంటీ!

సాధారణంగా దొండకాయ కూర అనగానే చాలామంది పెద్దగా ఆసక్తి చూపించరు. కానీ, ఒక్కసారి ఘాటైన మసాలాలతో దొండకాయ ఉల్లికారం చేసి పెట్టి చూడండి.. వద్దన్న వాళ్లే మళ్లీ మళ్లీ అడిగి మరీ తింటారు. కరకరలాడే దొండకాయ ముక్కలకు, ఉల్లిపాయ,వెల్లుల్లి ఘాటు తోడైతే ఆ మజాయే వేరు.

వేడి వేడి అన్నంలో కొద్దిగా నెయ్యి వేసుకుని ఈ కూర కలుపుకుని తింటుంటే.. ఆహా అమృతంలా అనిపిస్తుంది. ఘుమఘుమలాడే ఈ అద్భుతమైన వంటకాన్ని ఎలా తయారు చేయాలో చూడండి.

కావాల్సిన పదార్థాలు

లేత దొండకాయలు - 250 గ్రాములు
ఉల్లిపాయలు - 3
పచ్చి శనగపప్పు - 1 టీస్పూన్
మెంతులు - అర టీస్పూన్
మిరియాలు - 1 టీస్పూన్
ధనియాలు - 1 టేబుల్ స్పూన్
వెల్లుల్లి రెబ్బలు- 10 నుండి 12
జీలకర్ర - 1 టీస్పూన్
ఉప్పు - రుచికి సరిపడా
పసుపు - అర టేబుల్ స్పూన్
కారం - ఒకటిన్నర టేబుల్ స్పూన్
నూనె - 4 టేబుల్ స్పూన్లు
కొత్తిమీర - కొద్దిగా

కేవలం పచ్చి బియ్యం, బంగాళదుంప ఉంటే చాలు.. టేస్టీ రైస్ పాప్‌ కార్న్ రెడీ!

తయారీ విధానం

-ముందుగా లేత దొండకాయలను శుభ్రంగా కడిగి, పొడవుగా చీలికల్లా కోసి పెట్టుకోవాలి. పొడవుగా కోయడం వల్ల మసాలా ముక్కల లోపలి వరకు వెళ్లి రుచిగా ఉంటుంది.

-ఈ కూరకి అసలైన ప్రాణం మసాలాయే. ఒక చిన్న పాన్ తీసుకుని అందులో పచ్చి శనగపప్పు, మెంతులు, మిరియాలు, ధనియాలు, జీలకర్ర వేసి సన్నని మంట మీద దోరగా వేయించుకోవాలి. మంచి సువాసన వస్తున్నప్పుడు స్టవ్ ఆఫ్ చేసి చల్లారనివ్వాలి.

-ఇప్పుడు ఒక మిక్సీ జార్ తీసుకుని.. అందులో వేయించుకున్న దినుసులు, తరిగి పెట్టుకున్న ఉల్లిపాయ ముక్కలు, వెల్లుల్లి రెబ్బలు, ఉప్పు, పసుపు, కారం వేసి మెత్తని పేస్ట్‌లా గ్రైండ్ చేసుకోవాలి. నీళ్లు పోయాల్సిన అవసరం లేదు, ఉల్లిపాయలోని తడి సరిపోతుంది.

-ఇప్పుడు స్టవ్ మీద మందపాటి కడాయి పెట్టి 4 టేబుల్ స్పూన్ల నూనె వేడి చేయాలి. నూనె వేడెక్కాక దొండకాయ ముక్కలను వేసి దోరగా వేయించాలి. దొండకాయలు మెత్తబడి, కొద్దిగా గోల్డెన్ బ్రౌన్ కలర్ వచ్చేంత వరకు ఓపిగ్గా వేయించుకుంటే ముక్కలు కరకరలాడుతూ భలే రుచిగా ఉంటాయి.

-దొండకాయ ముక్కలు బాగా వేగిన తర్వాత.. ముందుగా గ్రైండ్ చేసి పెట్టుకున్న ఉల్లికారం పేస్ట్‌ ను అందులో వేయాలి. మంటను సిమ్‌ లో ఉంచి, ఈ మసాలా అంతా దొండకాయ ముక్కలకు పట్టేలా నెమ్మదిగా కలపాలి. ఉల్లిపాయలోని పచ్చివాసన పోయి, కూరలో నుండి నూనె పైకి తేలేవరకు సుమారు 7-10 నిమిషాల పాటు వేయించుకోవాలి.

-కూర అంతా దగ్గరపడి, కమ్మటి వాసన వస్తున్నప్పుడు సన్నగా తరిగిన కొత్తిమీరను పైన చల్లుకుని ఒకసారి బాగా కలిపి స్టవ్ ఆఫ్ చేసుకోవాలి.

-అంతే దొండకాయ ఉల్లికారం రెడీ.