ఇడ్లీ, దోశలు కాదు..జుట్టు రాలడం తగ్గించి, రోగనిరోధక శక్తి పెంచే సూపర్ హెల్తీ బ్రేక్‌ ఫాస్ట్ కరివేపాకు ఉప్మా..

ఉప్మా పేరు చెప్పగానే కొందరు ముఖం చిట్లిస్తారు, మరికొందరు లొట్టలేసుకుని మరీ తింటారు. మీరు ఉప్మాను చూసి ఆమడ దూరం పరుగెత్తే వారిలో ఒకరైతే ఈ కరివేపాకు ఉప్మా రెసిపీ ఖచ్చితంగా మీ మనసును మార్చేస్తుంది. ఒకవేళ మీరు ఉప్మా ప్రియులైతే.. ఈ స్పెషల్ కరివేపాకు వెర్షన్ మీకు మరింతగా నచ్చుతుంది. ఘుమఘుమలాడే నెయ్యి, కరివేపాకు సువాసనలతో ఈ ఉప్మా రుచి అద్భుతంగా ఉంటుంది.

కరివేపాకు ఉప్మా తయారీకి కావాల్సిన పదార్థాలు

నెయ్యి - 1 టేబుల్ స్పూన్
జీలకర్ర - 1 1/2 టీస్పూన్
మిరియాలు - 1 1/2 టీస్పూన్
కరివేపాకు - 2 కప్పులు (తాజావి)
ఉప్మా తయారీకి:
వేయించిన బొంబాయి రవ్వ (సూజీ) - 1 1/2 కప్పులు
నెయ్యి - 1 టేబుల్ స్పూన్
ఆవాలు - 1/2 టీస్పూన్
ఇంగువ - చిటికెడు
మినపప్పు - 1 టీస్పూన్
పచ్చి శనగపప్పు - 1 టీస్పూన్
జీడిపప్పు - 4 లేదా 5 (సగానికి విరిచినవి)
ఎండుమిర్చి - 3 నుండి 4
అల్లం - 1 టీస్పూన్ (సన్నగా తరిగినది)
పచ్చిమిర్చి - 1 లేదా 2 (తరిగినవి)
ఉల్లిపాయ - 1 (మీడియం సైజు, సన్నగా తరిగినది)
కరివేపాకు - 1 లేదా 2 రెమ్మలు
ఉప్పు - రుచికి సరిపడా
నీళ్లు - ఉప్మా ఉడకడానికి తగినన్ని
నెయ్యి - చివరలో వేయడానికి కొద్దిగా

కరివేపాకు ఉప్మా తయారీ విధానం

-ముందుగా స్టవ్ వెలిగించి ఒక పాన్ పెట్టుకోండి. అందులో ఒక టేబుల్ స్పూన్ నెయ్యి వేసి వేడి చేయండి. నెయ్యి కరిగాక జీలకర్ర, మిరియాలు, రెండు కప్పుల కరివేపాకు వేసి వేయించండి. కరివేపాకు ఆకులు కరకరలాడే వరకు (క్రిస్పీగా) వేయించి, స్టవ్ కట్టేయండి. ఇది పూర్తిగా చల్లారాక మిక్సీలో వేసి మెత్తటి పొడిలా గ్రైండ్ చేసి పక్కన పెట్టుకోండి.

-ఇప్పుడు అదే పాన్‌లో లేదా వేరొక కడాయిలో మరో టేబుల్ స్పూన్ నెయ్యి వేడి చేయండి. ఇందులో ఆవాలు, చిటికెడు ఇంగువ, మినపప్పు, శనగపప్పు, జీడిపప్పు, ఎండుమిర్చి వేసి దోరగా వేయించండి.

-ఆ తర్వాత సన్నగా తరిగిన అల్లం, పచ్చిమిర్చి, ఉల్లిపాయ ముక్కలు మరియు కొద్దిగా కరివేపాకు వేసి ఉల్లిపాయలు మెత్తబడే వరకు మగ్గనివ్వండి.
ఉల్లిపాయలు మగ్గిన తర్వాత, ఉప్మాకు సరిపడా నీళ్లు (సుమారు 3 కప్పులు) పోసి మరగనివ్వండి. నీళ్లు మరుగుతున్నప్పుడు ముందుగా మిక్సీ పట్టి పెట్టుకున్న 'కరివేపాకు పొడిని' వేసి కలపండి. అలాగే రుచికి సరిపడా ఉప్పు వేయండి.

-ఇప్పుడు మంటను సిమ్‌లో పెట్టి, వేయించి పెట్టుకున్న రవ్వను కొద్దికొద్దిగా పోస్తూ ఉండలు కట్టకుండా గరిటెతో నిరంతరం కలుపుతూ ఉండాలి.
రవ్వ నీళ్లని పూర్తిగా పీల్చుకుని దగ్గరపడిన తర్వాత స్టవ్ ఆఫ్ చేయండి. పైన మరో టీస్పూన్ నెయ్యి వేసి, మూత పెట్టి ఒక 5 నిమిషాల పాటు అలాగే వదిలేయండి. ఇలా చేయడం వల్ల ఉప్మా పొడిపొడిగా, మంచి సువాసనతో వస్తుంది.

-అంతే ఘుమఘుమలాడే వేడివేడి కరివేపాకు ఉప్మా రెడీ. దీనిని పల్లీ-శనగపప్పు చట్నీతో వడ్డించి తింటే ఆ రుచే వేరు.

ఆరోగ్య ప్రయోజనాలు

కరివేపాకు: ఇందులో ఐరన్, ఫోలిక్ యాసిడ్, విటమిన్ ఏ, సి, మరియు బి పుష్కలంగా ఉంటాయి. ఇది జుట్టు రాలడాన్ని తగ్గించడంతో పాటు, కంటి చూపును మెరుగుపరుస్తుంది. మధుమేహాన్ని అదుపులో ఉంచుతుంది.

జీలకర్ర, మిరియాలు: ఇవి జీర్ణక్రియను మెరుగుపరచడమే కాకుండా, శరీరంలో రోగనిరోధక శక్తిని పెంచుతాయి. జలుబు, దగ్గు వంటి ఇన్ఫెక్షన్ల నుండి కాపాడతాయి.

నెయ్యి: ఇందులో ఉండే ఆరోగ్యకరమైన కొవ్వులు (Healthy Fats) ఎముకల బలానికి, మెదడు చురుకుదనానికి చాలా మేలు చేస్తాయి.

ఉదయం అల్పాహారంగా ఈ కరివేపాకు ఉప్మాను తీసుకుంటే, మీ శరీరానికి కావలసిన పోషకాలు అందడమే కాకుండా పొట్ట నిండిన భావన రోజంతా ఉంటుంది.