వంద రకాల టమాటా చట్నీలలో ఆరోగ్యానికి, రుచికి బెస్ట్ ఇదే..టమాటా మిరియాల చట్నీ చేసుకోండిలా..

మన ఇళ్లలో సాధారణంగా ఉదయం పూట లేదా సాయంత్రం వేళల్లో ఇడ్లీ, దోశ ప్రధాన బ్రేక్ ఫాస్ట్ గా ఉంటాయి. వీటికి పిండి రుబ్బి పెట్టుకోవడం సులభమే కానీ, దానికి తగిన సైడ్ డిష్ చేయడం రోజూ ఒక సవాలే. నిత్యం ఒకే రకమైన పల్లీల చట్నీ లేదా కొబ్బరి చట్నీ తింటే ఇంట్లో వాళ్లకు కూడా బోర్ కొట్టేస్తుంది. అలాంటి సమయంలో మనకు వెంటనే ప్రత్యామ్నాయంగా గుర్తొచ్చేది టమాటా చట్నీ.

టమాటా చట్నీని వందకు పైగా రకాలుగా తయారు చేయవచ్చని మీకు తెలుసా? అందులో మనం వేసే ఇతర దినుసులను బట్టి దాని రుచి అద్భుతంగా మారుతుంటుంది. అయితే కేవలం రుచికరంగా మాత్రమే కాకుండా, మనకు ఆరోగ్యాన్ని కూడా అందించేలా చట్నీ చేస్తే ఎలా ఉంటుంది? దానికి సరైన సమాధానమే టమాటా మిరియాల చట్నీ. టమాటాలోని పుల్లని రుచికి, మిరియాల ఘాటు తోడైతే ఆ మజాయే వేరు. పైగా మిరియాలు జలుబు, దగ్గును తగ్గించడమే కాకుండా మనలో రోగనిరోధక శక్తిని అద్భుతంగా పెంచుతాయి.

టమాటా మిరియాల చట్నీ తయారీకి కావలసిన పదార్థాలు

బాగా పండిన టమాటాలు - 2
ఎండు మిరపకాయలు - 4
వెల్లుల్లి రెబ్బలు - 5
మినప పప్పు - 1 చెంచా
మిరియాల పొడి - 2 చెంచాలు
వంట నూనె - 3 చెంచాలు
చింతపండు - ఒక చిన్న ముక్క
కొబ్బరి తురుము లేదా పొడి - 2 చెంచాలు
తాలింపుకి నువ్వుల నూనె - 3 చెంచాలు
ఆవాలు - అర చెంచా
కరివేపాకు - కొన్ని ఆకులు
సాంబార్ ఉల్లిపాయలు - 2
ఉప్పు - సరిపడా

టమాటా మిరియాల చట్నీ తయారీ విధానం

-ముందుగా స్టవ్ వెలిగించి ఒక బాండీ పెట్టుకుని, అందులో 3 చెంచాల నూనె వేడి చేయండి.

-నూనె కాస్త వేడెక్కగానే అందులో మినపపప్పు, ఎండు మిరపకాయలు, వెల్లుల్లి రెబ్బలు, మిరియాల పొడి, చిన్న చింతపండు ముక్క వేసి సన్నని మంటపై వేయించండి. పప్పులు దోరగా, బంగారు గోధుమ రంగులోకి మారగానే వీటిని మాడిపోకుండా ఒక గిన్నెలోకి తీసుకుని పక్కన పెట్టుకోండి.

-ఇప్పుడు అదే బాండీలో ముందుగా కట్ చేసి పెట్టుకున్న టమాటా ముక్కలను వేయండి. ముక్కలు త్వరగా మగ్గడానికి కొద్దిగా ఉప్పు చల్లండి. టమాటాలు మెత్తగా అయ్యేలా ఉడికించి స్టవ్ ఆపేయండి. వీటిని పూర్తిగా చల్లారనివ్వాలి.

-ఇప్పుడు ఒక మిక్సీ జార్ తీసుకుని, ముందుగా వేయించి పెట్టుకున్న పప్పుల మిశ్రమాన్ని వేసి గ్రైండ్ చేయండి. ఆ తర్వాత అందులో చల్లారిన టమాటా మిశ్రమాన్ని, రెండు చెంచాల కొబ్బరి తురుమును వేసి మెత్తని పేస్ట్‌ లా రుబ్బుకోవాలి. ఇలా రుబ్బిన చట్నీని ఒక గిన్నెలోకి తీసుకోండి.

-చట్నీకి తాలింపు కోసం ఒక చిన్న పాన్‌ లో 3 చెంచాల నువ్వుల నూనె వేడి చేయండి. నువ్వుల నూనె వాడటం వల్ల చట్నీకి అదనపు రుచి వస్తుంది. అందులో ఆవాలు వేసి చిటపటలాడనివ్వండి. తర్వాత కరివేపాకు, సన్నగా తరిగిన చిన్న ఉల్లిపాయలు వేసి వేయించండి.

-ఉల్లిపాయలు గోధుమ రంగులోకి మారగానే, ఈ తాలింపును ముందుగా సిద్ధం చేసుకున్న చట్నీలో వేసి బాగా కలపండి. చివరగా రుచి చూసుకుని అవసరమైతే ఉప్పు కలుపుకోండి.

-అంతే ఘుమఘుమలాడే, ఎంతో ఆరోగ్యకరమైన టమాటా మిరియాల చట్నీ రెడీ. వేడి వేడి ఇడ్లీ, క్రిస్పీ దోశ, ఊతప్పం, పునుగులు, చివరకు చపాతీల్లోకి కూడా ఇది అమృతంలా ఉంటుంది.