జుట్టు రాలడం తగ్గాలంటే.. వారానికోసారి ఈ కరివేపాకు ఎగ్ రైస్ తినాల్సిందే!..లంచ్ బాక్స్‌ కి బెస్ట్

అన్నం తినేటప్పుడు కరివేపాకు వస్తే దాన్ని తీసి పక్కన పెట్టేయడం మనలో చాలామందికి ఉన్న అలవాటు. పిల్లలైతే కరివేపాకును అస్సలు తినరు. కానీ కరివేపాకులో ఐరన్, విటమిన్లు పుష్కలంగా ఉంటాయి. ఇవి జుట్టు రాలడాన్ని అరికట్టడంతో పాటు కంటి చూపును మెరుగుపరచడంలో అద్భుతంగా సహాయపడతాయి. పోషకాల గని అయిన కరివేపాకును పిల్లలు, పెద్దలు ఎవరూ వదలకుండా ఇష్టంగా తినాలంటే ఏం చేయాలి? దానికి సరైన, రుచికరమైన పరిష్కారమే కరివేపాకు ఎగ్ రైస్.

గుడ్డులోని ప్రొటీన్, కరివేపాకులోని ఐరన్, నెయ్యి కమ్మదనం కలిసి ఈ వంటకాన్ని అమృతంలా మారుస్తాయి. పిల్లల లంచ్ బాక్స్‌ కైనా, బ్యాచిలర్స్ బ్రేక్ ఫాస్ట్‌ కైనా ఇది పర్ఫెక్ట్. మిగిలిపోయిన అన్నంతో కూడా నిమిషాల్లో దీన్ని తయారు చేసుకోవచ్చు.

కరివేపాకు ఎగ్ రైస్ తయారీకి కావాల్సిన పదార్థాలు

లేత కరివేపాకులు - ఒక గుప్పెడు
గుడ్లు - 2
వండిన అన్నం - అర కప్పు
నెయ్యి - 1 లేదా 2 టేబుల్ స్పూన్లు
జీలకర్ర - అర టీస్పూన్
వెల్లుల్లి పేస్ట్ (లేదా సన్నగా తరిగిన వెల్లుల్లి) - అర టీస్పూన్
పచ్చిమిర్చి - 2
పసుపు - చిటికెడు
ఉప్పు - రుచికి సరిపడా
కొత్తిమీర - కొద్దిగా

వేడివేడి అన్నంలోకి అదిరిపోయే దొండకాయ రోటీ పచ్చడి.. ఇలా చేశారంటే ఇక కూరల జోలికి వెళ్లరు.!

కరివేపాకు ఎగ్ రైస్ తయారీ విధానం

-మొదటగా స్టవ్ వెలిగించి ఒక పాన్ పెట్టుకోండి. అందులో శుభ్రం చేసి తడిలేకుండా ఆరబెట్టిన గుప్పెడు కరివేపాకులను వేయండి. నూనె వేయకుండా (డ్రై రోస్ట్) సన్నని మంటపై ఆకులు కరకరలాడేలా వేయించాలి. అవి చల్లారాక, మిక్సీలో వేసి మెత్తని పొడిలా గ్రైండ్ చేసి పక్కన పెట్టుకోండి.

-ఇప్పుడు అదే పాన్‌లో కొద్దిగా నెయ్యి వేసి వేడి చేయండి. నెయ్యి కరిగాక అందులో జీలకర్ర వేసి చిటపటలాడనివ్వాలి. ఆ తర్వాత వెల్లుల్లి పేస్ట్, సన్నగా తరిగిన పచ్చిమిర్చి ముక్కలు వేసి పచ్చివాసన పోయేలా బాగా వేయించండి.

-బాగా వేగిన మిశ్రమాన్ని పాన్‌ లో ఒక పక్కకు నెట్టి, ఖాళీగా ఉన్న వైపు రెండు గుడ్లను పగులగొట్టి వేయండి. గుడ్లు కొద్దిగా ఉడికేవరకు కదపకండి. ఆ తర్వాత నెమ్మదిగా కలుపుతూ, గుడ్డు ముక్కలు కొంచెం పెద్దవిగా తగిలేలా ఆమ్లెట్, బుర్జీ తరహాలో ఫ్రై చేసుకోవాలి. ఇప్పుడు పక్కకు నెట్టిన పోపు మిశ్రమాన్ని, ఎగ్ బుర్జీని అంతా ఒకసారి కలిపేయండి.

-ఈ ఎగ్ మిశ్రమంలో చిటికెడు పసుపు, రుచికి సరిపడా ఉప్పు వేసి బాగా కలపాలి. ఇప్పుడు ముందుగా వండి పెట్టుకున్న పొడిపొడి అన్నాన్ని పాన్‌ లో వేసి మెల్లగా కలపాలి.

-అన్నం వేసిన తర్వాత, ముందుగా గ్రైండ్ చేసి పెట్టుకున్న కరివేపాకు పొడిని అన్నంపై చల్లండి. మంటను మీడియం ఫ్లేమ్‌ లో ఉంచి, నెయ్యి, ఎగ్, కరివేపాకు పొడి అన్నానికి బాగా పట్టేలా రెండు మూడు నిమిషాల పాటు కలుపుతూ టాస్ చేయాలి.

-చివరగా సన్నగా తరిగిన కొత్తిమీరను చల్లుకుని, ఒకసారి బాగా కలిపి స్టవ్ ఆఫ్ చేసుకుంటే చాలు. ఎంతో కమ్మని, ఆరోగ్యకరమైన కరివేపాకు ఎగ్ రైస్ రెడీ.

-వేడి వేడిగా ఈ రైస్‌ ను తింటుంటే, నెయ్యి కమ్మదనం, కరివేపాకు ఘాటైన సువాసన, గుడ్డు రుచి అన్నీ కలిసి మీ నోటికి పండుగలా అనిపిస్తాయి.