బియ్యం, మినప్పప్పు లేకుండానే అటుకులతో అప్పటికప్పుడు క్రిస్పీ మసాలా దోసె..అబ్బబ్బబ్బా అనాల్సిందే!

రోజూ తినే సాధారణ దోసెలతో విసుగు చెందారా? అయితే ఒకసారి పోహా మసాలా దోసె(అటుకుల మసాలా దోసె) ట్రై చేయండి. సాధారణంగా మనం అటుకులను ఉప్మా లేదా సాయంత్రం తినే చిరుతిండి తయారీకి మాత్రమే వాడుతుంటాం. అలాగే దోసె అనగానే బియ్యం, మినప్పప్పు నానబెట్టి, రుబ్బి, రాత్రంతా పులియబెట్టే సుదీర్ఘ ప్రక్రియ గుర్తుకు వస్తుంది. కానీ కేవలం అటుకులతోనే హోటల్ స్టైల్‌ లో కరకరలాడే, ఎంతో రుచికరమైన మసాలా దోసెను క్షణాల్లో తయారు చేసుకోవచ్చని మీకు తెలుసా?

దీని రుచి ఎంత బాగుంటుందంటే, ఒక్కసారి తిన్నారంటే మళ్లీ మళ్లీ చేసుకోవాలనిపిస్తుంది. ఈ రెసిపీలో ఉన్న అతిపెద్ద ప్రత్యేకత ఏమిటంటే, దీనికి పిండిని గంటల తరబడి పులియబెట్టాల్సిన అవసరం అస్సలు లేదు. పోహా మసాలా దోసె ఎలా తయారుచేసుకోవాలో ఇక్కడ చూడండి.

కావలసిన పదార్థాలు

అటుకులు (పోహా): 1 గిన్నె
పెరుగు: 2 టేబుల్ స్పూన్లు
ఉల్లిపాయ: 1
క్యాప్సికమ్: 1
కొత్తిమీర తరుగు: 2 టేబుల్ స్పూన్లు
సాంబార్ మసాలా: 1 టీస్పూన్
బేకింగ్ సోడా: 1 టీస్పూన్
నూనె: 2 టేబుల్ స్పూన్లు
ఉప్పు: రుచికి తగినంత
నీళ్లు: పిండి కలపడానికి అవసరమైనంత

కారంగా, కమ్మగా ఉండే కరివేపాకు చికెన్ రోస్ట్.. ఈ సీక్రెట్ మసాలాతో రుచి డబుల్!

తయారీ విధానం

-ముందుగా ఒక మిక్సీ జార్ తీసుకొని అందులో అటుకులను వేసి, కాస్త గరుకుగా పొడిలా అయ్యేంత వరకు గ్రైండ్ చేసుకోండి. ఆ తర్వాత అందులోకి పెరుగు, కొద్దిగా నీళ్లు పోసి, మెత్తని పిండిలా మళ్లీ గ్రైండ్ చేయండి. ఈ పిండిని ఒక గిన్నెలోకి తీసుకొని, అందులో బేకింగ్ సోడా, రుచికి సరిపడా ఉప్పు వేసి ఉండలు లేకుండా బాగా కలపండి. అంతే దోసె పిండి రెడీ.

-ఇప్పుడు స్టవ్ వెలిగించి దోసె పెనాన్ని వేడి చేయండి. పెనం బాగా వేడెక్కిన తర్వాత, దానిపై కొన్ని నీళ్లు చల్లి, శుభ్రమైన గుడ్డతో తుడవండి. ఇలా చేయడం వల్ల పెనం టెంపరేచర్ సరిగ్గా ఉండి, దోసె అతుక్కోకుండా చక్కగా వస్తుంది.

-ఇప్పుడు గరిటెడు పిండిని పెనం మధ్యలో వేసి, గుండ్రంగా, పలుచగా పరచండి. మంటను మీడియంలో ఉంచి దోసెను ఉడకనివ్వండి. దోసె కొద్దిగా ఉడికినట్లు అనిపించగానే, దానిపై ఘుమఘుమలాడే సాంబార్ మసాలాను చల్లండి. ఆ వెంటనే సన్నగా తరిగిన ఉల్లిపాయలు, క్యాప్సికమ్ ముక్కలు, కొత్తిమీర ఆకులను దోసె అంతటా సమానంగా పరచండి. మీరు కోరుకుంటే మీకు నచ్చిన ఇతర కూరగాయలను కూడా ఇందులో చేర్చుకోవచ్చు.

-ఇప్పుడు దోసె అంచుల చుట్టూ కొద్దిగా నూనె చిలకరించండి. దోసె లేత బంగారు రంగులోకి మారి, కరకరలాడేంత వరకు ఓపికగా కాల్చండి. చక్కగా కాలిన తర్వాత, దోసెను జాగ్రత్తగా మడిచి ఒక ప్లేట్‌ లోకి తీసుకోండి.

-నోరూరించే వేడివేడి పోహా మసాలా దోసె తినడానికి రెడీ. దీనిని కమ్మని కొబ్బరి చట్నీ, టమాటా చట్నీ లేదా వేడివేడి సాంబార్‌ తో కలిపి తింటే అబ్బబ్బబ్బా అనాల్సిందే.