అచ్చం హోటల్ స్టైల్ సాంబార్ కావాలా? అయితే ఈ మసాలాను ఇంట్లోనే చేసుకోండి!

దక్షిణ భారతీయ వంటకాల్లో సాంబార్‌ ది ప్రత్యేక స్థానం. సాంబార్ తయారీ చేస్తుంటే ఇల్లంతా వ్యాపించే ఆ కమ్మని సువాసన, నోరూరించే రుచి అందరికీ ఇష్టమే. అయితే మార్కెట్లో దొరికే రెడీమేడ్ మసాలాల కన్నా, ఇంట్లోనే స్వచ్ఛమైన, సువాసనభరితమైన సాంబార్ మసాలాను తయారుచేసుకోవడం చాలా సులభం, ఆరోగ్యకరం కూడా.

సరైన పద్ధతిలో శుభ్రపరచడం, వేయించడం, చల్లార్చడం, రుబ్బడం, నిల్వ చేయడం అనే ఈ దశలను జాగ్రత్తగా పాటిస్తే, అచ్చం హోటల్ తరహా రుచి, అద్భుతమైన చిక్కదనం మీ సొంతం అవుతాయి.

సాంబార్ మసాలా తయారీకి కావాల్సిన పదార్థాలు

-ధనియాలు
-జీలకర్ర
-మెంతులు
-ఆవాలు
-కరివేపాకు
-ఎండుమిరపకాయలు
-శనగపప్పు
-కందిపప్పు
-నల్ల మిరియాలు
-ఇంగువ

సాంబార్ మసాలా తయారీ విధానం

-ముందుగా కరివేపాకును శుభ్రంగా కడిగి, పల్చటి పత్తి గుడ్డపై బాగా ఆరబెట్టాలి.

-తర్వాత స్టవ్ మీద ఒక మందపాటి బాండీ పెట్టి అందులో ధనియాలు, జీలకర్ర, ఆవాలు, మెంతులు, ఎండు మిరపకాయలు, బాగా ఆరబెట్టిన కరివేపాకు వేయాలి. మంటను సిమ్‌ లో ఉంచి కలుపుతూ వేయించాలి. మసాలాల నుండి కమ్మటి సువాసన వచ్చే వరకు మాత్రమే వేయించాలి.

-మసాలాలతో పాటు కొద్దిగా శనగపప్పు, కందిపప్పు, నల్ల మిరియాలు కూడా వేసి బంగారు రంగు వచ్చేలా వేయించాలి. పప్పులు మాడిపోకుండా నిరంతరం కలుపుతూ ఉండాలి. ఈ పప్పుల కలయిక వల్లే మీ సాంబార్‌ కు మార్కెట్లో కొన్న మసాలా లాంటి చిక్కదనం వస్తుంది.

-మసాలా దినుసులు వేగగానే వెంటనే స్టవ్ ఆఫ్ చేసి, ఒక పొడి పళ్ళెంలోకి తీసుకొని పూర్తిగా చల్లారనివ్వాలి.

-దినుసులన్నీ పూర్తిగా చల్లారిన తర్వాత, వాటిని తడి లేని పొడి మిక్సీ జార్‌ లోకి తీసుకోవాలి. ఇందులోనే కొద్దిగా పసుపు,కొద్దిగా ఇంగువ కలిపి వీటన్నింటినీ మెత్తని పొడిలా రుబ్బుకోవాలి. ఇది ఎంత మెత్తగా ఉంటే సాంబార్‌లో అంత సులభంగా కలిసిపోయి గొప్ప రుచిని ఇస్తుంది. అంతే సాంబార్ మసాలా రెడీ.

-మసాలా తయారు చేయడం ఎంత ముఖ్యమో, దానిని భద్రపరచడం కూడా అంతే ముఖ్యం. గుమగుమలాడే ఈ పొడిని గాలి చొరబడని గాజు లేదా నాణ్యమైన ప్లాస్టిక్ డబ్బాలో నిల్వ చేయాలి. మసాలా తీసేటప్పుడు ఎప్పుడూ పొడిగా ఉన్న చెంచాను మాత్రమే వాడాలి. డబ్బాను ఎండ, వేడి, తేమకు దూరంగా ఉంచాలి.

-ఈ సాంబార్ మసాలా చాలా నెలల పాటు తన తాజాదనాన్ని కోల్పోదు. ప్రతిసారీ మీరు చేసే వంటకానికి రెట్టింపు రుచిని ఇస్తుంది.