నోటికి రుచిగా, ఒంటికి చల్లగా..అన్నం, ఇడ్లీ, దోశ దేనిలోకైనా అదిరిపోయే కీర దోసకాయ పచ్చడి..ఎలా చేసుకోవాలంటే..

ఎండాకాలం రాగానే మనకు ముందుగా గుర్తొచ్చేవి చల్లదనాన్నిచ్చే కూరగాయలు, పండ్లు. అందులో కీర దోసకాయ స్థానం ఎప్పుడూ ప్రత్యేకం. ఇందులో నీటి శాతం, పీచు పదార్థం పుష్కలంగా ఉండటం వల్ల ఎండల తీవ్రతకు డీహైడ్రేషన్ బారిన పడకుండా మనల్ని రక్షిస్తుంది. అయితే సాధారణంగా కీరా దోసకాయ అనగానే చెక్కు తీసి ముక్కలుగా కోసుకుని తినడమో లేదా సలాడ్స్‌ లో వాడటమో చేస్తుంటాం.

కానీ ఎప్పుడైనా కీర దోసకాయతో కమ్మని పచ్చడిని ట్రై చేశారా? వినడానికి కొత్తగా ఉన్నా దీని రుచి మాత్రం అద్భుతంగా ఉంటుంది. అన్నం, ఇడ్లీ, దోశ..ఇలా దేనిలోకైనా అదిరిపోతుంది. పైగా నిమిషాల్లోనే దీన్ని తయారు చేసుకోవచ్చు. సమ్మర్ స్పెషల్ కీర దోసకాయ పచ్చడిని ఎలా చేయాలో ఇక్కడ చూడండి.

కీర దోసకాయ పచ్చడి తయారీకి కావాల్సిన పదార్థాలు

కీరా దోసకాయలు - 4
టమాటాలు - 4
పల్లీలు - 2 టేబుల్ స్పూన్లు
పొట్టు మినప్పప్పు - 3 టేబుల్ స్పూన్లు
పచ్చిమిర్చి - మీ కారానికి తగినన్ని
పసుపు - చిటికెడు
జీలకర్ర - 1 టీస్పూన్
వెల్లుల్లి రెబ్బలు - 10
చింతపండు - కొద్దిగా
ఉప్పు - రుచికి సరిపడా

కీర దోసకాయ పచ్చడి తయారీ విధానం

-ముందుగా తాజా కీర దోసకాయలను శుభ్రంగా కడిగి మీడియం సైజు (ఆలూ క్యూబ్స్ లాగా) ముక్కలుగా కట్ చేసుకోవాలి. అలాగే టమాటాలను కూడా ముక్కలుగా కోసి పక్కన పెట్టుకోవాలి.

-స్టవ్ వెలిగించి పాన్ పెట్టి కొద్దిగా నూనె వేయాలి. నూనె వేడెక్కాక పల్లీలు వేసి వేయించాలి. అవి సగం వేగాక, పొట్టు మినప్పప్పు వేసి దోరగా వేయించి ఒక మిక్సీ జార్‌ లోకి తీసుకోవాలి.

-స్టవ్ మీద పాన్ లో ఉన్న నూనెలో పచ్చిమిర్చి ముక్కలను బాగా వేయించి, వాటిని కూడా మిక్సీ జార్‌ లో వేసుకోవాలి. ఆ తర్వాత పాన్‌ లో కట్ చేసిన కీరా, టమాటా ముక్కలు, కొద్దిగా పసుపు వేసి కలపాలి. మూతపెట్టి, మీడియం మంటపై ముక్కల్లోని నీరంతా పోయి మెత్తగా మగ్గే వరకు ఉడికించుకోవాలి. అనంతరం స్టవ్ ఆపేసి ఈ మిశ్రమాన్ని పూర్తిగా చల్లారనివ్వాలి.

-మిక్సీ జార్‌ లో ఉన్న పల్లీలు, పచ్చిమిర్చి మిశ్రమంలో జీలకర్ర, ఉప్పు, వెల్లుల్లి, కొద్దిగా చింతపండు వేసి కచ్చాపచ్చాగా మిక్సీ పట్టాలి. ఇప్పుడు అందులో చల్లారిన కీరా-టమాటా మిశ్రమాన్ని కూడా వేసి రోటి పచ్చడిలా కచ్చాపచ్చాగా గ్రైండ్ చేసుకోవాలి.

-తాలింపు కోసం స్టవ్ మీద చిన్న కడాయి పెట్టి, నూనె వేడి చేయాలి. అందులో 1 స్పూన్ శనగపప్పు, 1 స్పూన్ మినప్పప్పు, అర స్పూన్ ఆవాలు, అర స్పూన్ జీలకర్ర వేసి వేయించాలి. అవి చిటపటలాడాక 3 ఎండుమిర్చి, కరివేపాకు, అర టీస్పూన్ ఇంగువ వేసి దోరగా వేయించి స్టవ్ కట్టేయాలి.

-చివరగా సన్నగా తరిగిన కొత్తిమీరను తాలింపులో వేసి, ఆ పోపును పచ్చడిలో బాగా కలుపుకోవాలి. అంతే ఎంతో రుచికరమైన సమ్మర్ స్పెషల్ కీరా దోసకాయ పచ్చడి రెడీ.