మామిడికాయ పప్పు: ఉగాది స్పెషల్

మామిడికాయ పప్పు(మ్యాంగో దాల్)ఆంధ్రాలో బాగా పాపులర్ అయినటువంటి క్లాసిక్ పప్పు కూర(దాల్). ఈ మామిడికాయ పప్పు ఆంధ్రా కుటుంబ సభ్యలకు చాలా ఇష్టమైనటువంటి పప్పుకూర. ఉగాదికి చిన్న చిన్న సైజులో వేసవి సీజన్ ను పలకరిస్తూ, పుల్ల పుల్లగా మనకు అందుబాటులో ఉంటాయి.

పచ్చిమామిడి కాయలు, ఈ పుల్లని లేలేత పచ్చిమామిడి కాయలతో పప్పు వండితే చాలా రుచికరంగా ఉంటుంది. దాల్ మరియు మామిడికాయ ఒక బెస్ట్ కాంబినేషన్. ఉగాది రోజున మామిడికాయ పప్పుతో, విందు భోజనం చాలా అద్భుతంగా ఉంటుంది. మీరు కూడా ఒక సారి ట్రై చేయండి. పుల్లపుల్లగా కమ్మగా ఎంజాయ్ చేయండి...

కావల్సిన పదార్థాలు:
తూర్ దాల్/ కంది పప్పు: 1cup
పచ్చి మామిడి ముక్కలు: 1/2cup(పొట్టు తీసి చిన్న ముక్కలుగా కట్ చేసినవి)
టమోటో: 1(చిన్నది, సన్నగా తరిగి పెట్టుకోవాలి)
ఉల్లిపాయ: 1(సన్నగా తరిగిపెట్టుకోవాలి)
పసుపు: 1/4tsp
పచ్చి మిర్చి: 4-6(పొడవుగా మద్యలోకి కట్ చేసుకోవాలి)
అల్లం: చిన్న ముక్క(తురుముకోవాలి లేదా చిన్న ముక్కలుగా కట్ చేసుకోవాలి)
ఉప్పు: రుచిక సరిపడా
నీరు: 1 లేదా 2 cup
పోపు కోసం :
ఆవాలు: 1/2 tsp
జీలకర్ర: 1/2 tsp
వెల్లుల్లి రెబ్బలు: 3-4(కచపచ దంచుకోవాలి)
ఎండు మిర్చి: 2(విత్తనాలు తీసేసి మద్యకు కట్ చేసుకోవాలి)
ఫ్రెష్ గా ఉన్న కరివేపాకు: రెండు రెమ్మలు
నూనె: 2-3tsps

తయారు చేయు విధానం:
1. ముందుగా పప్పును శుభ్రంగా కడిగి పెట్టుకోవాలి.
2. తర్వాత ప్రెజర్ కుక్కర్ లో కడిగి పెట్టుకొన్న పప్పు, మామిడి ముక్కలు, ఉల్లిపాయ, పచ్చిమిర్చి, అల్లం, టమోటో ముక్కలు మరియు పసుపు వేయాలి.
3. తర్వాత అందులోనే రెండు కప్పుల నీళ్ళు పోసి, మూత పెట్టి 2-3 విజిల్స్ వచ్చే వరకూ ఉడికించుకోవాలి. విజిల్స్ వచ్చిన తర్వాత స్టౌ ఆఫ్ చేసి, ఆవిరి తగ్గనివ్వాలి.
4. అంతలోపు, స్టౌ మీద మందపాటి పాత్ర పెట్టి, అందులో నూనె వేసి, వేడయ్యాక అందులో ఆవాలు వేసి, చిటపటలాడినతర్వాత జీలకర్ర, వెల్లుల్లి, ఎండు మిర్చి మరియు కరివేపాకు వేసి మరో నిముషం వేగించుకోవాలి.
5. పోపుదినుసులు వేగిన తర్వాత అందులో కుక్కర్ లో ఉడికించి పెట్టుకొన్న పప్పు, ఉప్పు వేసి మొత్తం మిశ్రమాన్ని బాగా మిక్స్ చేయాలి. మొత్తం మిశ్రమాన్ని మీడియం మంట మీద 5-10నిముషలు ఉడికించుకోవాలి. అంతే ఉగాది స్పెషల్ మామిడికాయ పప్పు రెడీ. ఈ పప్పును వేడి వేడి అన్నం, వేపుడు, అప్పలంతో వడ్డిస్తే, చాలా రుచికరంగా, మంచి కాంబినేషన్ తో పండుగ విందు ఆహా అనిపిస్తుంది.