తల్లిదండ్రులూ అలెర్ట్..ఏడాదిలోపు పిల్లలకు పొరపాటున కూడా ఇవి తినిపించొద్దు!

తల్లిదండ్రులకు తమ బిడ్డల ఎదుగుదలలో ప్రతి దశ ఎంతో ప్రత్యేకం. అందులోనూ శిశువుకు తొలిసారిగా ఘన ఆహారం (సాలిడ్ ఫుడ్) పరిచయం చేసే ఘట్టం చాలా కీలకమైనది. మొదటి ఆరు నెలల పాటు కేవలం పాలు మాత్రమే తాగే చిన్నారికి ఆ తర్వాత క్రమంగా ఇతర ఆహారాలను అలవాటు చేయడం ఒక సవాలుతో కూడుకున్న బాధ్యత.

పిల్లలకు అన్నీ రుచి చూపించాలనే ఉత్సాహం పెద్దల్లో సహజం. కానీ, ఈ క్రమంలో కొన్ని ఆహార పదార్థాలు మీ బిడ్డ ఆరోగ్యానికి తీవ్ర నష్టం కలిగిస్తాయని మీకు తెలుసా? ప్రముఖ పోషకాహార నిపుణురాలు నమామి అగర్వాల్ ఈ అంశంపై అత్యంత కీలకమైన సూచనలు చేస్తున్నారు.

ఏడాది లోపు పిల్లల జీర్ణవ్యవస్థ ఇంకా అభివృద్ధి చెందుతున్న దశలోనే ఉంటుంది కాబట్టి పెద్దలు తినే ప్రతిదీ వారికి సురక్షితం కాదు. అగర్వాల్ తన ఇన్‌ స్టాగ్రామ్‌ అకౌంట్ ద్వారా తల్లిదండ్రులను హెచ్చరిస్తూ ఒక అద్భుతమైన మెసేజ్ షేర్ చేశారు. మీ బిడ్డకు మొదటి సంవత్సరంలో ఖచ్చితంగా దూరంగా ఉంచాల్సిన 4 ఆహార పదార్థాలను నమామి అగర్వాల్ సూచించారు. అవేంటో ఇక్కడ చూడండి.

తేనె
తేనె చాలా ఆరోగ్యకరమైనది అని, కొన్ని ఇళ్లలో పుట్టగానే పిల్లల నాలుకపై తేనె రాసే అలవాటు ఉంటుంది. కానీ ఒక సంవత్సరం నిండని పిల్లలకు తేనె అస్సలు ఇవ్వకూడదు. ఇందులో క్లోస్ట్రిడియం బోటులినమ్ అనే బ్యాక్టీరియా బీజాంశాలు ఉండే అవకాశం ఉంది. పెద్దల జీర్ణవ్యవస్థ వీటిని సులభంగా నాశనం చేయగలదు కానీ పసిపిల్లల అపరిపక్వ పేగులు వీటిని తట్టుకోలేవు. దీనివల్ల శిశువులకు ఇన్ఫాంట్ బోటులిజం అనే అరుదైన, ప్రాణాంతక వ్యాధి వచ్చే ప్రమాదం ఉందని నిపుణులు హెచ్చరిస్తున్నారు.

చక్కెర
ప్రాసెస్ చేసిన చక్కెరలను పిల్లలకు పరిచయం చేయడం వల్ల వారి ఎదుగుదలపై తీవ్రమైన దీర్ఘకాలిక దుష్ప్రభావాలు పడతాయి. చిన్న వయసులోనే తీపి రుచులకు అలవాటు పడితే, భవిష్యత్తులో పిల్లలు సహజమైన రుచులను ఇష్టపడరు. దీనివల్ల వారు ఆహారం తినేటప్పుడు తీవ్రంగా మారాం చేయడం, చిన్న వయసులోనే ఊబకాయం బారిన పడటం, దంతాలు త్వరగా పాడైపోవడం వంటి సమస్యలు వస్తాయి.

నూనెలో వేయించిన ఆహారాలు
డీప్ ఫ్రై చేసిన పదార్థాలలో అనారోగ్యకరమైన ట్రాన్స్ ఫ్యాట్స్ అధికంగా ఉంటాయి. ఇవి పసిపిల్లల సున్నితమైన జీర్ణవ్యవస్థకు ఏమాత్రం మంచివి కావు. వీటిని జీర్ణం చేసుకోవడం వారికి చాలా కష్టం. ఈ నూనె పదార్థాలు పేగులకు చికాకు కలిగించడమే కాకుండా, శిశువుకు అందాల్సిన నిజమైన పోషకాల స్థానాన్ని ఆక్రమిస్తాయి. ఎదుగుతున్న బిడ్డకు అవసరమైన విటమిన్లు అందకుండా ఈ ఆహారాలు అడ్డుపడతాయి.

పండ్ల రసాలు
పిల్లలకు పండ్ల రసాలు ఇస్తే బలం వస్తుందని చాలామంది అనుకుంటారు. కానీ ఏడాది లోపు పిల్లలకు జ్యూస్‌ లు పూర్తిగా మానుకోవాలని నిపుణులు స్పష్టం చేస్తున్నారు. జ్యూస్ చేయడం వల్ల పండ్లలోని అత్యంత ముఖ్యమైన పీచుపదార్థం నశించిపోయి, కేవలం చక్కెర మాత్రమే మిగులుతుంది. ఇది పిల్లల ఆరోగ్యానికి ఏమాత్రం మేలు చేయదు. వీటికి బదులుగా పండ్లను మెత్తని గుజ్జులా చేసి తినిపించడం ఉత్తమం.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.