టమోటో పన్నీర్ పలావ్

Published: Thursday, June 28, 2012, 17:53 [IST]

టమోటో, పనీర్, స్పైసీ మసాలాలు కలిపి చేసే ఈ వెరైటి రైస్ వంటకం కోసం ఎక్కువ పదార్ధాలు అవసరం ఉండదు. ఈ మాన్ సూన్ వాతావరణానికి హాట్ హాట్ గా స్పైసీగా చాలా బాగుంటుంది. ఇది పిల్లలకే కాదు పెద్దలకూ ఇష్టమే. దీనికి పెరుగు పచ్చడి కాంబినేషన్ అయితే ఆ రుచి మరింత కమ్మగా ఉంటుంది.

కావలసిన పదార్ధాలు:
టమాటాలు: 4-6
పనీర్: 100grms
సన్నబియ్యం: ఒక గ్లాస్
అల్లం వెల్లుల్లి పేస్ట్: 2tbsp
కొత్తిమీర: ఒక కట్ట
పుదీనా: ఒక కట్ట
ఉల్లిపాయ: 2
పచ్చిమిర్చి : 6-8
కారం: 2tbsp
పసుపు:1/4tsp
ఉప్పు: రుచికి సరిపడా
నూనె: తగినంత
కరివేపాకు: రెండు రెమ్మలు
గరంమసాలా పొడి: 1tsp
లవంగాలు, చెక్క, షాజీర, బిర్యానీ ఆకు: తగినంత

తయారు చేసే విధానం:
1. పనీర్ ను చిన్న ముక్కలుగా కోసుకుని కొంచెం ఉప్పు, కారం, పసుపు, పావు స్పూన్ గరంమసాలా పొడి వేసి కలిపి ఒక పావుగంట మారినేట్ చెయ్యాలి.
2. బియ్యం కడిగి ఒక అరగంట సేపు నానబెట్టుకోవాలి. టమాటాలు ఉడికించి గ్రైండ్ చేసి గుజ్జు రెడీ చేసి పెట్టుకోవాలి.
3. ఇప్పుడు పాన్ లో నూనె వేడి చేసి నాలుగు లవంగాలు, చెక్క, బిర్యానీ ఆకు, ఒక స్పూన్ షాజీర వేసి వేయించాలి.
4. ఇప్పుడు సన్నగా తరిగిన ఉల్లిపాయ ముక్కలు, పచ్చిమిర్చి ముక్కలు, కరివేపాకు వేసి వేగనివ్వాలి.
5. ఆ తర్వాత ఒక టేబుల్ స్పూన్ అల్లంవెల్లుల్లి పేస్ట్ వేసి వేగిన తరువాత టమాట గుజ్జును వేయాలి. పచ్చివాసన పోయే వరకూ వేయించుకోవాలి.
6. అందులోనే సన్నగా తరిగిన పుదీనా, కొత్తిమీర వేసి బాగా వేయించి మారినేట్ చేసిన పనీర్ ముక్కలు వేసి కలపాలి. తగినంత కారం, పసుపు, ఒక టేబుల్ స్పూన్ గరంమసాలా పొడి వేసి బాగా కలిపి రెండుగ్లాసుల నీళ్ళు పోసి మరిగాక బియ్యం, తగినంత ఉప్పు వేసి కలిపి మూత పెట్టి మూడు విజిల్స్ రానివ్వాలి. తర్వాత ఆవిరంతా తగ్గిన తర్వాత కుక్కర్ మూత తీసి ఒకసారి కలిపి కొంచెం కొత్తిమీర చల్లుకోవాలి. అంతే టమోటో పనీర్ పలావ్ రెడీ. వేడి వేడిగా పెరుగుపచ్చడితో తింటే ఈపులావ్ చాల రుచిగా ఉంటుంది.

Comments

Story first published: Thursday, June 28, 2012, 17:53 [IST]

Other articles published on Jun 28, 2012

Latest Updates

Tomato - Paneer Pulao | టమోటో పన్నీర్ పలావ్