విటమిన్ C, యాంటీఆక్సిడెంట్లు పుష్కలంగా ఉండే ఉసిరి సూప్..చలికాలంలో దీన్ని మించింది లేదు!

Posted By:

చల్లని చలికాలపు సాయంత్రాలలో లేదా రాత్రి భోజనం సమయంలో, మనసుకు వెచ్చదనాన్ని, శరీరానికి పోషణను ఇచ్చే ఏదైనా రుచికరమైన వంటకం తాగాలనిపిస్తుందా? అయితే ఉసిరికాయ సూప్ మీకు బెస్ట్. విటమిన్ C, యాంటీఆక్సిడెంట్లు పుష్కలంగా ఉండే ఉసిరి, శీతాకాలంలో మన రోగనిరోధక శక్తిని బలోపేతం చేసి, జీర్ణక్రియను మెరుగుపరుస్తుంది.

అంతేకాదు దీనిని క్రమం తప్పకుండా తీసుకోవడం వల్ల చర్మం సహజంగా బిగుతుగా మారి, బుగ్గలకు గులాబీ రంగు మెరుపు వస్తుంది. ఉసిరికాయ సూప్ అనగానే వగరుగా లేదా చేదుగా ఉంటుందేమో అని సందేహపడుతున్నారా? సరైన మసాలాలు, కొన్ని చిట్కాలు జోడిస్తే దీనిని ఎంతో రుచికరంగా, ఘాటుగా తయారు చేసుకోవచ్చు. ఇంట్లోనే ఎంతో సులభంగా ఈ సూప్ ఎలా చేయాలో ఇక్కడ చూడండి.

Winter healthy usirikkaya soup recipe in telugu how to make gooseberry soup at home

కావలసిన పదార్థాలు

ఉసిరికాయలు: 4-5
అల్లం: 1 అంగుళం ముక్క
పచ్చిమిర్చి: 1
నెయ్యి లేదా వెన్న: 1 టీస్పూన్
జీలకర్ర: అర టీస్పూన్
ఇంగువ: చిటికెడు
నల్ల మిరియాల పొడి: అర టీస్పూన్
వేయించిన జీలకర్ర పొడి: అర టీస్పూన్
కార్న్‌ఫ్లోర్: 1 టీస్పూన్
బెల్లం లేదా తేనె: 1 టీస్పూన్
నల్ల ఉప్పు, సాధారణ ఉప్పు: రుచికి సరిపడా
కొత్తిమీర: అలంకరణ కోసం
చలికాలం స్పెషల్ బ్రేక్‌ ఫాస్ట్..ప్రోటీన్, ఐరన్ పుష్కలంగా ఉండే పెసరపప్పు పాలకూర దోసె చేసుకోండిలా..

తయారు చేసే విధానం

-ముందుగా ఉసిరికాయలను శుభ్రంగా కడిగి, ప్రెషర్ కుక్కర్‌ లో ఒకటిన్నర గ్లాసుల నీరు, కొద్దిగా ఉప్పు వేసి రెండు విజిల్స్ వచ్చేవరకు ఉడికించండి. అవి పూర్తిగా చల్లారిన తర్వాత, లోపలి గింజలను తీసివేసి ఉసిరి ముక్కలను వేరు చేయండి.

-ఇప్పుడు ఈ ఉడికించిన ఉసిరి ముక్కలను కొద్దిగా వేడినీటితో కలిపి మిక్సర్‌ లో మెత్తని గుజ్జులా గ్రైండ్ చేసుకోండి.

-తర్వాత ఒక బాండీలో 1 టీస్పూన్ నెయ్యి వేడి చేసి, అందులో ఇంగువ, జీలకర్ర, తురిమిన అల్లం, పచ్చిమిర్చి వేసి తేలికగా వేయించండి.

-ఇప్పుడు సిద్ధం చేసుకున్న ఉసిరి గుజ్జును, ఉసిరి ఉడికించగా మిగిలిన నీటిని సుమారు 2 కప్పులు అందులో వేసి కలపండి. దీనికి నల్ల ఉప్పు, సాధారణ ఉప్పు, నల్ల మిరియాల పొడి, వేయించిన జీలకర్ర పొడి జత చేసి బాగా కలపండి.

-సూప్ మరుగుతున్నప్పుడు, నీటిలో కలిపిన కార్న్‌ ఫ్లోర్ మిశ్రమాన్ని, 1 టీస్పూన్ బెల్లం కలపండి. దీనిని తక్కువ మంట మీద 3-4 నిమిషాల పాటు నెమ్మదిగా ఉడకనివ్వండి.

-చివరగా, పైన సన్నగా తరిగిన కొత్తిమీర చల్లి, వేడివేడి ఉసిరికాయ సూప్‌ ను కప్పులో పోసుకుని రాత్రి ఆస్వాదించండి.

[ of 5 - Users]
Story first published: Thursday, November 19, 2026, 21:49 [IST]
Desktop Bottom Promotion