అత్తమామలు, ఆడపడుచులు సహకరించకుంటే?

By B N Sharma

Published: Monday, July 9, 2012, 13:46 [IST]

ఒక వివాహంలో వధూవరులు కలసి మెలసి ఉంటామని ఎన్నో వాగ్దానాలు చేసుకుంటారను. వివాహం అనేది వ్యక్తుల జీవితాలలో అతిముఖ్య సంఘటన. కాని వివాహం అయిన కొద్ది నెలలకే వీరిమధ్య సంబంధాలలో ఎన్నో సమస్యలు వస్తాయి. అవి కూడా వారి చుట్టు పక్కల ఉన్న సంబంధీకులవలన వారికి కలుగుతూంటాయి. చాలావరకు వీరు అటు ఇటు, అత్తమామలు, ఆడపడుచులు, బావమరుదులుగానే ఉంటారు. వీరు కలిగించే సమస్యలను చాలా చాకచక్యంగా ఎదుర్కొనాలి. ఎందుకంటే వారు కూడా మరి మీ భాగస్వామి తల్లితండ్రులు, తోడబుట్టిన వారే. సడన్ గా వచ్చే ఈ మార్పులు వారికి కోపాన్ని తెప్పిస్తాయి. మరి వారు అందుకు సహకరించకుంటే ఏం చేయాలి? ఎన్నో అపార్ధాలు, తగవులు వారితో మీకు ఏర్పడతాయి. కనుక అత్త, ఆడపడచుల సమస్యలు కొన్ని పరిశీలిద్దాం.

వివాహ సమస్యలు - అత్తమామలు సహకరించకుంటే, మీకు మీ భాగస్వామికి మధ్య ఎన్నో సమస్యలు వస్తాయి. ఆడవారికి ఈ సమస్యలు మరింతగా ఉంటాయి. అటువంటపుడు, మీరు మీ భాగస్వామి మద్దతు కూడగట్టాలి. కాని చాలాసార్లు మీ పార్టనర్ ఏమీ చెప్పలేకపోతాడు. దానికి కారణం తన తల్లితండ్రులకు కోప తాపాలు వస్తాయని. అటువంటపుడు పరిష్కరించటం కష్టమే అవుతుంది. అటువంటపుడు మీరు మీ ఆత్త మామలతోనే సహనం వహించి ఆ సమస్యలను పరిష్కరించుకోవాలి. మీకు మీ పార్టనర్ కు మధ్య సమస్యలు లేకుండా చేసుకోండి.

కెరీర్ సమస్యలు - చాలామందిలో అత్త, మామలు తమ కోడలి ఉద్యోగాన్ని తప్పుపడతారు.అటువంటపుడు మీ కెరీర్ దెబ్బతింటుంది. చివరకు మీరు ఉద్యోగంనుండి లేట్ గా వస్తున్నావని అంతసేపు ఎక్కడ తిరుగుతున్నావని కూడా ప్రశ్నిస్తారు. మీ ఉద్యోగాన్ని వారు అర్ధం చేసుకోరు. ఒక్కో సమయంలో మీ పట్ల నిజమైన శ్రద్ధతో కూడా వారు ఈ రకంగా ప్రవర్తించవచ్చు. మీరు కొంతకాలం సహనంగా వారికి నచ్చ చెప్పాలి. కొంతకాలం గడిచే సరికి అన్నీ సర్దుకునే అవకాశం ఉంటుంది.

సామాజిక అంశాలు - అత్తమామాలకు మీ స్నేహితులతో లేదా మీ సామాజిక సంబంధాలతో అయిష్టంగా ఉంటే అవి కూడా తగవులకు దోవతీస్తాయి. చాలాసార్లు వారు నేడు సాగుతున్న ఆధునిక జీవన శైలి అర్ధం చేసుకోలేరు. వారి పాతకాల విలువలు చెపుతారు. ఇటువంటివి ప్రతి ఇంటిలోను సాధారణంగా ఉంటూనే ఉంటాయి. మరి మీరు మీ అత్తమామలు ఒక అవగాహనకు రావాలి. మీరు కూడా వారు తెలిపే విలువలు అర్ధం చేసుకోవాలి. అదే సమయంలో మీరు సోషల్ గా నలుగురితోను కలసి నడవాలనే అవసరాన్ని వారికి వివరించండి.

మానసిక ఒత్తిడి - అత్తమామలు పెట్టే సమస్యలు మానసిక ఒత్తిడి కలిగించి వ్యక్తిగత మరియు ఆఫీస్ జీవితాలను ప్రభావిస్తాయి. ఒత్తిడి ఎక్కువైతే, శారీరక సమస్యలు కూడా వస్తాయి. కనుక మీ అత్తమామలు అర్ధం చేసుకోలేకపోతే, వారికి దూరంగా ఉండటం మంచిది. ముందుగా వారితో మంచిగా ఉండటానికి ప్రయత్నించండి. అది కుదరకుంటే మీరు వేరుగా ఉంటూ మీ భాగస్వామితో ఆనందించవచ్చు. మీ జీవితాన్ని మీ భాగస్వామితో ఆనందంగా ఉంచుకోవాలి తప్ప మీ అత్తమామలకొరకు మీ ఆనందాలను చంపుకోవద్దు.

నేటి తరం పిల్లలకు, పాత తరం పెద్దలకు విలువలు, ఆలోచనలు వేరు వేరుగా ఉంటాయి. కనుక మీ మధ్య వ్యత్యాసం పెంచుకునే కంటే, వాటిని ప్రశాంతంగా పరిష్కరించుకోవడం అత్యవసరం. సంబంధాలు కాపాడుకోవడం మరింత అవసరంగా గుర్తించండి.