ఒంటరితనాన్ని వదిలి తుంటరితనంతో జీవించడం ఎలా..?

Relationship

oi-Saraswathi

By Sindhu

Published: Thursday, August 30, 2012, 17:01 [IST]

ఒంటరితనం మనిషి జీవితాన్ని అతలాకుతలం చేస్తుంది. ఎవరూ లేరు అన్న భావన తీవ్ర డిప్రెషన్ లోకి నెట్టే ప్రమాదం ఉంది. ఈ సమస్య పురుషులలో కన్నా స్త్రీలలో ఎక్కువ. చాలా మంది ఉద్యోగినులు ఈ సమస్యను ఎదుర్కొంటున్నారు. ఉద్యోగం చేసే వారిలో చాలా మంది తమ వారికి దూరంగా ఉండవలసి రావడమే దీనికి ప్రధాన కారణం. జీవితాన్ని సంతోషంగా గడపడానికి పెద్దగా డబ్బు ఖర్చు పెట్టవలసిన అవసరం లేదు. జీవనశైలిలో కొద్దిపాటి మార్పులతో ఆనందంగా హాయిగా గడిపేయొచ్చు. దీనికి చేయవలసిదల్లా కొన్నివిలువైన సూత్రాలను పాటించడమే..

1. ఒంటిరిగా జీవించే ప్రతి ఒక్కరూ అక్కర్లేని, అవసరం లేని ఆలోచనలకు తావియ్యకండి. రోజువారీ క్రమంలో జరిగే అనేక సంఘటనలకు అవసరానికి మించి ప్రాధాన్యం ఇవ్వద్దు. వృత్తి రిత్యా ఎంతో మందిని కలవాల్సి వుంటుంది. వారందరిని గుర్తు పెట్టుకొని మనస్సు పాడుచేసుకోకండి.

2. ఆఫీసు పనులు ముగించుకొని ఇంటికి వచ్చిన తర్వాత ఒంటరితనం మిమ్మల్ని ఆవహిస్తుంది. అలాంటి సందర్శాలలోనే మిమ్మల్ని మీరు కంట్రోల్ చేసుకోవాలి. మీ చుట్టూ ఉన్న వారందరూ మీ వారే అన్న భావనతో వుంటే ఒంటరితనం మీ దరిచేరదు..

3. ఎప్పుడూ ఇతరుల కోసం కష్టపడుతున్నామన్న భావనతో వుండకండి. ఈ జీవితం నాది. నా కోసం నేను జీవిస్తున్నాను అనుకుంటే జీవితం ఆనందమయం అవుతుంది. మీ కుటుంబ సభ్యుల కోసమో, ఆత్మీయుల కోసమో జీవించవద్దు. ఈ జీవితం మీది. మీకోసం మీరు జీవించండి. ఈ ఆలోచనే మీకు ఎక్కడ లేని శక్తి నిస్తుంది.

4. ఆత్మన్యూనత భావం జీవితాన్ని ఆస్తవ్యస్తం చేస్తుంది. మిమ్మల్ని సుఖంగా నిద్రపోనివ్వదు. శాంతంగా బ్రతకనివ్వదు. స్వేచ్చగా మీ ఇష్టం వచ్చినట్లు వుండండి. ఇతరులకన్నా మీరు ఎందులోనూ తక్కువ కాదు అన్న భావన కొండంత బలాన్ని, ఉత్సాహాన్ని ఇస్తుంది.

5. నవ్వాలనుకుంటే మనస్పూర్తిగా నవ్వండి. దు:ఖం కలిగితే భారం దిగిపోయేంత వరకూ ఏడ్చేయండి. దీని వలన మనసులోని భారమంతా దిగిపోయి మనస్సు తేలికగా అనిపిస్తుంది. నవ్వడం అనేది దేవుడు మీకిచ్చిన వరం. మనసారా నవ్వితే నలుగురు ఏమన్నా అనుకుంటారేమో అన్న అనుమానాన్ని కలలో కూడా రానీయకండి. మీ చుట్టు పక్కల ఉండే వారందరూ మీ వాళ్ళే అనుకుంటేనే వారితో స్వేచ్ఛగా నవ్వుతూ వుండగలరు. ముఖ్యంగా ఒంటరిగా దూర ప్రాంతాలలో ఉద్యోగం చేసే మహిళలకు ఇది చాలా అవసరం.

6. ఒంటరిగే గడిపేవారికి గార్డెనింగ్, పెట్స్ ను పెంచుకోవడంతో పాటు పుస్తకాలు మంచి నేస్తాలు. అవి మీ మనస్సును ప్రతిబింబిస్తాయి. ఒక మంచి పుస్తకం చదివితే ఒక మంచి ఫ్రెండ్ ని కలిసిన అనుభూతి కలుగుతుంది. వీలు దొరికినప్పుడల్లా మంచి సాహిత్య గ్రంథాలు కొని తెచ్చుకొని ఇంట్లో పెట్టుకుంటే ఒంటరితనం అనిపించినప్పుడల్లా అవి మీకు మంచి కాలక్షపం అవుతాయి. అలాగే మీకు మంచి నేస్తాలు పువ్వులను మొక్కలు. వీటిని పెంచుకొన్నట్లైతే సమయం అంతా గార్డెన్ లో సరిపోతుంది. అవి వికసించినప్పుడు మనస్సుకు కలిగే ఆనందం ఇంతా అంతా కాదు. అలాగే పెట్స్.. మనతో ఉంటే మనకు తోడు ఒకరున్నారన్న భావన కలిగి వాటితో మాట్లాడి, ఆడిపాడి సరదాగా గడిపేయెచ్చు.

7. ఎదుటివారి అభిప్రాయాలు, వారి మాటలను గౌరవించడం అలవాటు చేసుకోవాలి. మీ మంచి కోసం చెప్పే మాటలని కూడా మీరు విశ్వసించలేకపోతే చివరికి మీకంటూ ఎవరూ మిగలకపోవచ్చు. అందుకని ఎదుటివారు ఏం చెపుతున్నారు అన్నది శ్రద్దగా వినండి. తాము చెప్పే మాటలు మీరు వింటున్నారు అంటే చెప్పేవారికి కూడా ఉత్సాహం, సంతోషం కలుగుతుంది. ప్రతి విషయాన్ని భూతద్దంలో కాకుండా పాజిటివ్ గా ఆలోచించండి. ఇది మీ ఆనందాన్ని ఆరోగ్యాన్ని రెట్టింపు చేస్తుంది.