ముఖంపై చిరునవ్వు,మనసులో కుళ్లు..అసూయపడేవారిని గుర్తించడం ఎలా?

మనిషికి ఉండే సహజ గుణాల్లో అసూయ కూడా ఒకటి. ప్రతి ఒక్కరూ తమ జీవితంలో ఏదో ఒక సందర్భంలో అసూయ పడటం సహజం. అయితే అది శృతి మించితే బంధాలకు ముప్పు తెస్తుంది. మన చుట్టూ ఉండేవారు మన మంచి కోరుతున్నారో లేక మన ఎదుగుదల చూసి లోలోపల కుళ్ళుకుంటున్నారో తెలుసుకోవడం చాలా ముఖ్యం.

నవ్వుతూ మాట్లాడేవారందరూ మన మిత్రులు కాదు అన్నట్లు, కొందరు మన పట్ల అసూయతో ఉన్నారని గుర్తించడానికి 5 కీలక సంకేతాలు ఉన్నాయి. అవేంటో ఇక్కడ చూడండి.

పొగడ్త మాటున విమర్శ
కొందరు మిమ్మల్ని మెచ్చుకుంటున్నట్లే అనిపిస్తుంది కానీ ఆ మాటల్లో ఏదో తెలియని వెటకారం దాగి ఉంటుంది. ఉదాహరణకు నీకు ఈ ఉద్యోగం వచ్చిందంటే నమ్మలేకపోతున్నాను, నీవల్ల అవుతుందనుకోలేదు అని అంటారు. పైకి అది పొగడ్తలా ఉన్నా, మీ సామర్థ్యాన్ని శంకించడమే వారి అసలు ఉద్దేశం.

ఇలాంటి మాటలతో మీ ఆత్మవిశ్వాసాన్ని దెబ్బతీయాలని చూస్తారు. ఇలాంటి విషపూరిత పొగడ్తలను మీరు వెంటనే గుర్తించి, వాటిని సీరియస్‌ గా తీసుకోకూడదు.

మీ విజయాన్ని చిన్నచూపు చూడటం
మీరు ఏదైనా సాధించి ఆనందంగా వారితో పంచుకున్నప్పుడు వారి ముఖంలో సంతోషం కనిపించకపోగా అదృష్టం బాగుండి నీకు దక్కిందిలే లేదా అదంత పెద్ద విషయం కాదులే అంటూ తేలిగ్గా కొట్టిపారేస్తారు.

మీ కష్టాన్ని గుర్తించకుండా, మీకు అర్హత లేదని భావించేలా చేయడమే వారి లక్ష్యం. వాస్తవానికి, మీ గెలుపు వారిలోని అభద్రతా భావాన్ని తట్టిలేపుతుంది కాబట్టి మీకు మద్దతు ఇవ్వడానికి బదులుగా పోటీ పడటానికి ప్రయత్నిస్తారు.

మీ నీడలా మారే ప్రయత్నం
మీరు వేసుకునే డ్రెస్ లు, మీ హెయిర్ స్టైల్ లేదా మీ మాట తీరును ఎవరైనా ఉన్నట్టుండి అనుకరించడం మొదలుపెట్టారా? అయితే వారు మీ పట్ల అసూయతో ఉన్నారని అర్థం. వీరు మిమ్మల్ని చూసి అసూయపడుతూనే, మీలా ఉండాలని తపిస్తుంటారు.

తమకంటూ సొంత వ్యక్తిత్వం లేకపోవడం వల్ల, మీ సోషల్ మీడియా పోస్టులను లేదా అలవాట్లను కాపీ కొడుతుంటారు. దీనిని చూసి మీరు చిరాకు పడకుండా, అదొక రకమైన అభిమానంగా భావించి వదిలేయడం ఉత్తమం.

అడుగడుగునా తప్పులు వెతకడం
అసూయపడే వ్యక్తులు తమ తప్పులను కప్పిపుచ్చుకుంటూ, మీ చిన్న చిన్న పొరపాట్లను కూడా భూతద్దంలో చూపిస్తారు. మీరు తక్కువని నిరూపించడానికి, మీ గతంలో జరిగిన పొరపాట్లను గుర్తుచేస్తూ విమర్శిస్తుంటారు.

ఇలా మిమ్మల్ని కించపరచడం ద్వారా వారు తమని తాము గొప్పగా ఊహించుకుంటారు. ఇది మీ మానసిక ప్రశాంతతను తీవ్రంగా దెబ్బతీస్తుంది.

పరోక్షంగా కోపం ప్రదర్శించడం
వీరు తమ కోపాన్ని లేదా అసూయను నేరుగా వ్యక్తపరచలేరు. అందుకే పరోక్ష యుద్ధం చేస్తారు. మీతో సరిగా మాట్లాడకపోవడం, సమాధానం ఇవ్వకపోవడం లేదా నలుగురిలో మిమ్మల్ని ఎగతాళి చేయడం వంటి పనులు చేస్తారు. మనసులో విషం పెట్టుకుని పైకి ఏమీ ఎరుగనట్లు నటించే వీరి పట్ల చాలా జాగ్రత్తగా ఉండాలి.