అతిగా ఆలోచిస్తున్నారా? భగవద్గీతలోని ఈ 5 పాఠాలతో ఓవర్ థింకింగ్ కు చెక్ పెట్టండి!

మన మనస్సు అనేది ఒక సైలెంట్ గా ఉన్న అడవి లాంటిది. అందులో ఆలోచనలు కార్చిచ్చులా వ్యాపిస్తే.. అదే అతిగా ఆలోచించడం(ఓవర్ థింకింగ్). ఇది మెల్లగా మన బుర్రలోకి చొరబడి, చిన్న చిన్న చింతలను భయంకరమైన ఆందోళనలుగా మార్చి, మన శాంతిని, నిద్రను, ఆనందాన్ని దొంగిలిస్తుంది. భవిష్యత్తు గురించి, ఇతరుల గురించి వచ్చే ప్రతికూల ఆలోచనలు మనలో అంతర్గత గందరగోళాన్ని సృష్టిస్తాయి.

అయితే ఇది నేటి ఆధునిక సమస్య మాత్రమే కాదు. వేల ఏళ్ల క్రితం కురుక్షేత్ర యుద్ధభూమిలో అర్జునుడు కూడా ఇలాగే భయంతో, గందరగోళంతో కుంగిపోయాడు. అప్పుడు శ్రీకృష్ణుడు అతనికి ఆయుధాన్ని ఇవ్వలేదు.. మనసును గెలిచే జ్ఞానాన్ని అందించాడు. భగవద్గీత కేవలం ఒక ఆధ్యాత్మిక గ్రంథం కాదు, అది మనసును అదుపు చేసే అద్భుతమైన సైకలాజికల్ గైడ్. గీతలోని 5 పాఠాలు మీ ఆలోచనల సుడిగుండాన్ని ఎలా ఆపుతాయో చూడండి.

మనసు చంచలమైనదని అంగీకరించండి

గీతలో చెప్పబడిన విధంగా అర్జునుడు 'కృష్ణా' మనసు గాలి లాంటిది, దాన్ని అదుపు చేయడం అసాధ్యం" అంటాడు. ప్రతిదాన్ని నియంత్రించాలనుకునే మనస్తత్వం నుంచే ఆందోళన పుడుతుంది. కృష్ణుడు దాన్ని కాదనలేదు. మనసు చంచలమైనదే అయినా.. 'అభ్యాసం, వైరాగ్యం'తో దాన్ని దారిలోకి తెచ్చుకోవచ్చని భరోసా ఇచ్చాడు. కాబట్టి అతిగా ఆలోచిస్తున్నానని మిమ్మల్ని మీరు నిందించుకోకండి, నిరంతర అభ్యాసంతో మనసుకు శిక్షణ ఇవ్వండి.

కర్మపైనే దృష్టి.. ఫలితంపై కాదు
ఓడిపోతే ఏంటి? వాళ్లు ఏమనుకుంటారు? అనుకున్నది జరగకపోతే? ఈ ప్రశ్నలే అతి ఆలోచనకు మూలం. నీ పని నువ్వు చేయి, ఫలితాన్ని ఆశించకు(కర్మణ్యేవాధికారస్తే) అని కృష్ణుడు చెబుతాడు. భవిష్యత్తు ఫలితాలను నియంత్రించాలనే భారాన్ని వదిలేయండి. అప్పుడు మీ మనసు దానంతటదే ప్రశాంతంగా మారుతుంది.

వర్తమానంలో జీవించండి (కర్మ యోగం)
నిస్వార్థ కర్మ అంటే ప్రతిఫలం ఆశించకుండా చేయడం మాత్రమే కాదు, చేస్తున్న పనిపై వంద శాతం శ్రద్ధ పెట్టడం. మీరు వంట చేస్తున్నా, ఆఫీస్ పని చేస్తున్నా పూర్తిగా అందులోనే లీనం అవ్వండి. మనసు ఖాళీగా ఉన్నప్పుడే పిచ్చి ఆలోచనలు వస్తాయి. ఈ ఏకాగ్రతే నిజమైన ధ్యానం, ఇది చెడు ఆలోచనల వైపు మనసును వెళ్లనివ్వదు.

జయాపజయాలను సమానంగా స్వీకరించండి
మన మనసు ఎప్పుడూ విషయాలకు మంచి-చెడు, విజయం-అపజయం అనే ముద్రలు వేస్తుంది. ఆ భావోద్వేగాల అస్థిరతే అతి ఆలోచనకు దారితీస్తుంది. ఒక ప్రతికూల ఆలోచన రాగానే దానికి వెంటనే స్పందించకండి. దాన్ని కేవలం ఒక ప్రేక్షకుడిలా గమనించండి. ఆలోచనలను అణచివేయకండి, అలాగని ఆ ఆలోచనల్లో కొట్టుకుపోకండి.

ధ్యానం.. మనసుకు రీసెట్ బటన్
కృష్ణుడు ధ్యాన యోగాన్ని ఒక శక్తివంతమైన సాధనంగా సూచించాడు. మనసుకు మనమే మిత్రులం, మనమే శత్రువులం. ధ్యానం అనేది మీకు, మీ ఆలోచనలకు మధ్య ఒక స్పష్టమైన దూరాన్ని సృష్టిస్తుంది. రోజూ పది నిమిషాలు మీ శ్వాసపై ధ్యాస పెట్టండి. ఆలోచనలు వస్తే వాటితో పోరాడకండి, నెమ్మదిగా శ్వాసపైకి దృష్టి మళ్లించండి.

అసలు యుద్ధభూమి మనలోనే ఉంది
శ్రీకృష్ణుడు అర్జునుడిని యుద్ధభూమి నుంచి పారిపొమ్మని చెప్పలేదు, అతని ఆలోచనా విధానాన్ని మార్చాడు. మీ మనసు మీకు శత్రువు కాదు, అది ఒక పదునైన సాధనం. దాన్ని వాడుకునే వివేకం మనకుండాలి.