Ganesh Jayanti In 2021 :వినాయక చతుర్థి రోజున చంద్రుడిని ఎందుకు చూడకూడదో తెలుసా...

గణేష్ జయంతి ఎప్పుడు?

హిందూ క్యాలెండర్ ప్రకారం, మాఘ మాసంలోని శుక్ల పక్షం చతుర్ధి రోజున గణేష్ జయంతిని పండుగలా జరుపుకుంటారు. ఇది సాధారణంగా గ్రెగోరియన్ క్యాలెండర్ ప్రకారం, జనవరి లేదా ఫిబ్రవరి మాసంలో వస్తుంది. ఈ ఏడాది 2021లో ఫిబ్రవరి 15వ తేదీన అంటే సోమవారం నాడు వచ్చింది. ఈరోజున హిందువులందరూ వినాయకుడికి ప్రత్యేక పూజలు నిర్వహించి.. తమ కోరికలను నెరవేరాలని ఎంతో భక్తిశ్రద్ధలతో ఆరాధిస్తారు. ఈరోజున వినాయకుడి భక్తులందరూ ఉపవాసం ఉంటారు.

శుభఫలితాల కోసం..

ఈరోజున వినాయకుడికి ప్రత్యేక పూజలు నిర్వహించడం ద్వారా, ఈ ఏడాదంతా శుభఫలితాలు వస్తాయని చాలా మంది నమ్ముతారు. గణేష్ జయంతి రోజున ఎర్రని దుస్తులు, ఎర్రని పువ్వులు, ఎర్రని రంగులో ఉండే మిఠాయిలను వినాయకుడికి సమర్పిస్తారు.

చంద్రున్ని చూడకూడదు..

హిందూ పురాణాల ప్రకారం, గణేష్ జయంతి రోజున వినాయకుడు కడుపు నిండా భోజనం చేసి, నడుస్తున్నప్పుడు పొట్ట పగిలిపోయేలా కనిపిస్తుంది. అది చూసిన చంద్రుడు గణేశుడిని హేళన చేస్తాడు. దీంతో కోపం వచ్చిన వినాయకుడు చంద్రుడికి శాపం విధిస్తాడు. నా పుట్టినరోజున నిన్ను ఎవరైనా చూస్తే, అనవసరంగా నిందలు మోయాల్సి ఉంటుంది.. అంతేకాదు మానసిక క్షోభకు గురవుతారని శాపం పెడతాడు. అందుకే గణేష్ జయంతి రోజున చంద్రుడిని చూడకూడదు. ఒకవేళ పొరపాటున చంద్రుడిని చూస్తే ఆ వ్యక్తి మానసిక శోభకు గురవ్వడమే కాదు.. తప్పుడు ఆరోపణలకు గురవుతారని భావిస్తారు.

విఘ్నాలు తొలగిపోవడానికి..

వినాయక చతుర్థి రోజున నల్ల నువ్వులు కలిపిన నీటితో స్నానం చేసి, పసుపు గణపతిని పూజించి, పగటి పూట ఉపవాస దీక్షను చేపట్టాలి. అనంతరం వినాయక దేవాలయాలకు వెళ్లి దేవుడిని దర్శించుకోవాలి. ఇలా చేయడం వల్ల సంతాన యోగం లేని వారికి సంతానంతో పాటు మీ సకల విఘ్నాలు తొలగిపోతాయని పండితులు చెబుతున్నారు. అంతేకాదు మీకు సంపద, కీర్తి, ప్రతిష్టలు కూడా లభిస్తాయి.

వినాయకుడికే తొలిపూజ..

పురాణాల ప్రకారం, విఘ్నాలు తొలగించే వినాయకుడికి తొలి పూజ చేయాలి. ఎందుకంటే భక్తుల కష్టాలను తొలగించేది విఘ్నేశ్వరుడు. అలాగే ఈ దేవుని పుట్టినరోజునే వినాయక చవితి పండుగను ప్రపంచవ్యాప్తంగా ఉండే హిందువులు ఘనంగా జరుపుకుంటారు.

‘గణ’ అంటే..

బ్రహ్మవైవర్తన పురాణంలో ‘గణ' అనే శబ్దానికి అర్థముంది. ‘గ' అంటే విజ్ణానమని ‘ణ' అంటే తేజస్సు అని పండితులు చెబుతున్నారు. మరోవైపు పంచమ వేదంగా చెప్పుకునే మహాభారతాన్ని రచించిన వేదవ్యాసుడు తన లేఖకుడిగా వినాయకుడినే నియమించాడు.