స్త్రీ ఉద్యోగిని ఐతే... కేశ సౌందర్యం కోసం ప్రత్యేక శ్రద్ద...!?

Hair Care

oi-Saraswathi

By Sindhu

Published: Monday, August 20, 2012, 18:35 [IST]

ప్రస్తుత కాలంలో స్త్రీ ఉద్యోగస్తులైతే వారి జీవన విధానంలోనూ, తమ ఆహార అలవాట్లపైనా శ్రద్ధ తీసుకోవాల్సి ఉంటుంది. నల్లటి ఒతైన జుట్టు అంటే ఇష్టపడని ఆడవాళ్లుంటారా? కానీ నేటి మహిళలు ఇంటా బయట పని ఒత్తిడి, ఉరుకులు పరుగులతో కేశాల పట్ల శ్రద్ధ తీసుకోవడానికి తీరిక లేకుండా పోతోంది. దీంతో జుట్టు పలచనవడం, విపరీతంగా రాలిపోవడం ఇంకా చిన్న వయసులో నెరవడం లాంటి సమస్యలను ఎదుర్కొంటున్నారు. మిగతా ఆడవాళ్ళతో పోలిస్తే ఉద్యోగినులే ఎక్కువగా ఈ సమస్యల బారిన పడుతున్నారు. వృత్తిలో పోటీ, కుటుంబ భారం, లేదా ప్రిమెన్చ్రువల్‌ సిండ్రోమ్‌ ఇలా ఎన్నో కారణాలు. ముఖ్యంగా ప్రి మెన్చ్రువల్‌ సిండ్రోమ్‌ తో బాధపడే వారిలో ఈ సమస్యలు చాలా ఎక్కువగా కనిపిస్తాయి. వెంట్రుకలు జిడ్డుగా మారడం ఇంకా చుండ్రు లాంటి సమస్యల కారణంగా వెంట్రుకలు రాలిపోతుంటాయి.

పని ఒత్తిడి ఇంకా తీరిక లేకపోవడంతో ఆహారంపై శ్రద్ధ చూపరు. జంక్‌ ఫుడ్‌ లతో బరువు పెరుగుతారే కానీ కావలసిన పోషక తత్త్వాలు లభించవు. దీనితో రక్తహీనతకు గురవుతుంటారు. ఫలితంగా జుట్టు రాలిపోవడం, నెరవడం లాంటివి జరుగుతాయి. కాబట్టి వారు వారి జీవన విధానంలో కొద్దిగా మార్పులు చేసుకొని, ఆహారపు అలవాట్లు మార్చుకొన్నట్లైతే తప్పకుండా ఫలితం ఉంటుంది. ఉద్యోగినులు సమతుల్య పౌష్టికాహారం తీసుకోవాలి. లేకపోతే 'ఎనిమియా'కు లోనగుతారు. కాలక్రమేణా జుట్టురాలి పోతుంది. దిగువ సలహాలను క్రమం తప్పకుండా ఉద్యోగినులు ఆచరించాలి.....

1. షికాకాయ్, ఉసిరి పొడి సమపాళ్లలో తీసుకోవాలి. రాత్రి పూట ఈ పొడులను తగినన్ని నీళ్లలో కలిపి నానబెట్టాలి.ఈ మిశ్రమంతో మరుసటి రోజు తల స్నానం చేయాలి. శిరోజాలు నిగనిగలాడుతాయి. జుట్టు రాలడం, చుండ్రు సమస్య వంటివి బాధించవు.

2. గోరువెచ్చని గ్రీన్ టీని మాడుకు, శిరోజాలకు పట్టించి ఆరనివ్వాలి. తర్వాత నీళ్లతో తలంతా శుభ్రపరుచుకోవాలి. గ్రీన్ టీలోని యాంటీఆక్సిడెంట్లు జుట్టు ఊడటాన్ని తగ్గిస్తాయి. పోషకాలు శిరోజాలను పెంచడానికి దోహదం చేస్తాయి.

3. వీలైనంత మటకు ప్రతి రోజు తలస్నానం చేయాలి. అలాగే రాత్రిపూట నూనె పట్టించి కురుళ్లనుంచి మసాజ్‌ చేయాలి. హెయిర్‌ డ్రయ్యర్‌ను వాడకుండా అలానే గాలికి ఆరనివ్వాలి.

4. తడి శిరోజాలను పొడి చేద్దామనే ఉద్దేశంతో వాటిని రాసి రంపాన పెట్టవద్దు. రోజూ ఉదయాన్నే తేలిక పాటి వ్యాయామం చేయాలి. అలా చేస్తే శిరోభారం అనిపించదు. తల స్నానం తర్వాత శిరోజాలు వాటంతట అవే ఆరే లా చేయండి. రాత్రి కనీసం 7 గంటల నిద్ర అవసరం.

5. ఆహారంలో 'ఐరన్‌' సమపాళ్లలో ఉంటే ఎనీమియా రాదు. బైట జంక్‌ ఫుడ్‌ తినటం మానేయ్యాలి. ఆహారం నిదానంగా తీసుకోవాలి. అల్పాహారానికి 15 నిమిషాలు, భోజనానికి అరగంట సమయం వెచ్చించాలి. ఆహారం ఏమి తీసుకుంటున్నాం, ఎలా తీసుకుంటున్నాం అనేవి ముఖ్యం. అల్పాహారం, భోజన సమయాల్లో వ్యర్థ ప్రసంగాలు వద్దు. ఆహారం ఆదరా, బాదరాగా తీసుకోరాదు. మౌనంగా ఆహారం తీసుకోవడం ఉత్తమం.