జుట్టుకు సంబంధించిన అన్నీ సమస్యల నివారణకు హెన్నా...

Published: Tuesday, March 13, 2012, 17:27 [IST]

కురులు పట్టుకుచ్చులా మెరిసిపోయే సోయగమే వేరు. అలాంటి శిరోజాలు ఓ వరమని చెప్పుకోవచ్చు. ఎంత అందమైన కురులున్నా కూడా వాతావరణంలో మార్పుల వల్ల ప్రభావం వాటిపైపడుతుంది. జీవంకోల్పోయిన జుట్టుతోపాటు మరికొన్ని సమస్యలు వచ్చిపడతాయి. సమయానికి తగినట్లుగా సరైన జాగ్రత్తలు పాటిస్తూ జుట్టు ఆరోగ్యంగా, అందంగా ఉండేలా చూసుకోవడమే దానికి తగిన పరిష్కారం.

జుట్టుకు సంబంధించిన ఏ సమస్యకైనా హెన్నా లేదా గోరింటాకు బాగా పనిచేస్తుంది. ముఖ్యంగా హెయిర్‌ డైలు వాడే వారికి... పెర్మింగ్‌, స్ట్రెయిటనింగ్‌ చేయించుకున్నప్పుడు వాటిలోని రసాయనాల వల్ల జుట్టు, తల పొడిబారి, చుండ్రువచ్చే అవకాశం ఎక్కువ. ఇలాంటి సమస్యలన్నింటికీ హెన్నా దివ్యౌషధంలా పనిచేస్తుంది. అయితే, సరైన రీతిలో వాడితేనే ప్రయోజనాలు పొందగలుగుతాం.ముఖ్యంగా పచ్చిగోరింటాకు ముద్ద కాకుండా పొడిని వాడాలి. అలాగే అన్నివయసులవారూ హెన్నాను ఒకేరకంగా పెట్టుకోకూడదు. వయసును బట్టి దీనిని వాడాల్సి ఉంటుంది. ఎలాగంటే.

1. యుక్తవయసువారు నెలకోసారి గంట చొప్పున పెట్టుకొన్నా సరిపోతుంది.
2. ఇరవై నుంచి ముప్ఫైఏళ్లలోపువారు ప్రతి పదిహేనురోజులకోసారి గంట చొప్పున పెట్టుకోవాలి.
3. ముప్ఫైఏళ్లు దాటినవారు వారానికోసారి గోరింటాకు పెట్టుకోవాలి. అయితే ఓ వారం అరగంట, మరోవారం గంట.. ఈ క్రమంలో పెట్టుకుంటేనే సరైన ప్రయోజనాలు పొందవచ్చు.
4. హెన్నాను గంట కంటే ఎక్కువసేపు పెట్టుకోకూడదు. అంతకు మించితే జుట్టు ఎండిపోయినట్లుగా మారుతుంది. నుదుటి పైముడతలూ ఏర్పడతాయి.
5. హెన్నాతో మృదువుగా: రెండుకప్పుల హెన్నాపొడి, అరకప్పు ఉసిరికపొడి, చెంచా మెంతిపొడి, రెండుచెంచాల వేపాకుపొడి, రెండు నిమ్మకాయలు లేదా నాలుగుచెంచాల పుల్లటిపెరుగు, అరకప్పు టీ డికాక్షన్‌ తీసుకోవాలి. వీటన్నింటినీ కలిపి గంటపాటు నానినతర్వాత తలకుపెట్టుకోవాలి. ముప్పావుగంట తర్వాత తలస్నానం చేయాలి. పదిహేనురోజులకోసారి ఇలా చేస్తే చుండ్రు, తలలో దురద తగ్గి జుట్టు మృదువుగా మారుతుంది.