చుండ్రు సమస్య పని పట్టే హెన్నా హెయిర్ ప్యాక్స్

ఎగ్, ఆలివ్ ఆయిల్, హెన్నా పౌడర్

గుడ్డులోని తెల్లసొన, ఆలివ్ ఆయిల్, హెన్నా పౌడర్ అన్నింటినీ బాగా కలిపి మిశ్రమం తయారు చేసుకోవాలి. ఈ పేస్ట్ ని జుట్టు కుదుళ్ల నుంచి అంతా పట్టించాలి. అరగంట తర్వాత మైల్డ్ షాంపూతో క్లీన్ చేయడం వల్ల చుండ్రు సమస్య తగ్గుతుంది.

హెన్నా, పెరుగు, నిమ్మరసం

ఈ ప్యాక్ వేసుకోవడం వల్ల జుట్టు పట్టుకుచ్చులా మెరుస్తుంది. ఒక నిమ్మకాయ రసం, 4 టేబుల్ స్పూన్ల హెన్నా, కొంచెం పెరుగు కలిపి మిశ్రమం తయారు చేసుకోవాలి. ఈ ప్యాక్ ని తలకు పట్టించి.. కాసేపటి తర్వాత కడిగేసుకుంటే.. మంచి ఫలితం ఉంటుంది.

ఆవనూనె, హెన్నా

ఆవనూనె చుండ్రు నివారించడానికి ఎఫెక్టివ్ గా పనిచేస్తుంది. హెన్నాతో కలిపి పెట్టుకోవడం వల్ల కండిషనర్ లా పనిచేస్తుంది. జుట్టు బలంగా, ఆరోగ్యంగా పెరుగుతుంది.

మెంతులు, వెనిగర్, హెన్నా

రాత్రంతా మెంతులను నానబెట్టాలి. ఉదయాన్నే మెత్తగా పేస్ట్ చేయాలి. ఒక టేబుల్ స్పూన్ వెనిగర్, 4 టేబుల్ స్పూన్ల హెన్నా, మెంతుల పేస్ట్ బాగా కలపాలి. ఈ మిశ్రమాన్ని తలకు పట్టించి.. గంట తర్వాత మైల్డ్ హెర్బల్ షాంపూతో కడిగేసుకుంటే.. మంచి ఫలితం ఉంటుంది. జుట్టు సిల్కీగా, స్ర్టాంగ్ గా మారుతుంది.

హెన్నా, గ్రీన్ టీ, నిమ్మ

జుట్టుకి గ్రీన్ టీ కండిషనర్ లా పనిచేస్తుంది. గ్రీన్ టీ, హెన్నా, నిమ్మరసం కాంబినేషన్ లో జుట్టుకి ప్యాక్ వసుకోవడం వల్ల జుట్టు సమస్యలు తగ్గిపోయి.. ఆరోగ్యంగా పెరుగుతాయి. అలాగే జుట్టు స్మూత్ గా తయారై.. చిట్లిపోవడాన్ని అరికడతుంది. 4 టేబుల్ స్పూన్ల హెన్నాని గ్రీన్ టీలో రాత్రంతా నానబెట్టాలి. ఉదయం అందులోకి నిమ్మరసం కలిపి.. తలకు పట్టించాలి. అరగంట తర్వాత కడిగేసుకోవాలి.

హెన్నా, కరివేపాకు

గోరింట ఆకులు, కరివేపాకు, మందారం ఆకులు, మెంతుల మిశ్రమం కూడా జుట్టు పెరుగుదలకు ఎఫెక్టివ్ గా పనిచేస్తుంది. వీటన్నింటిని మిశ్రమంలా తయారు చేసి.. పెరుగు కలిపి తలకు పట్టించాలి. 40 నుంచి 45 నిమిషాల తర్వాత మైల్డ్ షాంపూతో కడిగేసుకుంటే.. జుట్టు స్ర్టాంగ్ గా పెరుగుతుంది. న్యాచురల్ లుక్ అందిస్తుంది.