ఈ ‘కళ్లద్దాలను’ తుడుచుకోనవసరం లేదు..?

Published: Friday, December 2, 2011, 12:53 [IST]

లండన్: దుమ్ము, ధూళి కణాలు పడి మసకబారిపోయే కళ్లద్దాలకు ఇక బ్రేక్ పడ్డట్టే..?, కళ్లద్దాలు తుడుచుకోవల్సిన అవసరం ఇక పై ఉండకపోవచ్చు..?, ఎటువంటి వాతావరణంలోనైనా మసకబారకుండా ఉండే కళ్లద్దాలను పరిశోధకులు రూపొందించారు. నీటిని అదనంగా పీల్చుకునే ఓ పదార్ధాన్ని పూతగా వాడి ఈ కళ్లద్దాలను డిజైన్ చేశారు.

కళ్లజోడుపై నీటి ఆవిరి, దుమ్ము చేరగానే వాటిని అక్కడే పేరుకుపోకుండా అద్దాలపై ఉండే పూత ఎప్పటికప్పుడు శుభ్రంచేస్తుంది. ఈ అద్దాలు వంటచేసేవారికి, వైద్యులు, క్రీడాకారులు తదితరులకు బాగా ప్రయోజనకరంగా ఉంటాయని వీటిని డిజైన్ చేసిన ఫ్రెంచ్ సంస్థ 'ఎసిలార్' వెల్లడించింది. వివిధ పరిసరాల్లో వీలైనంత వరకు స్పష్టంగా చూసేందుకు ఉపయోగపడే కళ్లద్దాలను రూపొందించాలన్న లక్ష్యంతో వీటిని తయారుచేసినట్లు తెలిపారు. వారానికి ఒకసారి కళ్లజోడుపై ఓ ప్రత్యేక రసాయనాన్ని పిచికారీ చేస్తే చాలు అద్దాలపై పూత సమర్థంగా పనిచేస్తుందని, అద్దాల రకాన్ని బట్టి ఒక్కో కళ్లజోడు ధర 200 పౌండ్ల(రూ.16,299)వరకు ఉంటుందని పేర్కొన్నారు.