మీ శరీరంలో ప్రోటీన్ లోపం ఉందని చెప్పే 5 ముఖ్యమైన సంకేతాలివే!

మన శరీరంలోని హార్మోన్ల సమతుల్యత దగ్గరి నుండి, రోజంతా మనకు అవసరమైన శక్తి, మెరిసే చర్మం, ఒత్తైన జుట్టు... ఇలా ప్రతి ఒక్కదానిలోనూ ప్రోటీన్ పాత్ర ఎంతో కీలకం. అయితే చాలా సందర్భాల్లో చాలామందికి తమ శరీరంలో ప్రోటీన్ లోపం ఉందన్న విషయం కనీసం అవగాహన కూడా ఉండదు. కానీ మన శరీరం కొన్ని సూచనల ద్వారా ఆ లోపాన్ని నిశ్శబ్దంగా మనకు చెబుతూనే ఉంటుంది. బిజీ జీవనశైలిలో ఆ హెచ్చరికలను మనం తరచుగా నిర్లక్ష్యం చేస్తుంటాం. మీ రోజువారీ ఆహారంలో ప్రోటీన్ తగినంతగా లేదని చెప్పే 5 ముఖ్యమైన సంకేతాలు ఏమిటో ఇక్కడ చూడండి.

ఎప్పుడూ అలసటగా అనిపించడం
మీరు రోజంతా ఎలాంటి కష్టమైన పని చేయకపోయినా సరే శరీరం బరువుగా, ఏ పని చేయాలన్నా నీరసంగా అనిపిస్తోందా? అది కేవలం నిద్రలేమి వల్లో, ఒత్తిడి వల్లో మాత్రమే కాకపోవచ్చు. శరీరంలో తగినంత ప్రోటీన్ లేనప్పుడు కణాలకు అవసరమైన శక్తి లభించదు, దీనివల్ల మీరు ఎప్పుడూ అలసిపోయినట్లుగా భావిస్తారు.

కండరాల క్షీణత, బలహీనత
మీరు క్రమం తప్పకుండా వాకింగ్ లేదా తేలికపాటి వ్యాయామాలు చేస్తున్నప్పటికీ మీ శరీర నిర్మాణంలో ఎలాంటి మార్పు కనిపించడం లేదా? పైగా కండరాలు నొప్పిగా, బలహీనంగా అనిపిస్తున్నాయా? అయితే మీ కండరాలకు తగినంత పోషణ అందడం లేదని అర్థం. కండరాలను బలంగా ఉంచడంలో ప్రోటీన్‌ దే ప్రధాన పాత్ర.

జుట్టు రాలడం, పెళుసైన గోళ్లు
మన జుట్టు, గోళ్లు, చర్మం ప్రధానంగా కెరాటిన్ అనే ప్రోటీన్‌ తో నిర్మితమవుతాయి. ఎప్పుడైతే శరీరంలో ప్రోటీన్ లెవల్స్ పడిపోతాయో, అప్పుడు జుట్టు కాంతివిహీనంగా మారి, గరుకుగా తయారై రాలిపోవడం మొదలవుతుంది. అలాగే గోళ్లు సులభంగా విరిగిపోవడం, చర్మం పొడిబారడం వంటివి ప్రోటీన్ లోపానికి స్పష్టమైన సంకేతాలు.

పదే పదే ఆకలి వేయడం
కడుపు నిండా భోజనం చేసిన కొద్దిసేపటికే మళ్లీ ఏదైనా స్నాక్స్ తినాలనిపిస్తోందా? మీరు తీసుకునే ఆహారంలో ప్రోటీన్ కన్నా కార్బోహైడ్రేట్లు ఎక్కువగా ఉన్నాయని దీని అర్థం. ప్రోటీన్ జీర్ణం కావడానికి కొంత సమయం తీసుకుంటుంది, కాబట్టి ఇది మిమ్మల్ని ఎక్కువసేపు కడుపు నిండిన భావనతో ఉంచుతుంది. ప్రోటీన్ తగ్గితే మాటిమాటికీ ఆకలి పెరుగుతుంది.

మూడ్ స్వింగ్స్, మానసిక స్థితిలో మార్పులు
అకారణంగా కోపం రావడం, ఆందోళన లేదా విచారంగా అనిపించడం కూడా ప్రోటీన్ లోపానికి సంబంధించినవే. మన మెదడులోని రసాయనాల (న్యూరోట్రాన్స్మిటర్లు) బ్యాలెన్స్ ను కాపాడే అమైనో ఆమ్లాలు ప్రోటీన్ ద్వారానే లభిస్తాయి. అవి లోపిస్తే మీ మానసిక స్థితిపై నేరుగా ప్రభావం పడుతుంది.

ఇతర ముఖ్యమైన సంకేతాలు
ఇవే కాకుండా చిన్న చిన్న గాయాలు మానడానికి ఎక్కువ సమయం పట్టడం, రోగనిరోధక శక్తి తగ్గి పదే పదే జబ్బు పడటం, ముఖం లేదా పాదాలలో నీరు చేరి వాపు (ఎడెమా) రావడం వంటివి కూడా ప్రోటీన్ లోపాన్ని సూచిస్తాయి.

మనం ఏం చేయాలి?
ప్రోటీన్ అనగానే ఏదో మధ్యాహ్న భోజనంలోనో, రాత్రి భోజనంలోనో మాత్రమే కాకుండా, రోజంతా తీసుకునే ఆహారంలో సమపాళ్లలో ఉండేలా చూసుకోవాలి. ముఖ్యంగా ఉదయం తీసుకునే బ్రేక్‌ ఫాస్ట్ లో ప్రోటీన్ అధికంగా ఉండేలా (గుడ్లు, పాలు, మొలకలు, పప్పులు) ప్లాన్ చేసుకుంటే, అది రోజంతా మిమ్మల్ని ఉత్సాహంగా, ఏకాగ్రతతో ఉంచడానికి అద్భుతంగా సహాయపడుతుంది.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.