ఖరీదైన డ్రై ఫ్రూట్స్ ఎందుకు? సమ్మర్ లో నానబెట్టిన పల్లీలు తింటే జరిగే అద్భుతం ఇదే!

సమ్మర్ లో సూర్యుడి ప్రతాపానికి మన శరీరం త్వరగా అలసిపోతుంది. ఈ కాలంలో మనం తీసుకునే ఆహారం పట్ల ఎంతో శ్రద్ధ వహించాలి. సాధారణంగా వేరుశెనగలు (పల్లీలు) వేడి చేస్తాయని, ఎండాకాలంలో వాటికి దూరంగా ఉండాలని చాలామంది భావిస్తుంటారు. పచ్చిగా లేదా వేయించుకుని తింటే అవి శరీరంలో వేడిని పెంచే మాట వాస్తవమే. కానీ రాత్రంతా నీటిలో నానబెట్టి ఉదయాన్నే తింటే వాటి స్వభావం పూర్తిగా మారిపోతుంది.

నానబెట్టడం వల్ల వేరుశెనగలు చలువ చేస్తాయి, వేసవిలో కూడా మన శరీరానికి ఎలాంటి హాని చేయవు. ఖరీదైన డ్రై ఫ్రూట్స్ ఇచ్చే పోషకాలన్నీ వీటిలో పుష్కలంగా దొరుకుతాయి. గుప్పెడు నానబెట్టిన పల్లీలు తినడం వల్ల రోగనిరోధక శక్తి పెరగడంతో పాటు గుండెకు రక్షణ లభిస్తుంది. వేసవిలో వీటిని తినడం వల్ల కలిగే అద్భుతమైన ప్రయోజనాలేంటో ఇక్కడ చూడండి.

పొట్టకు హాయి.. మెరుగైన జీర్ణక్రియ
పచ్చి వేరుశెనగలలో ఫైటిక్ యాసిడ్ అనే మూలకం ఉంటుంది. దీనివల్ల కడుపులో గ్యాస్, ఉబ్బరం, భారం లాంటి సమస్యలు వస్తాయి. కానీ నీటిలో నానబెట్టినప్పుడు ఈ యాసిడ్ పూర్తిగా తొలగిపోయి పల్లీలు మృదువుగా మారతాయి. దాంతో వాటిలోని ఫైబర్ (పీచు పదార్థం) సులభంగా జీర్ణమవుతుంది. వేసవిలో తరచుగా వేధించే మలబద్ధకం, అజీర్ణం, ఎసిడిటీ వంటి పొట్ట సంబంధిత సమస్యల నుండి ఇది చక్కటి ఉపశమనం కలిగిస్తుంది.

సంపూర్ణ పోషకాల గని
నానబెట్టడం వల్ల వేరుశెనగలలో దాగి ఉన్న విటమిన్లు,మినరల్స్ పూర్తిగా యాక్టివేట్ అవుతాయి. వీటిలో పుష్కలంగా ఉండే ఐరన్, కాల్షియం, విటమిన్ ఈ, పొటాషియంలను మన శరీరం చాలా వేగంగా గ్రహిస్తుంది. దీనివల్ల ఎముకలు దృఢపడటమే కాకుండా, రక్తహీనత సమస్య దరిచేరదు. పిల్లల నుండి పెద్దల వరకు అందరికీ సంపూర్ణ పోషణ ఇట్టే లభిస్తుంది.

నీరసానికి చెక్.. రోజంతా ఫుల్ ఎనర్జీ
మండుటెండలు, విపరీతమైన చెమట కారణంగా వేసవిలో శరీరం త్వరగా డీహైడ్రేట్ అయిపోయి నీరసం ఆవరిస్తుంది. ఇలాంటి సమయంలో నానబెట్టిన వేరుశెనగలు పవర్‌ హౌస్‌ లా పనిచేస్తాయి. వీటిలో ప్రోటీన్లు, ఆరోగ్యకరమైన కొవ్వులు అధికంగా ఉంటాయి. ఉదయాన్నే పరగడుపున వీటిని తినడం వల్ల మీ జీవక్రియ అమాంతం పెరిగి, రోజంతా ఎంతో ఉత్సాహంగా, శక్తివంతంగా ఉండగలుగుతారు.

గుండె పదిలం.. అద్భుతమైన రక్త ప్రసరణ
నానబెట్టిన పల్లీలలో గుండెను పదిలంగా ఉంచే ఒమేగా 3 ఫ్యాటీ యాసిడ్లు మెండుగా ఉంటాయి. ఇవి రక్త నాళాలలో పేరుకుపోయిన చెడు కొలెస్ట్రాల్‌ ను కరిగించి, మంచి కొలెస్ట్రాల్‌ ను పెంచుతాయి. వీటిని క్రమం తప్పకుండా ఆహారంలో భాగం చేసుకుంటే, శరీరమంతటా రక్త ప్రసరణ సజావుగా సాగుతుంది. ఫలితంగా గుండెపోటు, ఇతర హృదయ సంబంధిత వ్యాధుల ముప్పు గణనీయంగా తగ్గుతుంది.

చర్మం, కురుల సౌందర్యానికి రక్ష
తీవ్రమైన ఎండల వల్ల చర్మం నిగారింపు కోల్పోయి, జుట్టు నిర్జీవంగా మారుతుంది. నానబెట్టిన వేరుశెనగలలోని యాంటీ ఆక్సిడెంట్లు, విటమిన్ ఈ చర్మ కణాలను దెబ్బతినకుండా ఒక కవచంలా కాపాడతాయి. ఇవి చర్మంపై ముడతలు పడకుండా యవ్వనంగా ఉంచడమే కాకుండా, కేశాలను కుదుళ్ల నుండి బలంగా, ఆరోగ్యంగా పెరిగేలా చేస్తాయి.

తినే సరైన విధానం ఏంటి?
ప్రతిరోజూ రాత్రి పడుకునే ముందు ఒక గుప్పెడు వేరుశెనగలను శుభ్రంగా కడిగి, మంచినీటిలో నానబెట్టండి. ఉదయం నిద్రలేవగానే బ్రష్ చేసుకున్న తర్వాత, ఖాళీ కడుపుతో వీటిని బాగా నమిలి తినండి. ఇవి మరింత రుచిగా, ఆరోగ్యకరంగా ఉండాలంటే.. పల్లీలతో పాటు కొన్ని శనగలు లేదా ఎండుద్రాక్షలను కూడా కలిపి నానబెట్టుకోవచ్చు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.