ముద్దు పెట్టుకునేటప్పుడు కళ్ళు ఎందుకు మూసుకుంటాం? కళ్ళు తెరిచి ముద్దు పెట్టుకుంటే ఏమవుతుంది?

ముద్దు.. ఇదొక అందమైన భావోద్వేగం. రెండు మనసులు, రెండు ఆత్మలు పెనవేసుకునే ఒక మధురమైన క్షణం. ఒక్క మాట కూడా మాట్లాడకుండానే ఎదుటివారిపై ఉన్న అంతులేని ప్రేమను, ఆప్యాయతను, భద్రతను వ్యక్తపరిచే అద్భుతమైన మార్గం ముద్దు. శారీరక కలయిక కంటే మించి, ఇందులో భాగస్వామి పట్ల గౌరవం, ఆకర్షణ ఇమిడి ఉంటాయి. మీరు ఎప్పుడైనా గమనించారా?

ముద్దు పెట్టుకునేటప్పుడు మనకు తెలియకుండానే కళ్ళు మూసుకుపోతాయి. అయితే దీని వెనుక ఆసక్తికరమైన మానసిక, శాస్త్రీయ కారణాలు దాగి ఉన్నాయి. అవేంటో ఇక్కడ చూడండి.

కళ్ళు తెరిచి ఉంటే ఏకాగ్రత కుదరదు

సాధారణంగా మనం కళ్ళు తెరిచి ఉన్నప్పుడు మన మెదడు చుట్టూ ఉన్న దృశ్యాలను, పరిసరాలను గమనించడంలో బిజీగా ఉంటుంది. మన కళ్ళు, చెవులు, చర్మం ఇలా మన ఇంద్రియాలన్నీ వాతావరణం నుండి నిరంతరం సమాచారాన్ని గ్రహిస్తుంటాయి. ఇలాంటి సమయంలో మన ఏకాగ్రత ఒకే విషయంపై నిలవదు. దృష్టి అటూ ఇటూ మళ్లుతూ ఉంటుంది. ముద్దు అనేది ఇద్దరి మధ్య జరిగే అత్యంత సన్నిహితమైన, వ్యక్తిగతమైన అనుభూతి. ఆ మధుర క్షణాన్ని ఎలాంటి పరధ్యానం లేకుండా పూర్తిగా ఆస్వాదించడానికే మనం కళ్ళు మూసుకుంటాము.

కళ్ళు మూసుకోగానే మన మెదడులో ఆక్సిటోసిన్ (లవ్ హార్మోన్), డోపమైన్, ఎండార్ఫిన్ వంటి రసాయనాలు విడుదలవుతాయి. దీనివల్ల మనస్సుకు ఎనలేని ప్రశాంతత, భాగస్వామిపై నమ్మకం, ఒక అద్భుతమైన ఏకత్వ భావన కలుగుతాయి. బాహ్య ప్రపంచాన్ని మరచిపోయి, కేవలం వర్తమాన క్షణంలో జీవించడానికి కళ్ళు మూసుకోవడం సహాయపడుతుంది.

స్పర్శను మరింతగా ఆస్వాదించేందుకు

కళ్ళు మూసుకోవడం వల్ల ముద్దు పెట్టుకునే అనుభవం మరింత మెరుగ్గా ఉంటుందని లండన్ యూనివర్శిటీ పరిశోధకులు నిర్వహించిన ఒక అధ్యయనంలో తేలింది. ఆ అధ్యయనం ప్రకారం.. మనం కళ్ళు తెరిచి చూస్తున్నప్పుడు మన మెదడు దృష్టిపైనే ఎక్కువ ఫోకస్ చేస్తుంది. ఆ సమయంలో మన స్పర్శ జ్ఞానం కాస్త నెమ్మదిస్తుంది. అంటే, కళ్ళు తెరిచి ముద్దు పెట్టుకుంటే ఆ స్పర్శను మనం పూర్తిగా ఫీల్ కాలేము.

అదే కళ్ళు మూసుకున్నప్పుడు, దృశ్యపరమైన సమాచారం ఆగిపోయి, మన మెదడు పూర్తిగా భాగస్వామి స్పర్శ, వెచ్చదనం, పెదవుల కదలికలపైనే దృష్టి పెడుతుంది. కళ్ళు మూసుకోవడం ద్వారా ఆ ముద్దును మరింత లోతుగా, అర్థవంతంగా అనుభూతి చెందడానికి మన మెదడుకు మనమే స్వేచ్ఛనిస్తాము. అందుకే ఆ క్షణాలు జీవితాంతం గుర్తుండిపోయేలా మారతాయి.

చూస్తూ ముద్దు పెట్టుకోవడం ఇబ్బందికరం
సైన్స్ పక్కన పెడితే, కళ్ళు తెరిచి ముద్దు పెట్టుకోవడం కాస్త అసౌకర్యంగా అనిపించవచ్చు. ముఖానికి అంత దగ్గరగా ఉన్నప్పుడు కళ్ళు తెరిచి చూడటం వల్ల ఇబ్బందికరమైన వాతావరణం ఏర్పడవచ్చు. దీనికి తోడు మన సంస్కృతి, సినిమాలు, నవలల ప్రభావం కూడా మనపై చాలా ఉంటుంది. తెరపై కనిపించే రొమాంటిక్ సన్నివేశాలలో హీరో హీరోయిన్లు కళ్ళు మూసుకుని ముద్దు పెట్టుకోవడం మనం చూస్తూ ఉంటాం. దాంతో తెలియకుండానే మన మైండ్‌ లో ముద్దు అంటే కళ్ళు మూసుకుని ఆస్వాదించే ఒక ఫీలింగ్ అని ముద్రపడిపోతుంది.

అయితే అందరూ ఎప్పుడూ కళ్ళు మూసుకునే ముద్దు పెట్టుకుంటారని నియమం లేదు. కొందరు సరదాగా ఉన్నప్పుడు లేదా తొలి ముద్దు సమయంలో కళ్ళు తెరిచే ఉంటారు. ఏది ఏమైనా, కళ్ళు మూసుకుని ముద్దు పెట్టుకోవడం అనేది ప్రేమను, నమ్మకాన్ని, ఆ మధురానుభూతిని రెట్టింపు చేసే ఒక అందమైన ప్రకృతి సహజమైన చర్య.