గుండె జబ్బు పరీక్షలు....ఆహారాలు!

By B N Sharma

Published: Saturday, May 26, 2012, 10:09 [IST]

హైపర్‌టెన్షన్‌ ఉన్న వారు ముందుగా తమ శరీర బరువును, పేరుకున్న అధిక కొవ్వు తగ్గించే ఆహారానికి ప్రాధాన్యత ఇవ్వా లి. ఇలా చేయడం వల్ల రక్తపోటు తగ్గుతుంది. కనుక ఈ దిగువన పేర్కొన్న ఆహార నియమాలను వైద్యులు సూచిస్తున్నారు. వెల్లుల్లి, నిమ్మ, కాకర, ములక్కాడ వగైరాలు తీసుకోవాలి. అధిక రక్తపోటును తగ్గించడంలో తాజా పళ్ళు ఎంతో ఉపయోగపడతాయి. ద్రాక్ష, అరటిపండు, జామపండు, పుచ్చకాయ, నేరేడు పండ్లు చాలా మంచివి. డ్రైఫ్రూట్స్‌ కూడా హాని చేయవని వాటినికూడా ప్రతిరోజూ తగినన్ని తీసుకుంటే శరీరానికి అవసరమైన పోషకాలు అందుతాయి. సాధ్యమైనంత వరకూ ఉప్పు, నూనెల వాడకాన్ని తగ్గించాలి.

అధికంగా ఉప్పు తీసుకోవడం గుండెకు సంబంధించిన వ్యాధులకు ముఖ్యంగా హైపర్‌టెన్షన్‌కు ముఖ్యకారణంగా భావిస్తారు.అధిక ఉప్పు శాతం ఉన్నందున కోడిగుడ్లు, రెడ్‌మీట్‌ వంటి మాంసాహారాన్ని పూర్తిగా మానివేయాలి. కెఫైన్‌ శాతం అధికంగా ఉంటుంది కనుక కాఫీని కూడా పూర్తిగా మానేయాలి. ఆహారంలో నూనె పరిమాణాన్నిబాగా తగ్గించాలి. ముఖ్యంగా హైడ్రోజనేటెడ్‌ నూనెలను మానేయాలి. పప్పు దినుసులను ఎక్కువగా తీసుకోవడం తగ్గించాలి.

ఆప్రికాట్లు, టమాటా, సపోటా, పుచ్చకాయ, అరటిపండు, ఆకు కూరలు, కాకరకాయ, వంకాయ, ఆలుగడ్డ వంటివాటిని రోజువారీ ఆహారంలో ఉండేలా చూసుకోవాలి. ఎందుకంటే వీటన్నింటిలోనూ పొటాషియం అధికంగా ఉంటుంది. అయితే మూత్రపిండ సమస్యలున్న హైపర్‌టెన్షన్‌ రోగులు మాత్రం పొటాషియం అధికంగా ఉన్న ఆహారం తీసుకోకూడదు. ఇది మూత్రపిండాల మీద అధిక ఒత్తిడి పెడుతుంది.

పొటాషియం అధికంగా అరటిపండు, ఆకు కూరలలో వుంటుంది. వీటిలో ఉండే పదార్ధం ఉపశమనకారిగా పని చేసి, రక్తపోటును కూడా తగ్గించగలదు. పళ్ళు, కాయగూరలను తీసుకోవడం ద్వారా విటమిన్లను కూడా సమపాళ్ళలో వుండేలా చూసుకోవాలి.

గుండె జబ్బుల విషయంలో నొప్పి స్థాయి ప్రధానాంశం కాదు. నొప్పి కలుగుతున్న విధానమే ప్రధానం. నొప్పి తక్కువగానే ఉన్నప్పటికీ లోపల గుండె తీవ్రస్థాయిలోనే దెబ్బతిని ఉండవచ్చు. దీనినే సైలెంట్‌ హార్ట్‌ ఎటాక్‌గా వ్యవహరిస్తుంటారు. అందుకే గుండెనొప్పి లక్షణాలన్న అనుమానం కలిగిన వెంటనే కనీసం ఇ.సి.జి. అయినా తీయించడం మంచి పద్ధతి. ఇ.సి.జి. పరీక్షల తర్వాత అవసరం అనుకుంటే వైద్య సూచన మేరకు ట్రెడ్ మిల్, టి.డి. ఎకో వంటి పరీక్షలు చేయిస్తే, వాటిలో గుండె సంబంధిత వ్యాధులు ఖచ్చితంగా నిర్ధారించబడతాయి.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.