పిల్లలకూ వచ్చే గుండె జబ్బులు!

By B N Sharma

Published: Saturday, March 10, 2012, 16:30 [IST]

పొట్ట ఎక్కువగా ఉండే పెద్దలకు గుండె సంబంధ వ్యాధులు రావడం సాధారణంగా వుండేదే. నడుం చుట్టు కొలత ఉండాల్సిన దానికంటే అధికంగా పెరిగిన కొద్దీ వారిలో గుండె సంబంధ వ్యాధులు, టైపు-2 మధుమేహం వంటి వ్యాధులు వచ్చే ప్రమాదం రేటు కూడా ఎక్కువవుతోందని పరిశోధకులు చెపుతున్నారు. అయితే ఇదే విషయం ఊబకాయంవున్న చిన్నారుల్లో కూడా నిజమా? కాదా? అన్న అంశంపై అమెరికాలో ఇటీవల ఓ స్టడీ నిర్వహించారు. ఆరోగ్యవంతంగా ఉండి, స్థూలకాయమున్న ఏడు నుంచి పదకొండు మధ్య వయస్సుండే 188 మంది పిల్లలపై ఈ అధ్యయనం నిర్వహించారు.

వీరిలో 35 మంది పిల్లలు అధిక స్థూలకాయంతో బాధపడుతున్నారు. 119 మందికి మాత్రం వారి వయస్సు, సెక్స్‌కు సంబంధించి ఉండాల్సిన పరిమాణం కంటే 90 శాతం ఎక్కువగా నడుం చుట్టకొలత కలిగియున్నారు. ఇదే అంశాన్ని నడుం చుట్టకొలత తక్కువగా ఉన్నపిల్లలతో పోల్చుకుంటే, నడుం చుట్టకొలత అధికంగా ఉన్నవారు స్థూలకాయం బారిన పడే అవకాశం 27 రెట్లు ఎక్కువగా ఉంటుంది. గుండె ఆరోగ్యానికి ఉపకరించే 'హై డెన్సిటీ-లిపో ప్రోటీన్‌(హెచ్‌డిఎల్‌) కొవ్వు మూడు రెట్లు తక్కువ స్థాయిలో ఉంటాయి. ట్రిగ్లిసెరాయిడ్స్‌ మూడు రెట్లు అధికంగానూ, ఇన్సులిన్‌ స్థాయీ 3.7 రెట్లు అధికంగా ఉంటుంది.

ఈ పరిశోధనలో వెలుగు చూసిన విషయాలు స్థూలకాయమున్న పిల్లలలో గుండె సంబంధ, మదుమేహ వ్యాధులు వచ్చే ప్రమాదం అధికంగా ఉంటుందన్న నిజాన్ని నిగ్గుపరుస్తున్నాయి. ఈ ప్రమాదం నుంచి పిల్లలను రక్షించేందుకు ముందుస్తుగా తీసుకోవాల్సిన జాగ్రత్తల్లో అత్యంత ప్రధానమైనది వారి నడుం చుట్టకొలతను ఎప్పటికప్పుడు గమనిస్తూ ఉండటమే. స్థూలకాయమున్న పిల్లలు మిత ఆహారం తీసుకొంటూ, రోజువారీ వ్యాయామం చేయడం ద్వారా గుండె సంబంధ సమస్యల నుంచి, మధుమేహం నుంచి బయటపడవచ్చని ఈ అధ్యయనం నిర్వహించిన పరిశోధకులు సూచిస్తున్నారు.

Disclaimer: ఈ ఆర్టికల్ లో అందించిన సమాచారం సాధారణ సమాచారం,విద్యా ప్రయోజనాల కోసం మాత్రమే. ఇది వృత్తిపరమైన వైద్య సలహా, రోగ నిర్ధారణ లేదా ట్రీట్మెంట్ కు ప్రత్యామ్నాయంగా ఉద్దేశించబడలేదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే మీ డాక్టర్ లేదా సంబంధిత నిపుణుల సలహా తీసుకోండి.