దక్షిణ కొరియాలో అరుదైన ఇన్ఫెక్షన్.. మెదడును తినే ఆ ఇన్ఫెక్షన్ ఎంత ప్రమాదకరం?

'మెదడును తినే అమీబా' ఏంటసలు?

అమీబాలు ఏక కణజీవులు. ఇవి చాలా చోట్ల ఉంటాయి. మట్టిలో, కాల్వల్లో, నదుల్లో, మురికి కాల్వల్లో చాలా చోట్ల కనిపిస్తాయి. అయితే నెగ్లెరియా అనే అమీబాలు మాత్రం మనుషులకు సోకుతుంది. నెగ్లెరియా ఫౌలెరి అనే అమీబా ముక్కు నుండి మనిషి శరీరంలోకి సోకుతుందని అమెరికాకు చెందిన సెంటర్ ఫర్ డిసీజ్ కంట్రోల్ అండ్ ప్రివెన్షన్ పేర్కొంది. ఈ అమీబా ముక్కు నుండి క్రమంగా మెదడుకు చేరుకుంటుంది. అక్కడ మెదడులోని కండరాలను, నరాలను దెబ్బతీస్తుంది. ఈ పరిస్థితిని ప్రైమరీ అమీబిక్ మెనింజోఎన్‌సైఫలిటిస్(పీఎంఏ) ఇన్ఫెక్షన్‌కు దారి తీస్తుంది. దీని వల్ల ప్రాణాలు కూడా పోవచ్చు.

'మెదడును తినే అమీబా' ఎలా సోకుతుందంటే..

నెగ్లెరియా ఫౌలెరి అనే అమీబా ముక్కు ద్వారా మనిషి ఒంట్లోకి ప్రవేశిస్తుంది. మెదడు వరకు ప్రయాణిస్తుంది. ఈత కొట్టినప్పుడు, నీటిలో దూకినప్పుడు, తలను నీటిలో ముంచినప్పుడు ముక్కులోకి నీరు వెళ్లినప్పుడు అమీబా సోకే అవకాశాలు ఉన్నాయి. కలుషిత నీటితో ముక్కును శుభ్రం చేసినప్పుడు కూడా ఈ అమీబా సోకవచ్చు.

నెగ్లెరియా ఫౌలెరీ మెదడు వరకు వెళ్లిన తర్వాత అక్కడి కణజాలాన్ని ఈ అమీబా నాశనం చేస్తుంది. దీని వల్ల ప్రైమరీ అమీబిక్ మెనింగోఎన్సెఫాలిటిస్(పీఏఎం) అని పిలిచే ప్రమాదకరమైన ఇన్ఫెక్షన్‌కు దారి తీస్తుంది.

'మెదడును తినే అమీబా' లక్షణాలు:

* అమీబా శరీరంలోకి ప్రవేశించిన తర్వాత 1 నుండి 12 రోజుల్లోపు మొదటి దశ సంకేతాలు కనిపిస్తాయి.

* ప్రారంభ దశలో తలనొప్పి, వికారం, జ్వరం, మెనింజైటిస్ ఉంటాయి.

* తర్వాతి దశలో మెడ తిప్పలేకపోవడం, మూర్చ, భ్రాంతులు, కొంతమంది కోమాలోకి కూడా వెళ్లవచ్చు.

* లక్షణాలు తీవ్రమైన తర్వాత 5 రోజుల్లో ప్రాణాలు కోల్పోవచ్చని అమెరికా పబ్లిక్ హెల్త్ ఏజెన్సీ వెల్లడించింది.

* అమెరికా వ్యాప్తంగా 1962 నుండి 2021 వరకు 154 మందికి ప్రైమరీ అమీబిక్ మెనింగోఎన్సెఫాలిటిస్(పీఏఎం) సోకగా అందులో కేవలం నలుగురు వ్యక్తులు మాత్రమే ప్రాణాలతో బయటపడ్డారని అమెరికాకు చెందిన సెంటర్ ఫర్ డిసీజ్ కంట్రోల్ అండ్ ప్రివెన్షన్ తెలిపింది.

* మెదడును తినే అమీబా సోకిన వ్యక్తి నుండి మరొక వ్యక్తి వ్యాప్తి చెందినట్లు శాస్త్రవేత్తలు ఇప్పటి వరకు ఎలాంటి ఆధారాలు గుర్తించలేదు.

'మెదడును తినే అమీబా' చికిత్స:

నెగ్లెరియా ఫౌలెరి ఇన్ఫెక్షన్ చాలా అరుదు. త్వరగా అభివృద్ధి చెందుతుంది. కాబట్టి శాస్త్రవేత్తలు ఇంకా ఎటువంటి ప్రభావవంతమైన చికిత్సలను గుర్తించలేకపోయారు. ప్రస్తుతం, వైద్యులు యాంఫోటెరిసిన్ బి, అజిత్రోమైసిన్, ఫ్లూకోనజోల్, రిఫాంపిన్, మిల్టెఫోసిన్, డెక్సామెథసోన్ వంటి మందుల కలయికతో దీనికి చికిత్స చేస్తున్నారు.