పండుగ అలంకరణలుగా ముచ్చటైన ప్రత్యామ్నాయ ముగ్గులు!

ప్రత్యామ్నాయ రంగోలి డిజైన్లు -
1. పూలతో రంగోలి - పూల రేకులు ప్రత్యేకించి బంగారు వర్ణంలో వుండే చేమంతి, ఎర్రటి గులాబి రేకులు ముగ్గులను మరింత అందంగా చేస్తాయి. చివరలు ఆకులతోను లేదా చిన్న కొమ్మలతో కూడా అలంకరించవచ్చు. కావలసిందల్లా ఒక పేపర్ పై డిజైన్ చేసి దానికి అదే డిజైన్ లో రంగురంగుల పూరేకలు అతకటమే. మంచి ఆహ్లాదాన్నివ్వాలంటే కొద్దిపాటి సెంట్ వేస్తే ఇక ఆ ప్రదేశమంతా తాజాగా రంగురంగుల డిజైన్ తో సువాసన భరితంగా వుంటుంది.

2. మేరిసేటి రంగోలి - దీపాలను రంగోలిలో వాడవచ్చు. చిన్న కేండిల్స్ తో డిజైన్ గా అలంకరించండి. సెంటెడ్ కేండిల్స్ అయితే మంచి వాసన కూడా వస్తుంది.

3. తళుకుల రంగోలి - ఇంటిలో మహిళలు బట్టలపై కుట్టే తళుకులున్నాయా? వాటితో మరింత ఆకర్షణీయంగా ముగ్గుల డిజైన్లు తయారు చేసి అందరిని మురిపించవచ్చు. లైటింగ్ లో అవి మెరుస్తూ వుంటాయి కూడాను. ఇంటిలో పిల్లలుంటే, పండుగరోజు వారికి ఈ రంగోలి ఎంతో ఉత్సాహాన్నిస్తుంది. తళుకులు పెద్దవిగా వుంటే డిజైన్లు పెద్దవిగా వుండి ఆకర్షిస్తాయి. పండుగ అవ్వగానే వాటిని తీసి దాచేయవచ్చు కూడాను.

4. రంగోలి డిజైన్లకు ఆహార పదార్ధాలు - బియ్యం, రాగి, ఇతర పప్పులనను కూడా రంగోలి డిజైన్లలో అలంకరించవచ్చు. ఉప్పును ఫుడ్ కలర్స్ తో కలిపి రంగోలికి వాడండి. పిల్లలు వీటిని తినేసినా హాని కలుగదు.