ఫ్లోటింగ్ కాండిల్స్ తో ఇల్లంతా కళకళా...

Published: Saturday, February 11, 2012, 15:38 [IST]

ఇంటి అలంకరణకు స్త్రీ ప్రాదాన్యత ఎక్కువగా ఉంటుంది. స్త్రీ అలకరించుకొన్నట్టే తమ ఇంటిని కూడా ప్రతిరోజూ కొత్తగా ఉండేలా చూసుకొంటే ఆ ఇంట్లో అందం ఆనందాలు వెల్లువిరుస్తాయి. ముఖ్యంగా ఇంట్లో చిన్న చిన్న, మొక్కలు పుష్పాల అలంకరణతో పాటు తేలియాడే దీపాలు. ఓ పక్కన చిరు చీకట్లు కమ్ముకుంటూ, మరోపక్కన చిటపట చినుకులు కురుస్తున్న సమయాన ఈ దీపాలు వాతావరణంలో ఆహ్లాదాన్ని నింపుతాయి. చల్లని గదిని ఈ దివ్వెలు నులివెచ్చగా మారుస్తాయి. అలసిన సమయాన ఈ కొవ్వొత్తులు అలసటను మరిపిస్తాయి. శరీరానికి విశ్రాంతినీ, మదికి ఉల్లాసాన్నీ ఇస్తాయి. ఈ కొవ్వొత్తులలో సువాసనలు వెదజల్లేవి కూడా దొరుకుతాయి. నచ్చిన రూపాల్లో దొరికే ఈ కొవ్వొత్తులను మీకు నచ్చిన వ్యక్తులకు బహుమతులుగా ఇచ్చి మురిపించొచ్చు కూడా! ఎప్పుడూ ఇంటిని ఒకే తీరుగా చూస్తుంటే కొద్దిగా బోర్‌ కొడుతుంది. అదే కొద్దిగా సృజనాత్మకతను జోడించి నూతనత్వాన్ని రంగరిస్తే ఇల్లే కాదు, మనసూ రీచార్జ్‌ అవుతుంది. మరి అలంకరణ ఏవిధంగానో చూద్దామా....

వెడల్పుగా ఉండే గాజు పాత్రలో కాసిన్ని నీళ్లు పోసి, రెండు మూడు ఫ్లోటింగ్ కొవ్వొత్తులు వెలిగించాలి. అందులో గులాబీ రేకులు, లావెండర్ లేదా వెనీలా ఎసెన్స్ రెండు మూడు చుక్కలు వేయాలి. మరీ వెడల్పుగా ఉండే కాఫీ టేబుల్, డైనింగ్ టేబుల్ లేదా గది మధ్యలో ఆ పాత్రను ఉంచితే ఇంటికే కొత్త కళ వస్తుందంటే నమ్మండి.

రంగు రంగుల కొవ్వొత్తుల్ని తీసుకుని, రంగులు మ్యాచ్ అయ్యేలా ఐదారు తీసుకోవాలి. వీటిని కలిపి కట్టి, చిన్న ట్రేలో ఉంచి, సాయంత్రం వేళల్లో వెలిగించాలి. ఇలాంటివి కొన్ని సెట్లు చేసి వాకిట్లో అక్కడక్కడా ఏర్పాటు చేసి.. అన్నింటినీ ఒకేసారి వెలిగిస్తే ఆ అందమే వేరు. ఇంకాస్త వెరైటీ కావాలంటే కొవ్వొత్తుల చుట్టూ రంగురంగుల పూలరేకులను పరచి చూడండి.

పెద్ద పళ్ళెం మధ్యలో చిన్న పళ్ళెం పెట్టి దీపాలు నూనె వత్తులు వేసి ఉంచాలి. పెద్ద పళ్ళెంలో చిన్న పళ్ళెం చుట్టూ బంతిపూలు లేక చామంతి, గులాబి పూలు అందంగా పేర్చాలి. రీయల్‌ ఫ్లవర్స్‌ దొరకని పక్షంలో ఇంపోర్టెడ్‌ ఫ్లవర్స్‌, ప్లాస్టిక్‌ ఫ్లవర్స్‌ పళ్ళెంలో అమర్చాలి.ఈ మధ్యలో ఉన్న దీపాలను వెలిగించి, డ్రాయింగ్‌ రూమ్‌ మధ్యలో టీపాయిపై ఉంచడం గాని దేవుని పూజ ముందు ఉంచడంగాని చేస్తే ఎంతో అందంగా ఉంటుంది. దీపం ఏ ఫంక్షన్‌ అయినా అవసరమే. పెద్ద పెద్ద సభల్లో కూడా ఈ దీపాల పళ్ళాలు అత్యంత అందమైన అలంకారము. దీపాలు చుట్టు పువ్వులకు బదులు చెమ్కిలు, ధర్మాకాల్‌ బాల్స్‌ కూడా పొయ్యవచ్చు. ఇవి మెరుస్తూ ఉంటాయి. దీపాల వెలుగులు పడి మరింత అందం ద్విగుణికృతమవుతుంది. గృహాలంకరణలో ఈనాడు ఈ తరహా అలంకరణ అత్యంత ప్రాముఖ్యత వహిస్తోంది.