గృహ శోభను రెంటింపు చేసే ముద్దుముద్దు బొమ్మలు...

Decor

oi-Saraswathi

By Sindhu

Published: Wednesday, April 18, 2012, 14:18 [IST]

పెద్ద పెద్ద నగరాల్లో సొంత ఇల్లు లేని వారు అద్దె ఇళ్ళలో ఉండడం తరచూ ఇళ్ళు మారడం సహజమే. సొంత ఇల్లు ఉన్నావారు కూడా ఒక్కొక్కసారి రకరకాల కారణాల వల్ల అద్దె ఇంట్లో ఉండడం జరుగుతోంది. అలాంటప్పుడు మనం ఉండేది సొంత ఇల్లు కాదు కదా... వేల రూపాయలు పోసి ఇంటి అలంకరణ చేసుకోవడమెందుకు అని అద్దె ఇంటిపై నిర్లక్ష్యం చేస్తుంటారు. అద్దె ఇంట్లో ఉన్నప్పుడు యజమాని చెప్పే సవాలక్ష నియమ నిబంధనలకు తల ఊపాల్సి వస్తుంది. గోడలకు మేకులు కొట్టవద్దు అనే వారు కొందరైతే, వాల్‌ పోస్టర్లు అతికించవద్దు అనే వారు మరికొందరు. ఇలాంటి నిబంధనలన్నీ కూడా ఇంటి అలంకరణ కోరికను చంపేసేవే. అంత మాత్రాన నిరుత్సాహ పడనక్కర్లేదు. ఇల్లు మారేటప్పుడు మీతో తీసుకెళ్ళగలిగే రీతిలో ఫర్నీచర్‌ను, అలంకరణ వస్తువులను సమకూర్చుకొని ఇంటిని అందంగా తీర్చిదిద్దుకోవచ్చు.

అనుకోకుండా అతిథులు వస్తున్నారని తెలియగానే ఇంటి అలంకరణ మీదకు మనసు మళ్లుతుంది. మరి అలాంటి హడావిడి సమయంలో ఎలాంటి ఏర్పాట్లు చకచకా చేయవచ్చో తెలుసుకుందాం..మధ్య గదిలో టీపాయ్‌, కాఫీ టేబుల్‌ను అందంగా ముస్తాబు చేసుకోవడానికి.. ఏం చేయాలంటే నీలం రంగు వస్త్రం పరవాలి. దానిమీద ఎర్రని గులాబీలతో అలంకరించుకుంటే ముచ్చటగా కనిపిస్తుంది.

అలానే గాజుగిన్నెలో నీళ్లు పోసి అందులో గులాబీ రేకలు వేసి మధ్యలో అమర్చుకొంటే ఆ అందమే వేరు. అదే రాత్రి వేళ అయితే పార్టీలకు గాజుపాత్రలో నీళ్లుపోసి కొవ్వొత్తి వెలిగించి.. అందులో రంగురంగుల రాళ్లు.. పైన పూరేకలు చల్లితే అలంకరణ పూర్తయినట్లే.

ఇంటి శోభను ద్విగుణీకృతం చేసే అందమైన వివిధ రకాలైన బొమ్మలను తమతమ ఇళ్లలో అలంకరించుకోవచ్చు. హస్త కళల రూపాలైన రకరకాల ముద్దులొలికే బొమ్మలతోపాటు ఆధ్యాత్మికత ఉట్టిపడే చందనపు బొమ్మలు, ప్రకృతి రమణీయతను అద్దంపట్టే పక్షుల బొమ్మలు, నాటి ఆచార వ్యవహారాలను తెలియజేసే మానవ ఆకృతులను ఇలా ఒటేంటి ఇంటి శోభను రెట్టింపు చేస్తాయి. అటువంటి ఈ సుందర రూపాలను మీ ఇంటిలో అలంకరించుకుని ఆహ్లాదంగా గడపొచ్చు.

పరదాల విషయానికి వస్తే కిటికీలకు లేత రంగువి ఎంచుకోవాలి. ముఖ్యంగా ఎరుపు, పసుపు, నారింజ, ఆకుపచ్చ.. వర్ణాలను ఏర్పాటు చేస్తే గదికి కొత్త కళ వస్తుంది. డిజైన్లు ఉన్న లేస్‌ కర్టెన్లు మరింత హుందాతనాన్నిస్తాయి.